Onlad karga

Onlad saray karga

 ISTORYAY BILAY

“Maabig so Impideneng nen Jehova” ed Sikami

“Maabig so Impideneng nen Jehova” ed Sikami

SIAK tan say asawak ya si Daniele et kakkaloob mid hotel nen imbaga na receptionist, “Sir, nayarin pitawagan yoy border police?” Pigaran oras antis na satan, sinmabi kami ed Gabon, sakey a bansa diad West Africa, ya ditan et isesebel so kimey tayo nen dekada 1970.

Lapud maples ya mannonot si Daniele, naimano ton tampol so nagagawa tan inyesaes tod siak, “Agka la ontatawag ed pulis ta wadia la ra!” Diad benegan min mismo, diad arapan na hotel et tinmunda so sakey a luganan. Kayari pigaran minuto, inaresto da kami. Maong labat ta apasakbayan to ak nen Daniele, kanian walay oras kon iter so arum ya dokumento ed sakey a brother ya wadman.

Legan kamin paarap ed istasyon na pulis, sankanonot ko ya abendisyonan ak na sakey ya makpel tan maespiritual ya asawa. Sakey labat iya ed dakel ya inkagawa a nantulongan kami nen Daniele. Abuloyan yon istoryaen ko no akin ya akaonla kamid saray bansa ya say kimey tayon panagpulong et pepegetan.

MAARON NILUKASAN NEN JEHOVA IRAY MATAK

Niyanak ak ed debotadon Katolikon pamilya nen 1930, diad Croix, melag a baley diad northern France. Sinimban mimimisa so pamilya mi, tan si tatay ko et aktibon membro na simbaan. Balet nen asingger ak lan mantaon na 14, lapud sakey ya inkagawa et anengneng koy pansimpisimpitan na simbaan.

Say France et asakop na armada na Germany legan na World War II. Diad saray sermon na pari mi, lanang to kamin papasesegen ya suportaan so gobierno na Vichy ya pabor ed Nazi. Nabibigla kamid saray ibabaga to. Singa gagawaen na dakel ed France, pasekreto kamin ondedengel ed istasyon na radio ya BBC, ya mangipapakabat na saray balita manlapud Allied forces. Insan biglan anguman so pari ed susuportaan to tan inyuksoy toy sakey ya serbisyo parad pisasalamat pian selebraan so panatalo na Allied forces nen Setyembre 1944. Abigbigla ak ed satan. Kinmapuy so talek ko ed saray pari.

Ag-abayag kayari guerra, inatey si tatay ko. Wala lay asawa nen atsik tan manaayam ed Belgium, kanian responsabilidad ko lay nanay ko. Nantrabaho ak ed pabrika na tela. Say amok tan saray anak ton lalaki et debotadon Katoliko. Balibali kipapasen kod kompanya ra, balet agnambayag et nipaarap ak ed subok.

Say atsik ya si Simone, ya nagmaliw lan Tasi, et binisita to kami nen 1953. Inusar toy Biblia to pian ipanengneng iray palson bangat na Simbaan na Katoliko a singa say impierno, Trinidad, tan imortalidad na kamarerwa. Diad unaan, kinmontra ak ta  agto uusaren so Biblia na Katoliko, balet akombinse ak lanlamang ya say ibabaga tod siak et katuaan. Insan inyawitan to ak na daan iran isyu na Say Panag-bantayan, ya babasaen ko ed kuartok no labi. Atalosan kon tampol ya aya so katuaan; balet natatakot ak ya no pilien koy mandayew ed si Jehova, naekal ak ed trabaho.

Diad loob na pigaran bulan, inaral kon bukor so Biblia tan saray artikulo ed Panag-bantayan. Agnambayag et nandesisyon ak ya onlad Kingdom Hall. Talagan atenyeg so pusok nen anengneng koy aroan diad kongregasyon. Kayari anem bulan ya impangiyaral ed siak na sakey ya eksperiensyadon brother, abautismoan ak nen Setyembre 1954. Ag-abayag, maliket ak ta anengneng kon nagmaliw ya Tasi si nanay ko tan say yugtan kon bii.

NANMATALEK KAMI ED SI JEHOVA DIAD SIGPOT-PANAON YA SERBISYO

Makapaermen ta inatey si nanay ko pigaran simba antis na 1958 ya internasyonal ya kombension diad New York, ya apribilehyoan ak ya atendian. Kapawil ko, anggapo lay responsabilidad kod pamilya, kanian inmekal ak ed trabahok tan nampayunir ak. Diad saman et akisipanan ak ya asawaen so sakey a maseseg ya payunir a si Daniele Delie, tan nankasal kami nen Mayo 1959.

Si Daniele et ginmapon nampayunir diad Brittany, ya arawi ed abung da. Kaukolan toy pakpel pian makapanpulong ed satan ya lugar a dakel so Katoliko tan pian makapanbiahe panamegley na bisikleta diad saray kaumaan ya teritorya. Singa siak, alikna toy inkaganatan; pakalikna mi et asingsingger lay anggaan. (Mat. 25:13) Say inkamasakripisyo to so akatulong ed sikamin mansungdo ed sigpot-panaon a ministeryo.

Inyasain kami diad kimey ed sirkito pigaran agew kayari impankasal mi. Naaralan mi onadapta ed simplin panagbilay. Say unonan kongregasyon ya binisita mi et walaay 14 ya manangipalapag, tan mairap so bilay na saray agagi kanian agda kami napatuloy ed ayaman da. Lapud satan, diad stage na Kingdom Hall kami onuugip. Aliwa man ya komportablen dukolan, balet balibalid beneg!

Uusaren mi so melag ya kotse mi diad impanbisita mid saray kongregasyon

Anggano dakel so gagawaen mi, akapan-adjust si Daniele diad kimey ed sirkito. Mabetbet ya sikatoy manaalagar diad melag ya kotse mi no walay biglaan ya miting mi na saray elder, balet agbalot nanreklamo. Duay taon mi labat diad kimey ed sirkito, tan legan na satan et naaralan mi no panon kaimportante ed sanasawa so matuan pantongtong tan say pantulongan.​—Ecl. 4:9.

AKAAWAT KAMI NA SARAY BALON ASAINMIN

Nen 1962, naimbitaan kamin manaral ed loob na samploran bulan diad koma-37 a klase na Gilead School diad Brooklyn, New York. Diad 100 ya estudyante, 13 so sanasawa, kanian apribilehyoan kamin manaral a saniba. Anggad natan et malikeliket ak no nanonotan koy impiulop mi ed saray inmuunan agagi ya mabiskeg ed espiritual, singa si Frederick Franz, Ulysses Glass, tan si Alexander H. Macmillan.

Malikeliket kami ya saniban nanaral ed Gilead School!

Legan na panaaral mi, pinaseseg kamin paaligwasen so abilidad min manobserba. Diad pigaran ngarem na Sabado kayari na klase mi, kaiba ed panaaral  mi so ipasyar ed New York City. Amta mi ya kasabi Lunes et walay eksamin mi nipaakar ed saray anengneng mi. Mabetbet ya naksawan kami kapawil mi na Sabadoy labi, balet say tour guide mi, ya sakey ya boluntaryo ed Bethel, et tetepetan to kami pian natandaan mi ray importantin punto parad eksamin. Sakey ya Sabado, sanngarem kamin nanliber ed syudad. Pinmasyar kami ed observatory, ya ditan et naaralan mi so nipaakar ed saray meteor tan meteorite. Diad American Museum of Natural History, naaralan mi so nandumaan ya klase na buwaya. Kapawil mid Bethel, intepet na tour guide mi, “Antoy pandumaan na meteor tan meteorite?” Diad kesaw nen Daniele, say niyebat to, “Mas andukey so ngipen na saray meteorite!”

Maliket min binisita iray matoor ya agagi ed Africa

Agmi inilaloan ya iyasain da kami ed branch office ed France, a nanlingkor kamin sankaiba na masulok ya 53 taon. Nen 1976, aturo ak bilang coordinator na Branch Committee tan niyasain ak met ya ombisita ed saray bansa ed Africa tan Middle East, ya sebel odino pepegetan so panagpulong a kimey tayo. Satan so rason no akin ya binmiahe kamid Gabon, a ditan mi naeksperiensya imay abitla ed gapo. Diad tua, no maminsan, pakaliknak et agak kualipikadon mangasikaso ed saray ag-iilaloan ya responsabilidad. Balet balbaleg ya tulong si Daniele pian nagawaan koy anggan anton asainmin.

Ipapatalos koy paliwawa nen Brother Theodore Jaracz diad “Divine Justice” ya kombension ed Paris nen 1988

SANKAIBA MIN INARAP SO BALEG A SUBOK

Manlapu lad gapo et labalabay mi bilay mid Bethel. Naaralan nen Daniele so mansalita na English ed loob na limay bulan antis na impanaral mid Gilead tan nagmaliw ya marunong a managpatalos na saray publikasyon tayo. Naliliketan kamin maong ed kimey mid Bethel, balet say lalon amaliket ed sikami et say pibibiang mid saray aktibidad na kongregasyon. Nanonotan ko ni so ilulugan mi nen Daniele diad tren ed Paris anggano lablabi la, naksawan kami pero malikeliket kami ta akapangikondukta kami na saray progresibon iyaaralan na Biblia. Makapaermen balet ta biglan nansakit si Daniele, kanian agto la nagagawaan iray labalabay ton gawaen.

Nen 1993 et nalmoan ya walay breast cancer to. Sikatoy nairapan ya maong lapud panagtambal, kaibay operasyon tan chemotherapy. Kalabas na labinliman taon, wala lamet so nalmoan dan cancer to, ya mas grabe ni. Anggaman ontan, papablien ton maong so asainmin to bilang managpatalos, kanian mantratrabaho nin siansia basta sarag na laman to.

Anggano grabe so sakit nen Daniele, agmin balot naisip ya taynan so Bethel. Balet siansia nin wala ray subok anggano wala kad Bethel, lalo la no ag-amta na arum no panon kaseryoso so kondisyon mo. (Pro. 14:13) Anggano nen ngalngali la 80 nen Daniele, agnapatnagan ya walay sakit to lapud maimis tan elegante nin siansia. Agto nakakasian so sarili to. Imbes, akapokus ed itulong tod arum. Amta to ya say idengel ed arum et makatulong a maong ed saray nanairapan. (Pro. 17:17) Inusar nen Daniele so eksperiensya to pian natulongan so dakel a sister ya agtakotan so cancer.

Wala ni ray arum ya subok a kaukolan min arapen. Nen agla sarag nen Daniele so mantrabaho na full-time ed asainmin to, sinegurado ton mas nasuportaan to ak. Dakel so ginawa to pian mas  mainomay kon sumpalen so asainmin ko bilang coordinator na Branch Committee diad loob na 37 taon. Singa bilang, ipaparaan ton amin so kaukolan mi pian makapangugto kami ed kuarto mi tan makapanrelaks kamin magano a sankaiba kada agew.​—Pro. 18:22.

INARAP MI YA INAGEW-AGEW SO KAPAGAAN

Si Daniele et naynay ya positibo tan labalabay toy manbilay. Balet nalmoan ya wala lamet so cancer to ed komatlon pankanawnawa. Pakalikna mi et anggapo lay nagawaan mi. Lapud nantutumbokan ya chemotheraphy tan radiotherapy et naupot so biskeg to tan wala ray panaon ya ngalngali agmakaakar. Singa susugaten so pusok no nanenengneng koy inar-arok ya asawa ya nanairapan a mansalita, anta sikatoy marundunong ya managpatalos.

Anggano singa anggapo lay nagawaan mi, maseet kamin nampikasi, ta kombinsido kami ya agbalot abuloyan nen Jehova ya nipaarap kamid subok ya agmi nayarian. (1 Cor. 10:13) Lanang min aapresyaen iray itatarya nen Jehova ya tulong panamegley na Salita to, saray medical staff ed Bethel, tan say maaron suporta na espiritual ya pamilya mi.

Naynay min kekerewen so panangigiya nen Jehova no anton panagtambal so awaten mi. Walay panaon ya anggapoy panagtambal ya ginawa ed si Daniele. Say doktor ya angasikaso ed sikato diad loob na 23 taon et agto nipaliwawa no akin ya sikatoy nalelemay kada kayari chemotherapy to. Anggapo lay nibaga ton arum ya panagtambal. Agmi la amta no antoy gawaen mi tan no antoy pansumpalan. Insan inmabuloy so sananey a doktor ya espisyalista ed cancer ya sikato lay mangasikaso ed si Daniele. Singa nanggaway dalan si Jehova pian nasarag min arapen iray kapagaan mi.

Naaralan min sansakey ya agew so pangarap mid kapagaan. Singa imbaga nen Jesus, “magenap la ray problema ed kada agew.” (Mat. 6:34) Akatulong so positibon panmoria ed bilay tan pampaelek. Singa bilang, nen anggapoy ginawan chemotherapy ed si Daniele diad loob na duay bulan, makakaimis ton imbaga ed siak, “Antam, aya lay sankaabigan ya liknaan ko!” (Pro. 17:22) Anggano nanairapan, maliket tan walaay kompiyansa ton iprapraktis a maksil iray balon Kingdom song.

Say positibon panmoria to so akatulong ed siak pian nasarag ko ray sarilik ya limitasyon. Diad tua, diad loob na 57 taon ya impanulop mi bilang sanasawa, aasikasoen to ray nanduruman pankaukolan ko. Agto anggan labay ya ipanengneng ed siak no panoy manprito na iknol! Kanian nen agto la sarag so mankimey, kaukolan kon aralen no panoy mansinop na anganan mi tan manpesak, pati say pangiparaan na simplin panangan. Akabetag ak na pigaran baso, balet naliliketan ak ya maong no gagawaen ko ray bengatlan mamaliket ed sikato. *

MISALSALAMAT AK ED MAARON-KAABIGAN NEN JEHOVA

No nonoten koy apalabas, wala ray importantin leksion ya naaralan ko ed saray limitasyon ya resulta na sakit tan itatatken. Unona, kaukolan ya ipanengneng tayon papablien tayoy inar-aro tayon asawa anggano busy tayo. Nepeg tayon usaren ed sankaabigan iray taon na kaksilan tayo pian asikasoen iray inar-aro tayo. (Ecl. 9:9) Komadua, agtayo nepeg ya mapagpaga ed saray angkelag a bengatla; no ontan, ompan agtayo naimano so dakel a bendisyon ya aawaten tayod inagew-agew.​—Pro. 15:15.

No pawilen koy bilay mi ed sigpot-panaon ya serbisyo, talagan naliliknak ya benendisyonan kami nen Jehova ya mas ni nen say inilaloan mi. Pareho kami na liknaan na salmista ya angibaga: “Maabig so impideneng nen Jehova ed siak.”​—Sal. 116:7.

^ par. 32 Si sister Daniele Bockaert et inatey legan ya ipaparaan iyan artikulo. Sikatoy mantaon na 78.