Onlad karga

Onlad saray karga

 AARALEN YA ARTIKULO 25

Manmatalek Ka ed si Jehova Sano Onkakapuy so Liknaan Mo

Manmatalek Ka ed si Jehova Sano Onkakapuy so Liknaan Mo

“Nanairapan [ak] lan maong.”​—1 SAM. 1:15.

KANSION 30 Kaarok, Dios Ko, tan Amak

DIAD SAYAN ARTIKULO *

1. Akin et kaukolan tayon imanoen so pasakbay nen Jesus?

DIAD samay propesiya nen Jesus nipaakar ed kaunoran iran agew, inkuan to: “Manalwar kayo pian agbalot nabelatan so puso yo ed . . . saray kapagaan ed bilay,” salanti, saray kapagaan ed pananap na pambilay odino saray pakakaaburidoan ed inagew-agew. (Luc. 21:34) Kaukolan tayon imanoen itan ya pasakbay. Akin? Lapud amin tayo et onaarap ed dakel a problema ya makapakapuy na liknaan.

2. Anto ran makapakapuy a problema so aarapen na saray agagi tayo?

2 No maminsan, manbabansag iray makapakapuy a problema ya aarapen tayo. Imanoen irayan alimbawa. Sakey ya agi a manngaran na John * et walaan na sakit ya multiple sclerosis. Agto inilaloan ya sikatoy taynan na asawa to kayari na 19 a taon ya impaniba da, kanian maer-ermen. Insan say duaran anak ton bibii et tinmundan nanlingkor ed si Jehova. Duma met so aarapen na sanasawa ya si Bob tan Linda. Nakal iran dua ed trabaho, insan kaukolan day onalis na ayaman ta agda la sarag ya bayaran so abung da. Naaruman so problema ra nen naamtaan da ya si Linda et walay sakit to ed puso ya nayarin ipatey to, tan wala ni sananey a sakit to ya sengegay ikakapuy na resistensia to.

3. Base ed Filipos 4:6, 7, antoy naseguro tayo?

3 Makaseguro tayo ya say Manamalsa tan maaron Ama tayo, si Jehova, et natatalosan to so nalilikna tayo no wala ray dadalanen tayon problema. Tan labay to tayon tulongan pian nasarag tayo iratan. (Basaen so Filipos 4:6, 7.) Nabasa tayo ed Salita  na Dios so dakel ya subok ya dinalan na saray lingkor to. Nabasa tayo met ditan no panon iran tinulongan nen Jehova pian nasarag da iray situasyon ya makapakapuy na liknaan. Konsideraen tayo so pigaran alimbawa.

ELIAS—“TOON WALAAN NA LIKNAAN A SINGA SIKATAYO”

4. Anto ran subok so inarap nen Elias, tan antoy aminpigan anengneng to ya ginawa nen Jehova parad sikato?

4 Si propeta Elias et nanlingkor ed si Jehova legan na mairap a panaon tan inmarap ed saray graben subok. Diad saman et manuuley si Arin Ahab, a sakey ed saray agmatoor ya ari na Israel nensaman, tan say asawa to et say mauges a biin si Jezebel a mandadayew ed si Baal. Inkayat dan dua so panagdayew ed si Baal diad interon nasyon tan impapatey da so dakel ya propeta nen Jehova. Balet, akatakas si Elias. Aliktaran to met so graben eras lapud impanmatalek tod si Jehova. (1 Ara. 17:2-4, 14-16) Sikatoy nanmatalek met ed si Jehova nen inarap to ray propeta nen Baal tan saray mandadayew ed satan a dios. Pinaseseg to ray Israelita ya say panlingkoran da et si Jehova. (1 Ara. 18:21-24, 36-38) Aminpigan anengneng nen Elias no panon ya sikatoy prinotektaan tan tinulongan nen Jehova ed saraman ya mairap a panaon.

Angibaki si Jehova na anghel pian pabiskegen si Elias (Nengnengen so parapo 5-6) *

5-6. Base ed 1 Arari 19:1-4, antoy alikna nen Elias, tan panon ya impanengneng nen Jehova ya sikatoy inar-aro to?

5 Basaen so 1 Arari 19:1-4. Balet tinmakot met si Elias nen naamtaan to ya sikatoy labay ya ipapatey nen Reyna Jezebel. Kanian batik ed Beer-sheba. Kinmapuy a maong so liknaan to kanian “kinerew to a sikatoy ompatey la komon.” Akin et ontan so alikna to? Si  Elias et aliwan perpekto, “sakey a toon walaan na liknaan a singa sikatayo.” (Sant. 5:17) Nayarin say pakalikna to et agto la sarag tan naknaksawan la. Seguro, inisip to ya anggapoy gunggona na saray sagpot to parad dugan panagdayew, ya anggapo met lanlamang so anguman ed Israel, tan sikato labat la so akeran manlilingkor ed si Jehova. (1 Ara. 18:3, 4, 13; 19:10, 14) Ompan agtayo ilaloan ya ontan so nalikna na sayan matoor a propeta. Balet atalosan nen Jehova so liknaan nen Elias.

6 Imbes ya pampasnokan nen Jehova si Elias nen imbalikas toy nalilikna to, tinulongan To pian ombiskeg lamet. (1 Ara. 19:5-7) Insan impanengneng nen Jehova so makapadinayew a pakapanyari to pian maaro ton nipetek so kanonotan nen Elias. Imbaga met nen Jehova ya wala ni 7,000 ed Israel ya agmandadayew ed si Baal. (1 Ara. 19:11-18) Ginawa iraya nen Jehova pian nipanengneng tod si Elias ya inar-aro to.

NO PANON ITAYON TULONGAN NEN JEHOVA

7. Akin et makapaseseg ed sikatayo imay paraan na intulong nen Jehova ed si Elias?

7 Kasin walay aarapen mon situasyon ya makapakapuy na liknaan? Talagan makaligliwa ed sikatayo ya naamtaan ya atalosan nen Jehova so alikna nen Elias! Makaseguro tayo ya natatalosan to met so nalilikna tayo. Amta to iray limitasyon tayo, tan amta to ni ingen no antoy walad nonot tan puso tayo. (Sal. 103:14; 139:3, 4) No manmatalek tayod si Jehova a singa si Elias, tulongan To tayo met pian nasarag tayo iray problema ya mamapakapuy ed liknaan tayo.​—Sal. 55:22.

8. Panon kan tulongan nen Jehova pian nasarag mo iray mairap ya situasyon?

8 No onkapuy so liknaan mo, nayarin puro negatibo lay naisip mo kanian mainomay kan nadismaya. Balet tandaan ya tulongan ka nen Jehova pian nasarag mo iray mairap ya situasyon. Panon to kan tulongan? Labay to ya ibagam ed sikato iray pampapagaan mo. Tan ebatan toy ikekerew mo na tulong. (Sal. 5:3; 1 Ped. 5:7) Kanian lanang mon ipikasi ed si Jehova iray problemam. Agdirektan mitongtong ed sika ya singa ginawa to ed si Elias, balet sikatoy mitongtong ed sika panamegley na Salita to, say Biblia, tan panamegley na organisasyon to. Saray salaysay ya nabasam ed Biblia et mangiter ed sika na ligliwa tan ilalo. Tan napaseseg ka met na saray agagi.​—Roma 15:4; Heb. 10:24, 25.

9. Panon itayon natulongan na napanmatalekan a kaaro?

9 Nen imbaga nen Jehova ed si Elias ya ipasa toy arum ya responsabilidad ed si Eliseo, inter nen Jehova ed si Elias iyan maong a kaaro ya seguradon tinmulong ed sikato pian nalabanan toy pakakadismaya to. Ontan met ed sikatayo natan, no ibaga tayoy nalilikna tayo ed napanmatalekan ya kaaro, natulongan to tayon nasarag so situasyon tayo. (2 Ara. 2:2; Pro. 17:17) No bilang ta iisipen mo ya singa anggapoy napangibagaan moy naliliknam, ipikasim ed si Jehova ya tulongan to kan makaromog na maespiritual ya agi ya mamabiskeg ed liknaan mo.

10. Akin ya say eksperiensya nen Elias et mamapaseguro ed sikatayo ya sarag tayo met so mansungdo, tan panon ya makatulong ed sikatayo so sipan ya nabasad Isaias 40:28, 29?

10 Tinulongan nen Jehova si Elias pian makapansungdo tan matoor ya makapanlingkor ed dakel nin taon. Say eksperiensya nen Elias et mamapaseguro ed sikatayo ya sarag tayo met so mansungdo. No maminsan, ompan isipen tayo ya agtayo la sarag tan naknaksawan tayo la. Balet no manmatalek tayo ed si Jehova, ikdan to tayo na pakayari ya kaukolan tayo pian makapantultuloy tayon manlingkor ed sikato.​—Basaen so Isaias 40:28, 29.

NANMATALEK ED SI JEHOVA SI HANA, DAVID, TAN SAY SAKEY A SALMISTA

11-13. Panon ya naapektoan so taloran lingkor na Dios nensaman nen kinmapuy so liknaan da?

11 Wala ni ray arum ya karakter ed Biblia ya kinmapuy a maong so liknaan da. Singa bilang,  si Hana ya asawa nen Elkana et inanosan toy kababaingan lapud agmakaanak tan sikatoy babalawen na sakey nin asawa nen Elkana. (1 Sam. 1:2, 6) Lapud satan et agaylay ermen to kanian sikatoy akis lan akis tan agmakapangan.​—1 Sam. 1:7, 10.

12 Si Arin David et kinmapuy met so liknaan to. Isipen pa iray dinalan ton mairap ya situasyon. Sikatoy akonsiensian maong lapud karakel na ginawa ton lingo. (Sal. 40:12) Nanrebelde ed sikato si Absalom, ya nanresulta ed impatey na sayan inad-aro ton anak. (2 Sam. 15:13, 14; 18:33) Tan sikatoy trinaidor na sakey a maapit ya kaaro to. (2 Sam. 16:23–17:2; Sal. 55:12-14) Dakel ed saray salmo ya insulat nen David et manideskribe ed alikna ton ermen, ontan met ed mabiskeg ya talek tod si Jehova.​—Sal. 38:5-10; 94:17-19.

Antoy akatulong ed salmista pian magmaliw lamet ya maliket ed panlilingkor to? (Nengnengen so parapo 13-15) *

13 Sakey a salmista so akaibeg ed kabibilay na saray mauges. Nayarin sikatoy nanlapud kapolian na Levitan si Asaf tan nanlingkor ed “masanton santuaryo na Dios.” Kinmapuy so liknaan na sayan salmista, kanian agla maliket tan agla kontento. Inisip to ni ingen ya singa kulang so nanaawat ton bendisyon ed panlilingkor tod Dios.​—Sal. 73:2-5, 7, 12-14, 16, 17, 21.

14-15. Antoy naaralan tayo ed saramay taloran alimbawa ed Biblia nipaakar ed ikerew na tulong ed si Jehova?

14 Sarayan taloran lingkor nen Jehova et nanmatalek ed tulong to. Masimoon iran nampikasi ed sikato tan imbalikas da iray kapagaan da. Imbaga ran amin ed sikato so rason no akin ya onkakapuy so liknaan da. Tan intultuloy da so linma ed pasen ya pandadayewan ed si Jehova.​—1 Sam. 1:9, 10; Sal. 55:22; 73:17; 122:1.

15 Naabagey ira nen Jehova kanian inebatan to iray pikakasi da. Si Hana et dinmeen so nonot to. (1 Sam. 1:18) Si David et insulat to:  “Dakel so pakakairapan na matunong, balet sikatoy isasalba nen Jehova ed saratan ya amin.” (Sal. 34:19) Tan samay salmista et alikna to ya si Jehova et ‘sankabembenan toy kawanan a lima to,’ ya mangigigiya ed sikato panamegley na saray maaron simbawa. Inkansion to: “Parad siak, say iyasingger ed Dios et pankaabigan ko. Say Soberanon Katawan a Jehova so pansasalimbengan ko.” (Sal. 73:23, 24, 28) Antoy naaralan tayo ed sikara? No maminsan, onkapuy so liknaan tayo lapud ambelat iran problema. Balet nasarag tayo iratan no dalepdepen tayoy intulong nen Jehova ed saray lingkor to, manmatalek tan manpikasi tayod sikato, tan unoren tayo iray panlabayan to.​—Sal. 143:1, 4-8.

MANMATALEK ED SI JEHOVA PIAN NASARAG MOY PROBLEMA

Nen primero, mas labay na sister so manbukbukor, balet anguman so liknaan to nen nananap na paraan pian natulongan to so arum (Nengnengen so parapo 16-17)

16-17. (a) Akin et agtayo nepeg ya isian so sarili tayo? (b) Panon ya ombiskeg so liknaan tayo?

16 Wala ni naaralan tayo ed saraman ya taloran alimbawa​—agtayo nepeg ya isian so sarili tayo ed si Jehova tan ed saray agagi. (Pro. 18:1) Si Nancy, ya kinmapuy ya maong so liknaan to nen tinaynan na asawa to, et imbaga to: “Wala ray agew ya agko labay so makanengneng na arum a too o mitongtong ed anggan siopa. Balet no isisian koy sarilik, mas maermen ak laingen.” Anguman so liknaan nen Nancy nen sikatoy nananap na paraan pian natulongan to so arum ya walaan met na  problema. Imbaga to: “Ondedengel ak sano ibabaga na arum ed siak iray problema da. Naimanok ya no say sankanonot ko et say kipapasen da, agko la masyadon nakakasian so sarilik.”

17 Ombiskeg so liknaan tayo diad saray aral ed kongregasyon. No onatendi tayo ed saray aral, lalo tayon iikdan si Jehova na pankanawnawa ya ‘tulongan tan ligliwaen’ itayo. (Sal. 86:17) Ditan et papabiskegen to tayo panamegley na masanton espiritu to, say Salita to, tan saray agagi. Diad saray aral et walay pankanawnawa tayon “makapanpapasesegan.” (Roma 1:11, 12) Imbaga na sister ya manngaran na Sophia: “Si Jehova tan saray agagi so rason no akin ya makakapansungdo ak. Baleg so nitutulong ed siak na saray aral ed kongregasyon. Naimanok ya no mas mibibiang ak ed ministeryo tan ed saray aktibidad na kongregasyon, mas ombibiskeg so liknaan ko tan agak masyadon aburido.”

18. No onkakapuy so liknaan tayo, antoy sarag ya iter nen Jehova ed sikatayo?

18 No nadidismaya tayo, tandaan ya aglabat isisipan nen Jehova ya iter toy permanentin pakainawaan diad arapen, noagta isisipan to met ya natan ni labat et tulongan to tayo pian ombiskeg so liknaan tayo. Iiter tod sikatayo so ‘panlabay tan pakayari’ ya labanan so ikakapuy na liknaan pian nasarag tayoy mansungdo.​—Fil. 2:13.

19. Antoy ipapaseguro ed sikatayo na Roma 8:37-39?

19 Basaen so Roma 8:37-39. Impaseguro nen apostol Pablo ya anggapon balot so makapangisian ed sikatayo ed panangaro na Dios. Panon tayon natulongan iray agagi tayo ya onkakapuy so liknaan da? Aralen ed ontumbok ya artikulo no panon tayon naalig si Jehova diad panangipanengneng na panangabagey tan diad isuporta tayo ed saray agagi ya onkakapuy so liknaan da.

KANSION 44 Pikakasi na Maer-ermen

^ par. 5 No grabe tan abaybayag la so ikakapuy na liknaan tayo, nayarin naapektoan so laman tan emosyon tayo. Panon itayon tulongan nen Jehova? Aralen tayo no panon ya tinulongan nen Jehova si Elias pian nasarag to so inkapuy na liknaan to. Nanengneng tayo met ed arum nin alimbawa ed Biblia no antoy gawaen tayo pian tulongan itayo nen Jehova no onkakapuy so liknaan tayo.

^ par. 2 Sinalatan iray ngaran ed sayan artikulo.

^ par. 53 DESKRIPSION NA LITRATO: Anghel nen Jehova ya binangon toy Elias tan inikdan toy tinapay tan danum.

^ par. 55 DESKRIPSION NA LITRATO: Salmista ya nayarin nanlapud kapolian nen Asaf ya malikeliket a manggagawa na salmo tan mangakansion ya kaiba iray kapara ton Levita.