Onlad karga

Onlad saray karga

Burnett, Simone, Eston, tan Caleb

Mabulbulos Dan Inyapay so Inkasikara—Diad Oceania

Mabulbulos Dan Inyapay so Inkasikara—Diad Oceania

SI Reneé, sakey a sister ya manga 35 años to, et binmaleg ed maseseg ya pamilyan Tasi diad Australia. “Aminpiga kamin inmalis pian ontulong diad saray lugar ya mas baleg so pankaukolan parad manangipulong na Panarian,” so kuan to. “Ginawa nen Daddy tan Mommy ya makapainteres, eksayting, tan makapaliket iraman ya panaon! Nen wala lay duaran anak ko, labay ko met ya naeksperiensya day onman ya bilay.”

 Ontan met so espiritual iran kalat na asawa nen Reneé ya si Shane, sakey a brother ya man-40 años. Inkuan to: “Nen niyanak so komaduan anak mi, abasa mi ed Say Panag-bantayan so nipaakar ed sakey a pamilyan Tasi ya inusar day yate ra pian manpulong ed saray isla na Tonga. * Apaseseg kamid saman ya artikulo ya mansulat ed sangan opisina na Saray Tasi nen Jehova diad Australia tan New Zealand pian mantepet no iner so lugar ya walay mas baleg a pankaukolan parad saray manangipulong na Panarian. * Inmebat ira tan inimbitaan da kamin onlad Tonga—amay mismon lugar ya abasa mi!”

Jacob, Reneé, Skye, and Shane

Kayari manga sakey taon ya impanayam nen Shane, Reneé, tan saray anak dan si Jacob tan Skye ed Tonga, walay agawan nantutumbokan ya gulo kanian apilitan iran ompawil ed Australia. Balet agda nilingwanan so kalat da ya palaknabey ministeryo ra. Nen 2011, inmalis irad Norfolk Island, melag ya isla ed Pacific a manga 1,500 kilometro so kaarawi tod bukig na Australia. Antoy resulta na inyakar dad man? Inkuan nen Jacob, ya 14 años to la natan, “Agkami labat inasikaso nen Jehova noagta ginawa to met ya makapaliket so ministeryo mi!”

PANLINGKOR BILANG PAMILYA

Singa si Shane, Reneé, tan saray anak da, dakel ni ray pamilyan Tasi ya mabulbulos dan inyapay so sarili ra pian manlingkor ed lugar ya mas baleg so pankaukolan. Antoy amakiwas ed sikara?

“Dakdakel so interesado ed maong a balita. Labay mi ya regular iran naiyaralan na Biblia.”​—Burnett

Si Burnett tan Simone, sanasawan manga 35 años da, tan saray anak da, si Eston tan Caleb, ya manedad na 12 tan 9, et inmalis ed Burketown, sakey a nisulinek ya baley ed Queensland, Australia. “Kada talora o apatiran taon labat ya makakapampulong diman iray Tasi,” so kuan nen Burnett. “Dakdakel so interesado ed maong a balita. Labay mi ya regular iran naiyaralan na Biblia.”

Jim, Jack, Mark, tan Karen

Si Mark tan Karen, a masulok ya 50 años da, et nanlingkor ed nanduruman kongregasyon ya asingger ed Sydney, Australia, antis iran inmalis kaibay taloran anak da, si Jessica, Jim, tan Jack, diad Nhulunbuy, nisulinek a lugar ya panagminaan ed Northern Territory. Imbaga nen Mark: “Labalabay ko ray totoo, kanian labay koy onlad lugar ya dakel so gagawaen ed kongregasyon tan ed ministeryo.” Balet si Karen et manaalangan ya onalis. Anggaman ontan, say kuan to: “Nen pinaseseg ak nen Mark tan arum ya agagi, labay ko lan salien. Maong labat ta ginawak itan!”

Benjamin, Jade, Bria, tan Carolyn

Nen 2011, si Benjamin tan Carolyn tan say duaran angkelag nin anak dan si Jade tan Bria, sakey a pamilyan tagad Queensland, Australia, et pinmawil ed Timor-Leste, melag a bansa ed Timor Island diad Indonesia. “Nan-espisyal payunir kami nen Carolyn diad Timor-Leste nensaman,” so kuan nen Ben. “Balibali manpulong diman tan masuporta iray agagi. Maer-ermen kamin inmalis, balet determinado kamin ompawil. Nen wala la ray anak mi, agkami akapawil ya tampol, balet siansia nin plano mi so ompawil diman.” Inyarum nen Carolyn: “Labay mi ya nakaulop na saray anak mi iray misionero, Bethelite, tan saray espisyal payunir tan panliketan day panlingkor ed si Jehova.”

PAMPARAAN PARAD IYALIS

Imbaga nen Jesus ed saray patumbok to: “Siopad sikayo so malabay a mangipaalagey na tori ya agni onyurong ya unona tan kuentaen toy nagastos?” (Luc. 14:28) Mipadpara, no iisipen na sakey a pamilya so onalis ed arum a lugar, kaukolay pamplanon maong. Anto ray pankaukolan ya nayarin ikonsidera?

ESPIRITUALIDAD: “Labay mi manlingkor ed arum tan agmagmaliw a pabelat,” so kuan nen Ben. “Kanian antis kamin inmalis, mas pinabiskeg mi ni espiritualidad mi. Inaruman mi met so panaon mid ministeryo tan ed arum ni ran kimey ed kongregasyon.”

Oniay imbaga nen Jacob, ya abitlad bandad gapo: “Antis kamin inmalis ed Norfolk Island, nambasa kamid Say Panag-bantayan tan Awake! na dakel ya istoryay bilay na saray pamilyan nanlingkor ed lugar ya mas baleg so pankaukolan. Nantongtongan mi ray adalan dan subok tan no panon iran inasikaso nen Jehova.” Inyarum ni na 11 años ya agi ton si Skye: “Aminpigapiga ak ya nampikasin bukor tan no kaibak si Mommy tan Daddy!”

 EMOSYON: Imbaga nen Reneé: “Labalabay koy panaayaman mi ta asingger ed saray kapamilya tan kakaaro kanian agko la komon labay so onalis. Balet imbes ya say isipen ko et no anto ray nataynan ko, say inisip ko et no panon ya nagunggonaan so pamilya mi ed iyalis mi.”

KULTURA: Dakel a pamilya so manre-research pian niparaan day sarili ra ed balon lugar. “Dakel so binasa mi nipaakar ed Nhulunbuy,” so kuan nen Mark. “Iikdan kami dyaryo na saray agagi diman, kanian naamtaan mi nipaakar ed saray totoo tan say kultura da.”

Oniay inyarum nen Shane, ya inmalis ed Norfolk Island: “Say talagan nampokusan ko et no panon kon ipanengneng iray Kristianon kualidad. Amtak ya no masimoon, mauyamo, matua, tan makuli ak, sarag koy mibagay anggan iner so laen ko.”

ARAPEN IRAY SUBOK

Ibabaga na saramay agagi ya epektiboy intulong dad lugar ya mas baleg so pankaukolan ya importante so pagmaliw ya mainomay ya onadapta tan positibo no nipaarap ed ag-iilaloan iran subok. Imanoey pigaran alimbawa:

Imbaga nen Reneé: “Naaralan kon awaten so nanduruman paraan na panggawad saray bengatla. Singa bilang, no madaluyon ed dayat na Norfolk Island, agmakasabi iray barko ya mangaawit na suplay kanian dagdaiset so nasaliw tan mabmabli. Kanian diad panagluto et inaral koy mandiskarte.” Inyarum nen asawa ton si Shane: “Mantitipid kami met pian ondugay sinimban badyet mi.”

Wala ni subok ya imbaga na anak dan si Jacob: “Pitora labat so kaiba mi ed balon kongregasyon mi—amin ira et matatken la. Kanian anggapoy kaedad ko ya nakaarok! Balet nen akaibak irad ministeryo, akaarok ira lanlamang.”

Ontan met so situasyon nen Jim, ya natan et 21 años to la. “Say sankaasinggeran ya kongregasyon ed Nhulunbuy et masulok ya 725 kilometro so kaarawi to, kanian aanamoten mi ray asemblea tan kombension. Masakbay kamin onsasabi tan seseguroen min makapilimog kamin maong ed saray agagi. Parad sikami, sarayan okasyon so sankaliketan ed interon taon!”

 “MAONG LABAT TA LINMA KAMI DIA!”

Ibabaga na Biblia: “Say bendisyon nen Jehova makapayaman.” (Uli. 10:22) Diad interon mundo, dakdakel so oonlad saray lugar ya mas baleg so pankaukolan tan naeeksperiensya ran mismo so katuaan na satan ya imbaga na Biblia.

“Say sankaabigan ya bendisyon ed inyalis mi et say epekto na satan ed saray anak mi,” kuan nen Mark. “Saramay duaran panguloan et matalek iran asikasoen nen Jehova iray mangiyuuna ed Panarian. Agnasaliw itan ya talek.”

Inkuan nen Shane: “Mas inmapit ak ed asawak tan ananak ko. No iistoryaen da ray gagawaen nen Jehova parad sikara, talagan naliliketan ak.” Onabobon si Jacob ya anak to: “Nai-enjoy kon talaga. Maong labat ta linma kami dia!”

^ par. 3 Nengnengen so artikulo ya “Kakaaro na Dios Diad ‘Makaaro Iran Isla’” diad Say Panag-bantayan, Disyembre 15, 2004, p. 8-11.

^ par. 3 Nen 2012, impankasakey lay sangan opisina na Australia tan New Zealand pian magmaliw ya Australasia branch.