Onlad karga

Onlad saray karga

 AARALEN YA ARTIKULO 4

“Say Espiritu so Mantatasi”

“Say Espiritu so Mantatasi”

“Say espiritu so mantatasi a kaiba na espiritu tayo ya ananak itayo na Dios.”​—ROMA 8:16.

KANSION 25 Espisyal a Kayarian

DIAD SAYAN ARTIKULO *

Diad makapakelkelaw ya paraan et inkalbo nen Jehova so masanton espiritu to ed manga 120 ya Kristiano nen Pentecostes (Nengnengen so parapo 1-2)

1-2. Anto so makapakelkelaw ya agawa diad agew na Pentecostes 33 C.E.?

KABUASAN na Simba diad Jerusalem. Say taon et 33 C.E., tan agew na Pentecostes. Nantitipon so manga 120 ya disipulo diad kuarto ed tagey na sakey ya abung. (Gawa 1:13-15; 2:1) Pigaran agew antis na satan, binilin ira nen Jesus ya ag-ira ontataynan ed Jerusalem ta makaawat ira na espisyal ya regalo. (Gawa 1:4, 5) Antoy sinmublay ya agawa?

2 “Kabekta et walay ungol a nanlapud tawen a singa maksil a siplog na dagem.” Manungol ed loob na interon abung. Insan wala ray “diladila a singa apoy” ya dinmapo ed ulo na saray disipulo, tan “napno ran amin na masanton espiritu.” (Gawa 2:2-4) Diad satan ya makapakelkelaw ya paraan et inkalbo nen Jehova so masanton espiritu to ed saratan ya disipulo. (Gawa 1:8) Sikara so sankaunaan ya alanaan na masanton espiritu * tan naikdan na ilalo ya manuley a kaiba nen Jesus diad tawen.

ANTOY NAGAWA SANO NALANAAN SO SAKEY?

3. Akin ya saramay disipulo ya nantitipon nen Pentecostes et segurado ira ya alanaan ira na masanton espiritu?

3 No sakey ka ed saramay disipulo ya nantitipon ed kuarto diad saman ya agew, seguradon agmo iman nalingwanan. Walay  singa dila ya apoy ya dinmapo ed ulom, tan akapansalita ka na sananey ya lenguahe! (Gawa 2:5-12) Segurado kad sarilim ya alanaan ka na masanton espiritu. Balet kasin amin ya alanaan na masanton espiritu et naawat da itan diad makapakelaw ya paraan tan parehon panaon? Andi. Panon tayon amta?

4. Kasin amin ya alanaan nen inmunan siglo et nilanaan diad parehon panaon? Ipaliwawa.

4 Pantongtongan tayo no kapigan nalanaan so sakey. Aliwa labat ya saramay manga 120 ya disipulo so alanaan na masanton espiritu nen Pentecostes 33 C.E. Diad saman lanlamang ya agew, manga 3,000 ni so akaawat na masanton espiritu. Sikaray alanaan nen abautismoan ira. (Gawa 2:37, 38, 41) Balet diad tinmumbok iran taon, wala ray Kristiano ya aliwan diad agew na bautismo ra so impakalanaan da. Singa bilang, agtampol ya akaawat na masanton espiritu iray Samaritano kayari na bautismo ra. (Gawa 8:14-17) Tan say nikadkaduma ingen et samay impakalanaan nen Cornelio tan say sankaabungan to, lapud alanaan la ra antis ni ran nabautismoan.​—Gawa 10:44-48.

5. Base ed 2 Corinto 1:21, 22, antoy nagawa sano say sakey et nalanaan na masanton espiritu?

5 Amtaen tayo met no antoy nagawa sano say sakey et nalanaan na masanton espiritu. Saray arum et nayarin agdan tampol naawat ya pinili ira nen Jehova. Ompan isipen da, ‘Akin et pinili ak na Dios?’ Balet, nayarin duma met so reaksion na arum. Antokaman so reaksion da, impaliwawa nen apostol Pablo no antoy nagawa ed amin ya nalalanaan na masanton espiritu: “Sanen anisia kayo, diad panamegley to et atatakan * kayo na insipan a masanton espiritu, a saya so garantiya na tawir tayo.” (Efe. 1:13, 14) Kanian uusaren nen Jehova so masanton espiritu to pian ipaseguro ed sarayan Kristiano ya pinili to ra. No ontan sirin, say masanton espiritu et sakey a “garantiya” odino sipan ya inter ed sikara pian napaseguroan ira ya diad arapen et manbilay ira na andi-anggaan diad tawen, aliwan diad dalin.​—Basaen so 2 Corinto 1:21, 22.

6. Antoy nepeg ya gawaen na sakey ya alanaan a Kristiano pian naawat toy premyo to ed tawen?

 6 No say sakey ya Kristiano et nalanaan, kasin segurado la ya onlad tawen? Andi. Amta to ya sikatoy apili ya onla ed tawen. Balet, nepeg ton tandaan iyan bilin: “Agagi, komon ta panseetan yo nin nagkalalo a bembenan a malet so pribilehyo yo bilang tinawag tan pinili, ta no itultuloy yon gawaen iraya, agkayon balot napelag.” (2 Ped. 1:10) Kanian anggano apili o atawag ya onla ed tawen so sakey ya Kristiano, naawat to labat so premyo to no sikatoy manmatoor.​—Fil. 3:12-14; Heb. 3:1; Apo. 2:10.

PANON YA NAAMTAAN NA SAKEY YA SIKATOY ALANAAN?

7. Panon ya naamtaan na saray alanaan ya say ilalo ra et diad tawen?

7 Panon ya naamtaan na sakey ya say ilalo to et diad tawen? Nanengneng tayoy ebat diad samay imbaga nen Pablo ed saray walad Roma ya “tinawag pian magmaliw a masanto.” Imbaga tod sikara: “Say espiritu na Dios et agto itayo pagmamaliwen ya ariripen tan agpansesengegay itakot lamet, noag ingen diad panamegley na satan ya espiritu et tinagibi itayo bilang ananak, tan satan so mamapakiwas ed sikatayon mangibaga: ‘Abba, Ama!’ Say espiritu so mantatasi a kaiba na espiritu tayo ya ananak itayo na Dios.” (Roma 1:7; 8:15, 16) Kanian diad panamegley na masanton espiritu, malinew ya ipapaamta na Dios ed saray alanaan ya say ilalo ra et diad tawen.​—1 Tes. 2:12.

8. Panon ya ipapanengneng na 1 Juan 2:20, 27 ya agla kaukolan na saray alanaan ya wala ni arum ya mangipaseguro ed sikara ya talagan alanaan ira?

8 Seseguroen nen Jehova ya agbalot panduaruwaan na saramay pinili to ya diad tawen so ilalo ra. (Basaen so 1 Juan 2:20, 27.) Siempre, anggan saray alanaan et kaukolan ya ibangat nen Jehova panamegley na kongregasyon ya singa saray arum ya Kristiano. Balet agla kaukolan ya wala ni arum ya mangipaseguro ed sikara ya talagan alanaan ira. Inusar la nen Jehova so sankabiskegan ya puersa ed interon uniberso​—say masanton espiritu to—​pian malinew ton nipaamta ed sikara ya alanaan ira!

SIKARAY ‘NIYANAK LAMET’

9. No say sakey et nalanaan, anton pananguman so nagawa ed sikato base ed Efeso 1:18?

9 Maslak ed saray lingkor na Dios natan et mairap dan talosan no antoy nagawa ed sakey sano sikatoy lanaan na Dios. Normal labat itan lapud aliwa ran alanaan. Pinalsa na Dios iray totoo pian manbilay na andi-anggaan diad dalin, aliwan dimad tawen. (Gen. 1:28; Sal. 37:29) Balet wala ray pinili nen Jehova ya manbilay ed tawen. Kanian nen nilanaan to ra, talagan inuman to so ilalo tan panagnonot da kanian say pipirawaten da la et say pambilay ed tawen.​—Basaen so Efeso 1:18.

10. Antoy kabaliksan na ‘niyanak lamet’? (Nengnengen met so paimanod leksab.)

10 No nalanaan na masanton espiritu iray Kristiano, sikaray ‘niyanak lamet,’ odino ‘niyanak manlapud tawen.’ * Napatnagan ed imbaga nen Jesus ya imposiblin nipaliwawa ed sakey ya aliwan alanaan no anton talagay nalilikna na saray ‘niyanak lamet,’ odino “niyanak ed espiritu.”​—Juan 3:3-8; paimanod leksab.

11. Ipaliwawa no panon ya manguman so panagnonot na sakey sano sikatoy nalanaan.

11 Panon ya anguman so panagnonot na saray alanaan ya Kristiano? Antis iran nilanaan nen Jehova, pipirawaten day manbilay na  andi-anggaan diad dalin. Labalabay da lan onsabi so panaon ya deralen nen Jehova so amin ya mauges tan gawaen to lan paraiso so dalin. Ompan iimadyinen da lan abeten iray napaoli ya kapamilya tan kakaaro da. Balet nen alanaan ira, anguman so panagnonot da. Akin? Aliwan lapud agla ra kontento ed ilalon pambilay diad dalin. Agmet anguman so panagnonot da lapud walay depresyon da odino walay dinalan dan ambelat ya problema. Agda met biglan alikna ya makapasawa so pambilay na andi-anggaan diad dalin. Imbes, inusar nen Jehova so masanton espiritu to pian umanen so panagnonot da tan say ilalon pipirawaten da.

12. Base ed 1 Pedro 1:3, 4, antoy nalilikna na saray alanaan ya Kristiano ed ilalo ra?

12 Nayarin nalikna na sakey ya alanaan ya sikatoy agmakanepegan ed mabmablin pribilehyo ya niiter ed sikato. Balet anggapoy anggan daiset ya panduaruwa to ya sikatoy pinili nen Jehova. Sikatoy malikeliket tan misalsalamat ed ilalo to ya manbilay diad tawen.​—Basaen so 1 Pedro 1:3, 4.

13. Antoy panmoria na saray alanaan ed bilay da diad dalin?

13 Kasin kabaliksan na satan ya labalabay na saray alanaan so ompatey? Inebatan itan nen apostol Pablo. Inkompara to ed tolda so laman na saray alanaan tan inkuan to: “Diad tua, sikatayon walad sayan tolda et oneey-ey tan nabebelatan, aliwan lapud labay tayon lakseben iya, noagta labay tayon isulong imay sakey, pian samay ompatey et naakmon la na bilay.” (2 Cor. 5:4) Ag-ipapasen na sarayan Kristiano ya makapasawa so bilay diad dalin tan labay da lay ompatey. Imbes, malikeliket dan uusaren so kada agew na bilay da pian manlingkor ed si Jehova kaiba iray kapamilya tan kakaaro da. Balet diad amin ya gagawaen da, sankanonot da so balibalin ilalo da diad arapen.​—1 Cor. 15:53; 2 Ped. 1:4; 1 Juan 3:2, 3; Apo. 20:6.

KASIN NILANAAN KA NEN JEHOVA?

14. Anto ray agnepeg ya pangibasiyan no kasin say sakey et alanaan na masanton espiritu?

14 Ompan iisipen mo no kasin alanaan ka na masanton espiritu. No ontan, maabig no nonoten mo irayan importantin tepet: Kasin ampetapetang so pilalek mo ya gawaen so linawa nen Jehova? Kasin nikadkaduma so seseg mo ed panagpulong? Kasin makulikuli kan manaral na Biblia tan labalabay mon usisaen iray “aralem a bengatlan nipaakar ed Dios”? (1 Cor. 2:10) Kasin naliliknam ya talagan bebendisyonan nen Jehova so pampupulong mo? Kasin diad pusom et naliliknam ya responsabilidad mo ya tulongan so arum ya onapit ed si Jehova? Kasin aminpigam lan naeksperiensya ya tinulongan ka nen Jehova ed espisipiko iran paraan? No say ebat mo ed saratan et malinew ya on, kasin prueba itan ya alanaan ka? Andi. Akin ey? Lapud nalilikna itan na amin ya lingkor na Dios, balanglan alanaan ira o andi. Tan diad panamegley na masanton espiritu, sarag nen Jehova ya ikdan na pakapanyari so kada lingkor to, antokaman so ilalo da. Diad tua, no panduaruwaan mo no kasin alanaan ka na masanton espiritu, prueba la itan ya agka alanaan. Saramay pinili nen Jehova et agda panduaruwaan no kasin alanaan ira odino andi! Segurado ira!

Inusar nen Jehova so masanton espiritu to pian ikdan si Abraham, Sara, David, tan Juan Bautista na pakapanyarin manggawa na makapakelaw iran bengatla, balet agto inusar itan ya espiritu pian ikdan ira na ilalon manbilay ed tawen (Nengnengen so parapo 15-16) *

15. Panon tayon amta ya aliwan amin ya akaawat na espiritu na Dios et apili ya onlad tawen?

15 Diad Biblia, amayamay so alimbawa na saray matoor a lalaki ya akaawat na masanton espiritu; balet, aliwan diad tawen so ilalo ra. Si David et inggiya na masanton espiritu. (1 Sam. 16:13) Say masanton espiritu so tinmulong ed sikato ya natalosan iray aralem  a bengatla nipaakar ed si Jehova tan satan so angigiya ed sikato diad impangisulat tod arum ya kabiangan na Biblia. (Mar. 12:36) Anggaman ontan, imbaga nen apostol Pedro ya si David et “agsinmegep ed tawen.” (Gawa 2:34) Si Juan Bautista et ‘napno na masanton espiritu.’ (Luc. 1:13-16) Imbaga nen Jesus ya anggapoy toon babaleg nen say si Juan, balet imbaga to met ya si Juan et agkabiangan ed Panarian na tawen. (Mat. 11:10, 11) Inusar nen Jehova so masanton espiritu to pian ikdan irayan lingkor to na pakapanyarin manggawa na makapakelaw iran bengatla, balet agto inusar itan ya espiritu pian pilien ira ya manbilay ed tawen. Kasin kabaliksan na satan ya ag-ira tanton matoor no ikompara ed saramay manuley ed tawen? Andi. Kabaliksan na satan ya paolien ira nen Jehova diad Paraison dalin.​—Juan 5:28, 29; Gawa 24:15.

16. Anton premyo so iilaloan ya awaten na karaklan ed saray lingkor na Dios?

16 Karaklan ed saray lingkor na Dios natan et aliwan diad tawen so ilalo ra. Iilaloan da so pambilay ed dalin diad uley na Panarian na Dios, ya satan met so inilaloan di Abraham, Sara, David, Juan Bautista, tan dakel ni ran lalaki tan bibii ya nambilay diad panaon na Biblia.​—Heb. 11:10.

17. Anto ran tepet so pantongtongan tayo diad ontumbok ya artikulo?

17 Lapud wadia nid dalin so arum ya alanaan, nayarin wala ray nitepet tayo. (Apo. 12:17) Singa bilang, antoy nepeg ya panmoria na saray alanaan ed sarili da? No walay kakongregasyon yon angan na tinapay tan inminum na alak legan na Memoryal, panon so nepeg ya pantrato yo ed sikato? Tan panon to no ondadakel so mangibabaga ya alanaan ira? Kasin nepeg mon pampagaan itan? Naebatan iratan ya tepet diad ontumbok ya artikulo.

^ par. 5 Manlapu nen Pentecostes 33 C.E., inikdan nen Jehova so arum ya Kristiano na espisyal ya ilalo​—nakaiba ira na Anak to ya manuley diad tawen. Panon da balet ya naamtaan ya sakey ira ed saray apili ya mangawat na sayan espisyal ya pribilehyo? Antoy nagawa sano say sakey et makaawat na sayan imbitasyon? Naebatan iratan ya tepet ed sayan artikulo ya nibase ed Enero 2016 ya Panag-bantayan.

^ par. 2 KABALIKSAN NA SALITA: Alanaan na masanton espiritu: Uusaren nen Jehova so masanton espiritu to pian pilien iray nakaiba nen Jesus ya manuley ed tawen. Diad panamegley na espiritu to, iter na Dios ed kada apili so sakey ya sipan odino “garantiya” parad arapen. (Efe. 1:13, 14) Nibaga na sarayan Kristiano ya say masanton espiritu so “mantatasi” odino mamapaneknek ya say ilalo ra et diad tawen.​—Roma 8:16.

^ par. 5 KABALIKSAN NA SALITA: Tatak. Magmaliw ya permanente iyan tatak antis ya ompatey a matoor so sakey ya alanaan odino antis ya onggapo so baleg ya kairapan.​—Efe. 4:30; Apo. 7:2-4; nengnengen so “Tepetepet na Saray Manbabasa” diad Abril 2016 ya Panag-bantayan.

^ par. 10 Parad kaaruman ya eksplinasyon no antoy kabaliksan na ‘niyanak lamet,’ nengnengen so Panag-bantayan ya Abril 1, 2009, p. 3-12.

KANSION 27 Say Kiparungtal na Ananak na Dios

^ par. 57 DESKRIPSION NA LITRATO: Balanglan apriso itayo lapud pananisia tayo odino bulos tayon ipupulong tan ibabangat so katuaan, iilaloan tayoy manbilay ed dalin diad uley na Panarian na Dios.