Onlad karga

Onlad saray karga

 INALAD DAAN IRAN KOLEKSION MI

No Panon ya Intanem Iray Unonan Bini na Panarian Diad Portugal

No Panon ya Intanem Iray Unonan Bini na Panarian Diad Portugal

LEGAN ya ombabasig iray daluyon na Atlantiko ed sakey a barko ya paonlad Europe, sakey ed saray pasahero ya si George Young, et maliket ton nononoten so bunga na Panarian ya intilak tod Brazil. * Balet, legan na pambiabiahe nen Brother Young, inteen to lay imano to ed balon asainmin to​—saray maawang ya teritorya na Spain tan Portugal ya agnin balot apulongan. No kasabi to diman, iilaloan ton niparaan to iray base ed Biblia ya paliwawa nen Brother J. F. Rutherford tan makapangibunog na 300,000 ya tract!

Binaliw nen George Young iray dayat diad dakel iran impanbiahe to pian manpulong

Kasabi nen Brother Young ed Lisbon nen 1925, anengneng ton magulo so kipapasen ditan. Lapud agawan rebolusyon ed bansa nen 1910, anampot so monarkiya tan kinmapuy so impluensya na Simbaan na Katoliko. Mas awalaan na kawayangan iray totoo, balet siansia nin magulo so kipapasen na bansa.

Nen niyuksoy la nen Brother Young so pampaliwawa nen Brother Rutherford, insan met impaakseb na gobierno so martial law lapud agawa lawarin kudeta. Pinasakbayan na sekretaryo na British and Foreign Bible Society si Brother Young ya seguradon dakel so onkontra ed sikato. Anggaman ontan, kinmerew si Brother Young na permit ya usaren so gymnasium na Camões Secondary School, tan inmabuloy irad kerew to!

Sinmabin siansia so Mayo 13​—say agew na pampaliwawa nen Brother Rutherford. Tatalaranan itan ya maong! Akasabit iray karatula ed saray bilding tan impakabat ed saray dyaryo so tema na publikon paliwawa ya “How to Live on the Earth Forever.” Tampol ya angi-publish iray relihyoson onsusumpa na sakey ya artikulo ed dyaryo da pian pasakbayan iray managbasa ed balon sabi kuno ya “palso iran propeta.” Diad puerta na gymnasium, saray onsusumpa et mangidederew met na nilibon brosyur ya say karga ton impormasyon et kontra ed saray bangat ya ipaliwawa nen Brother Rutherford.

Anggaman ontan, manga 2,000 ya totoo so akaloob, balet ontan met ya bilang so agla naabuloyan ya onloob lapud agla ra onduga. Wala ray interesadon ondengel ya binmibitin lad lubir diad gilig-gilig na gymnasium; say arum balet et tinmotoon lad saray gamit parad ehersisyo.

Balet aliwan amin ya agawa et balibali. Naningal-ingal iramay onsusumpa tan imbabasig da ray yurongan. Anggaman ontan, siansian agtinmakot si Brother Rutherford tan kalmado labat ya tinmoon ed lamisaan pian sikatoy narengel da. Kayari ton nampaliwawa​—manga pegley-labi lad saman—​masulok ya 1,200 ya interesado so angisulat na ngaran tan address da pian makaawat ira na literaturan base ed Biblia. Diad sinmublay ya agew, angi-publish so dyaryon O Século na sakey ya artikulo nipaakar ed paliwawa nen Brother Rutherford.

Nen Setyembre 1925, say edisyon na Say Panag-bantayan diad lenguahen Portuguese et inggapon im-publish diad Portugal. (Sayan edisyon et akauna  lan ni-publish ed Brazil.) Diad saman a panaon, si Virgílio Ferguson, sakey ya Estudyante na Biblia, et namplanon onalis ed Portugal pian ontulong ed kimey na Panarian ditan. Diad agano ni, akaiba toy Brother Young ya nanlingkor diad melag a sangan opisina na saray Estudyante na Biblia ed Brazil. Ag-abayag, nambiahe si Virgílio kaiba so asawa ton si Lizzie, pian ibaan lamet si Brother Young. Dugaruga so insabi nen Brother Ferguson ta asingger lan onalis si Brother Young ed arum a lugar ya pampulongan to, kaiba lay Soviet Union.

Residence permit nen Lizzie tan Virgílio Ferguson, 1928

Nen kontrolado la na militar so Portugal, linmoor so isusumpa ed kimey tayo. Balet nansiansian makpel si Brother Ferguson tan nanggawa na paraan pian naprotektaan so melag a grupo na saray Estudyante na Biblia tan pinabiskeg toy kimey da. Sikatoy kinmerew na permiso ya usaren so abung to parad saray regular a pantitipon. Nen Oktubre 1927, sikatoy naabuloyan ed satan ya kerew to.

Legan na unonan taon na diktatoryal, manga 450 totoo diad Portugal so regular a nan-subscribe na The Watch Tower. Ontan met, panamegley na saray tract tan bokleta, say katuaan et akasabi anggad diad ararawin pasen na Empiryo na Portugal​—Angola, say Azores, Cape Verde, East Timor, Goa, Madeira, tan Mozambique.

Nen 1929, si Manuel da Silva Jordão, sakey a mapaabeban hardinero ya Portuguese, et linma ed Lisbon. Nen manaayam ni ed Brazil, sikatoy akarengel na sakey a paliwawa nen Brother Young. Tampol ton abidbir so katuaan tan labalabay ton tulongan si Brother Ferguson pian napalaknab so panagpulong a kimey. Pian nagawaan nen Manuel itan, sikatoy ginmapon nanlingkor bilang colporteur, say tawag nensaman ed saray payunir. Lapud organisado lan maong so panag-imprinta tan panagbunog ed saray literaturan base ed Biblia, say balon kongregasyon ed Lisbon et maples ya inmaligwas!

Nen 1934, kaukolan ya ompawil ed Brazil si Brother tan Sister Ferguson. Anggaman ontan, say bini na katuaan et nitanem la ditan. Anggano magulo-gulo so kipapasen ed Europe lapud Spanish Civil War tan World War II, nansiansian mabiskeg so espiritualidad na matoor ya grupo na agagi diad Portugal. Diad gapo et singa labat ira angkelag a ngalab, balet sanen sinmabi so unonan misionero ya nanaral ed Gilead ya si John Cooke nen 1947, satan ya grupo et dinmalang, a singa panangibaga. Kayari to man, agla napatunday idarakel na bilang na saray manangiyabawag na Panarian. Anggano insebel na gobierno so kimey na saray Tasi nen Jehova nen 1962, nantultuloy so inyaligwas da. Nen Disyembre 1974, sanen legal lan binidbir na gobierno iray Tasi nen Jehova, wala lay masulok ya 13,000 a manangipalapag ed satan ya bansa.

Natan, masulok lan 50,000 ya manangipalapag na Panarian so mangipupulong na maong a balita na Panarian na Dios diad Portugal tan ed pigaran isla ya say lenguahe na totoo et Portuguese, kaiba la ray isla na Azores tan Madeira. Kaiba ed saratan ya manangipalapag natan iray komatlo lan henerasyon na arum ed saramay akaatendi ed agnalinglingwanan ya paliwawa nen Brother Rutherford nen 1925.

Misalsalamat kami ed si Jehova tan ed saramay matoor ya agagi nensaman a makpel ya angidaulo ed kimey a singa saray “lingkor nen Kristo Jesus a mangiyabawag na maong a balita na Dios ed saray nasyon.”​—Roma 15:15, 16.​—Inalad daan iran koleksion mi diad Portugal.

^ par. 3 Nengnengen so “Dakel ni Kaukolan ya Anien” diad Say Panag-bantayan, Mayo 15, 2014, p. 31-32.