Onlad karga

Onlad saray karga

Juan Bautista—Pakaaralan Tayo No Panon so Mansiansian Maliket

Juan Bautista—Pakaaralan Tayo No Panon so Mansiansian Maliket

KASIN walay labay mon niwala ed sika ya asainmin ed kongregasyon ya agmo nayarian ya gawaen natan? Nayarin sakey itan ya responsabilidad ya niiter ed arum. Odino sakey itan ya asainmin o pribilehyo ya datin walad sika. Balet lapud edad, ikakapuy na laman, irap na bilay, odino responsabilidad ed pamilya et limitado lay nagawaan mo natan. Odino nayarin lapud saray pananguman ed organisasyon et kaukolan mo lan ikbanan so sakey ya responsabilidad ya abayag mo lan aasikasoen. Antokaman so rason, ompan say pakaliknam et agmo nagagawaan iray labay mo komon ya gawaen diad panaglingkor mo ed Dios. Diad ontan iran situasyon, natural labat ya no maminsan et onkapuy so liknaan mo. Balet antoy makatulong pian nalabanan mo iray negatibon liknaan​—singa say pakadismaya, sakit na liknaan, odino ibarong? Antoy gawaen mo pian mansiansia kan maliket?

Makaaral tayod alimbawa nen Juan Bautista no panon tayon mansiansian maliket. Nanliketan nen Juan iray espisyal ya pribilehyo, balet nayarin duma so iilaloan to ya nagawa diad panlilingkor tod Jehova. Nayarin agto inilaloan ya mas andukey manayay panaon na pakapriso to nen say panaon ya inusar to ed ministeryo. Balet nansiansian maliket si Juan diad interon bilay to. Antoy akatulong ed sikato? Tan antoy gawaen tayo pian mansiansia tayon maliket anggano wala ray pakakadismayaan tayo?

SAKEY YA MAKAPALIKET YA ASAINMIN

Nen manga Abril na 29 C.E., inggapo nen Juan so asainmin to ya iparaan so dalan parad isabi na Mesias, ya ipupulong to: “Magbabawi kayo, ta asingger lay Panarian na tawen.” (Mat. 3:2; Luc. 1:12-17) Dakel so angawat ed mensahe to. Diad tua, amayamay so nanlapu ni ed ararawin lugar pian dengelen so mensahe to, tan dakel so apakiwas ya magbabawi tan manpabautismo. Makpel met ya pinasakbayan nen Juan iray mansimpisimpitan ya lider na relihyon ya ukomen ira na Dios no ag-ira manguman. (Mat. 3:5-12) Balet say sankaimportantian ya ginawa nen Juan diad ministeryo to et sanen binautismoan toy Jesus nen manga Oktubre 29 C.E. Manlapu lad saman, imbaga tod saray totoo ya tumboken day Jesus, say insipan ya Mesias.​—Juan 1:32-37.

 Lapud espisyal so pribilehyo nen Juan, nibaga nen Jesus: “Diad saramay inyanak na bibii et anggapo lay nagmaliw a babaleg nen say si Juan Bautista.” (Mat. 11:11) Seguradon nanliketan nen Juan iray bendisyon ya naawat to. Singa si Juan, dakel natan so akaawat met na saray bendisyon manlapud Dios. Imanoen so alimbawa na sakey a brother ya say ngaran to et Terry. Sikato tan say asawa to ya si Sandra et nanlingkor ya full-time diad masulok ya 50 taon. Imbaga nen Terry: “Dakel so naawat kon pribilehyo. Nanlingkor ak bilang payunir, Bethelite, espisyal payunir, manangasikaso na sirkito, manangasikaso na distrito, tan natan et manlilingkor ak lamet bilang espisyal payunir.” Talagan makapaliket so makaawat na saray pribilehyo, balet kaukolan so sagpot pian mansiansia tayon maliket no manguman so situasyon tayo, a singa nanengneng tayod alimbawa nen Juan.

MANSIANSIAN MAAPRESYA

Say sakey a rason no akin ya nansiansian maliket si Juan et lapud lanang ton aapresyaen iray pribilehyo to. Singa bilang, kayari na impanpabautismo nen Jesus, dinmaiset iray patumbok nen Juan balet dinmakel iray patumbok nen Jesus. Aburido iray disipulo nen Juan, kanian imbaga rad sikato: “Nengneng mo, sikatoy manbabautismo, tan amin et oonlad sikato.” (Juan 3:26) Inmebat si Juan: “Say kaiba na nobya et say nobyo. Balet say kaaro na nobyo, sano onalagey tan narengel toy nobyo, sikatoy malikeliket lapud boses to. Kanian agaylay liket ko la.” (Juan 3:29) Ag-akikompetensia si Juan ed si Jesus, tan agto inisip ya anggapoy kana na kimey to lapud mas baleg so kimey nen Jesus. Imbes, nansiansian maliket si Juan lapud pinabli to so betang to bilang “kaaro na nobyo.”

Lapud satan ya panmoria nen Juan, sikatoy nansiansian kontento anggano aliwan mainomay so asainmin to. Singa bilang, si Juan et sakey a Nazareo manlapu lad inkiyanak to, kanian agnayarin oninum na alak. (Luc. 1:15) “Si Juan et agmamangan tan ag-oniinum,” so kuan nen Jesus nipaakar ed simplin bilay nen Juan. Balet anggapoy ontan ya restriksion ed si Jesus tan saray disipulo to kanian mas normal so panagbilay da. (Mat. 11:18, 19) Ontan met, agbalot nanggawa na milagro si Juan, balet amta to ya naikdan na pakayari ya manggawa na milagro iray disipulo nen Jesus, tan arum ed saratan ya disipulo et datin papatumbok to. (Mat. 10:1; Juan 10:41) Imbes ya manpokus si Juan ed saratan ya pandumaan, sikatoy nansiansian maseseg ed mismon asainmin to ya nanlapud si Jehova.

No pablien tayo met so asainmin tayo natan, napansiansia tayoy liket tayo. Si Terry ya abitla niman et imbaga to: “Nampokus ak ed kada asainmin ya niiter ed siak.” No iisipen toy bilay to diad full-time ya panaglingkor, oniay nibaga to: “Anggapoy pagbabawian ko, say nanonotan ko labat et puro mararakep ya eksperiensya.”

Mas nalikna tayoy liket ed panaglingkor tayod Dios no dalepdepen tayo ya say talagan rason no akin ya espisyal so anggan anton asainmin o responsabilidad et say pribilehyo tayon magmaliw a ‘kakimeyan na Dios.’ (1 Cor. 3:9) No panon ya mansiansian masileng so sakey ya alahas no lanang tayon pupunasan itan, mansiansia tayon maliket no lanang tayon dadalepdepen so baleg ya kagalangan tayon mikimey ed Dios. Agtayo ikokompara iray agawaan tayo ed saray nagagawaan na arum. Agtayo nepeg ya isipen ya mas abeba so pribilehyo tayo nen say pribilehyo na arum.​—Gal. 6:4.

MANPOKUS ED SARAY ESPIRITUAL A BENGATLA

Nayarin amta met nen Juan ya agmanbayag so ministeryo to, balet nayarin agto inilaloan ya nasumpal itan ya tampol. (Juan 3:30) Nen 30 C.E., manga anemiran bulan kayarin binautismoan nen Juan si Jesus, impriso nen Arin Herodes si Juan. Balet ginawa nin siansia nen Juan so anggaay nayarian ton manpulong. (Mar. 6:17-20) Antoy akatulong ed sikato pian mansiansian maliket anggano anguman so situasyon to? Sikatoy nampokus ed saray espiritual a bengatla.

Legan ya walad prisoan si Juan, abalitaan to so onlalaknab ya ministeryo nen Jesus. (Mat. 11:2; Luc. 7:18) Kombinsido si Juan ya si Jesus so Mesias, balet ompan inisip to no panon ya sumpalen nen Jesus so amin ya ibabaga na Kasulatan ya gawaen na Mesias. Lapud amta to ya magmaliw ya ari so Mesias, kasin inisip to ya magano lan onggapo so panuley nen Jesus? Kasin lapud satan et  nibulos lay Juan ed prisoan? Labay to ya natalosan ya maong so pribilehyo nen Jesus, kanian angibaki na duaran disipulo to pian tepetan si Jesus: “Kasin sika imay aalagaren min onsabi odino wala ni sananey?” (Luc. 7:19) Kapawil da, seguradon madengedengel si Juan legan dan iistoryaen iray ginawa nen Jesus. Sikatoy nanggawa na saray milagro a singa say impanpaabig to ed saray mansasakit, insan to ra pinapawil pian ibalita da ed si Juan: “Makakanengneng la ray bulag, makakaakar la ray piley, nalilinisan la ray akating, makakarengel la ray telek, napapaoli la ray inaatey, tan nipapasabi lay maong a balita ed saray mairap-bilay.”​—Luc. 7:20-22.

Seguradon binmiskeg si Juan ed saman ya nadngel to. Paneknek iratan ya susumpalen nen Jesus iray propesiya nipaakar ed Mesias. Anggaman ag-imbulos nen Jesus si Juan diad prisoan, amta nen Juan ya aliwan andi-kakanaan so impanlingkor to. Anggano mairap so situasyon to, walay rason to pian mansiansian maliket.

No manpokus tayo ed saray maabig ya report nipaakar ed panagpulong diad interon mundo, makatulong itan pian mansiansia tayon maliket

Singa si Juan, no manpokus tayo ed saray espiritual a bengatla, makapansungdo itayo ya walaay anos tan liket. (Col. 1:9-11) Nagawaan tayo iya no basaen tan dalepdepen tayoy Biblia, ta satan so mangipanonot ed sikatayo ya aliwan andi-kakanaan so panlilingkor tayo ed Dios. (1 Cor. 15:58) Imbaga nen Sandra: “Akatulong so pambabasak na sakey a kapitulo ed Biblia kada agew pian lalo ak ya onapit ed si Jehova. Tinmulong itan pian manpokus ak ed sikato aliwan diad sarilik.” Sarag tayo met so manpokus ed saray report nipaakar ed gagawaen na saray agagi tayo parad Panarian tan ed saray gagawaen nen Jehova. Makatulong itan pian agtayo manpokus ed sarili tayon situasyon. “Akatulong iray binulan ya programa ed JW Broadcasting® pian nalikna mi ya maapit kami ed organisasyon,” so kuan nen Sandra, “tan akatulong met itan pian mansiansia kamin maliket ed asainmin mi.”

Sinumpal nen Juan Bautista so antikey ya ministeryo to, tan ginawaan to itan ya walad sikato so “biskeg tan pakayari a singa si Elias.” Singa si Elias, sikatoy “sakey a toon walaan na liknaan a singa sikatayo.” (Luc. 1:17; Sant. 5:17) No aligen tayoy impangapresya nen Juan ed asainmin to tan say impanpokus to ed espiritual iran bengatla, mansiansia tayo met ya maliket ed panlilingkor tayo parad Panarian, anggan antoy nagawa.