Onlad karga

Onlad saray karga

 ISTORYAY BILAY

Agkon Balot Abuloyan ya Onlaylay Iray Limak

Agkon Balot Abuloyan ya Onlaylay Iray Limak

“DADDY,” “PAPA,” “UNCLE.” Ontan so naynay ya tawag ed siak na saray kabataan diad Bethel. Tan lapud 89 años ko la, labalabay ko iratan ya tawag dad siak. Ipapasen ko iratan ya balikas na panangaro da, tan sakey ed saray bendisyon nen Jehova diad impanlingkor kod sikato bilang full-time ed loob na 72 taon. Tan base ed saray eksperiensyak ed impanlingkor kod Dios, oniay nipasegurok ed sarayan kabataan, ‘Natumangan kayo ed gagawaen yo​—no agyo abuloyan ya onlaylay iray lima yo.’​—2 Awa. 15:7, paimanod leksab.

SARAY ATATENG KO TAN AGAGIK

Manlapud Ukraine et inmalis iray atateng ko ed Canada. Nanayam irad baley na Rossburn, diad probinsya na Manitoba. Awalaan na 8 lalaki tan 8 bibii ya ananak so maaron inak, anggapoy kambal​—siak so koma-14. Labalabay nen tatay ko so Biblia tan babasaen to itan kada Simba na kabuasan, balet parad sikato, say relihyon et negosyo labat tan naynay ton ilulurey, “Siopa kasi nambayar ed si Jesus diad impanpulong tan impanbangat to?”

Walora ed saray agagik​—apatiran lalaki tan apatiran bibii—​so angawat lanlamang ed katuaan. Say atsik ya si Rose et nampayunir anggad impatey to. Inusar toy sampot la ran agew na bilay to pian pasesegen so arum a totoo ya ondengel ed Salita na Dios, ya ibabaga ton, “Labay ta kan nanengneng ed balon mundo.” Diad gapo et ipupulong nen kuyak Ted so nipaakar ed impierno. Kada Simba na kabuasan et manpupulong diad radio, ya tataktakoten to ray ondedengel ed sikato, paulit-ulit ton ibabaga ya saray makasalanan et tuloytuloy ya napoolan diad agnaerep ya apoy na impierno. Balet sikatoy nagmaliw lanlamang ya matoor tan maseseg ya lingkor nen Jehova.

NO PANON YA GINMAPOY FULL-TIME YA PANAGLINGKOR KO

Sakey agew, nen Hunyo 1944, kasabik manlapud eskuelaan, walay anengneng kon bokleta ya The Coming World Regeneration * diad lamisaan mi. Binasak so unonan pahina, insan komadua, ya anggad agko la nitunda so pambabasak. Kayarik ya binasa so interon bokleta, akapandesisyon ak la​—labay kon panlingkoran si Jehova a singa ginawa nen Jesus.

Akin ya walad lamisaan mi iman ya bokleta? Imbaga nen kuyak ya si Steve a walay linmad abung mi ya duaran lalaki a “manlalako” na saray libro tan  bokleta. “Sinaliw ko ’tan,” so imbaga to, “ta limaran sentimos labat so bili to.” Pinmawil iramay lalaki diad tinmumbok ya Simba. Imbaga da ya Tasi nen Jehova ira tan uusaren day Biblia pian ebatan iray nayarin itepet na totoo. Agustoan mi iman, ta pinabaleg kami na atateng mi ya respetoen so Salita na Dios. Imbaga met na duaran lalaki ya walay asingger lan nagawan kombension na saray Tasi diad Winnipeg, say syudad ya panaayaman nen atsik Elsie. Nandesisyon ak ya onatendi.

Binisikletak so ngalngali 320 kilometro ya paonlad Winnipeg, balet sinmamar ak nid baley na Kelwood, ta ditan so panaayaman na saramay duaran Tasi ya binmisita ed abung mi. Legan ya wadman ak, akiaral ak tan naamtaan ko no anto ’tay kongregasyon. Atalosan ko met ya kada laki, bii, tan kabataan et kaukolan ya manbangat ed kaabungan, a singa ginawa nen Jesus.

Diad Winnipeg, akapannengneng kami nen kuyak Jack, ya nambiahe manlapud norte na Ontario pian onatendi ed kombension. Diad unonan agew na kombension, inyanunsio na sakey a brother ya walay nagawan panagbautismo. Nandesisyon kami nen kuyak Jack ya manpabautismo ed saman a kombension. Kayarin mismo na bautismo mi, determinado kamin dua ya manlingkor bilang regular payunir. Nampayunir si kuyak kayari na kombension. Lapud mantaon ak ni labat na 16 ed saman, kaukolan kon ituloy so panaaral ko, balet diad tinmumbok ya taon et nampayunir ak met la.

DAKEL IRAY NAARALAN KO

Ginmapo ak ya nampayunir diad Souris, sakey a baley ed probinsya na Manitoba, ditan et akaibak si Stan Nicolson. Anengneng ko ya aliwan lanang a mainomay so manpayunir. Anggaman daiset lay kuarta mi, intultuloy mi ni manpulong. Aminsan, kayari na sanagew ya impanpulong mi, sinmempet kamin anggapoy kuarta mi tan narnarasan kami la. Abigla kami ta diad puerta mi et walay baleg ya supot na naakan! Anggad natan et agmi amta no siopay angiyan diman. Diad saman ya labi et naknaksel kami. Talagan abendisyonan kami ta agmi inabuloyan ya onlaylay iray lima mi! Diad tua, say simbang ko ed sampot na saman a bulan so sankabelatan.

Kayari na pigaran bulan, inyasain kami diad baley na Gilbert Plains, ya say kaarawi to et manga 240 kilometro diad norte na Souris. Diad saman, kada kongregasyon et walay baleg ya chart diad arap, ya ditan et nanengneng so nagagawaan na kongregasyon ed lawak na kimeyan kada bulan. Nen inmabeba so agawaan ed sakey a bulan, nampaliwawa ak ed kongregasyon pian idanet ed saray agagi ya kaukolan da ni mansagpot a maong. Kayari aral, sakey a maedad lan sister a payunir, ya agmananisia so asawa to, so manak-akis ya angibagad siak, “Ginawak lan amin, balet anggad man labat so nayarian ko.” Kanian akaakis ak met, tan kinmerew ak na pasensia ed sikato.

Singa agawad siak, nayarin mainomay ya nalingo iray mabiskeg tan ugaw nin brother, insan ira nadismaya ed sarili da. Balet naaralan kod eksperiensyak ya imbes ya abuloyan kon onlaylay iray limak, mas maabig no makaaral ak ed saray lingok. Say panmatoor ed arum ni ran kimey et nabendisyonan.

SAY IMPILABAN ED QUEBEC

Baleg a pribilehyo so makapanaral ed koma-14 ya klase na Gilead School nen 21 so taon ko, nan-graduate ak nen Pebrero 1950! Manga kakapat ed saray kaklasek so imbaki ed mansasalita na French a probinsya na Quebec diad Canada, a ditan et papasegsegangen a maong iray Tasi lapud relihyon da. Inyasain ak diad Val-d’Or, sakey a baley na bansa ya panmiminaan na balitok. Aminsan, nampulong so grupo mi diad asingger a baryo na Val-Senneville. Tinaktakot kami na pari ditan, ya sakitan to kami kuno no agkamin tampol onalis. Insegep ko itan ed korte. Nanmulta so pari. *

Satan ya inkagawa tan dakel nin mipara et nagmaliw ya kabiangan na “Impilaban ed Quebec.” Say probinsya na Quebec et abayag ya kontrolado na Simbaan na Romano Katoliko diad masulok lan 300 taon. Pinairap na saray lider na relihyon tan politikon onsusuporta ed sikara iray Tasi nen Jehova. Mair-irap iman ya panaon, tan dagdaiset kami; balet agmi inabuloyan ya onlaylay iray lima mi.  Kinmiwas iray matuan totoo ed Quebec. Pribilehyok ya iyaralan iray pigaran indibidual ya angawat ed katuaan. Sakey ed sikara et pamilya ya walaan na samploran membro. Say interon pamilya et nanlingkor ed si Jehova. Lapud makpel ya alimbawa ra, apaseseg so arum a taynan so Simbaan na Katoliko. Tuloytuloy kamin nampulong tan agnambayag et analo kami ed laban!

IMPANGIPASAL ED SARAY AGAGI DIAD SARILI DAN LENGUAHE

Nen 1956, inyasain ak lamet diad Haiti. Maslak ed saray balon misionero et naiirapan ya manaral na French, balet dinmengel iray totoo. Imbaga na misionero ya si Stanley Boggus, “Mandinayew kami ta ginawa na totoo so amin ya nayarian da pian natulongan kamin nibalikas iray labay min ibaga.” Nen unaan, singa mas maong ak ni nen say arum ta akaaral ak lan mansalitay French diad Quebec. Balet agnambayag, naamtaan min maslak ed saray agagi diman et Haitian Creole labat so amta dan lenguahe. Kanian pian magmaliw kamin epektibon misionero, kaukolan min aralen so lenguahe da. Ontan so ginawa mi, tan abendisyonan so sagpot mi.

Pian mas natulongan mi iray agagi, inaprobaan na Governing Body ya ipatalos mi so The Watchtower tan arum nin publikasyon diad lenguahe ya Haitian Creole. Maples ya dinmakel so bilang na saray onaatendi ed aral diad interon bansa. Walay 99 ya manangipalapag ed Haiti nen 1950, balet dinmakel itan ya bilang anggad masulok ya 800 a manangipalapag nen 1960! Diad saman, tinawag ak ya manlingkor ed Bethel. Nen 1961, panliketan kon kaiba ak ed saray angikondukta na Kingdom Ministry School. Walay 40 ya elder na kongregasyon tan espisyal payunir ya impasal mi. Diad kombension nen Enero 1962, pinaseseg mi iray kualipikadon brother ditan ya palaknaben day ministeryo da, tan arum ed sikara et aturo bilang espisyal payunir. Nipanpanaon iya lapud linmoor so isusumpa.

Nen Enero 23, 1962, kayarin mismo na kombension, siak tan say misionero ya si Andrew D’Amico et inaresto diad sangan opisina, tan kinompiska da iray kopya na Awake! ya Enero 8, 1962 (diad French). Inaon na Awake! so report na saray dyaryo diad French ya walay nagagawan voodoo ed Haiti. Ag-itan agustoan na arum tan ibabaga dan sikami kunoy angisulat na satan ya artikulo diad branch.  Kalabas na pigaran simba, pinaalis iray misionero ed satan ya bansa. * Balet saray impasal ya agagi a taga ditan et nantultuloy labat. Natan, maliket ak lapud impansungdo ra tan ed tuloytuloy ya inyaligwas dad espiritual. Wala la natan ingen so Balon Mundo a Patalos na Masanton Kasulatan diad Haitian Creole​—ya dati et pipirawaten mi labat.

PANAGPAALAGEY DIAD CENTRAL AFRICAN REPUBLIC

Kayari na impanlingkor kod Haiti, inyasain ak bilang misionero diad Central African Republic. Insan naikdan ak na pribilehyon manlingkor ditan bilang ombiabiahen manangasikaso tan kayari to et bilang manangasikaso na branch.

Diad saman a panaon, dakel ya Kingdom Hall so simsimpli labat. Naaralan koy mantipon na dayami diad alog tan no panon a gawaen itan ya atep. Mankelaw iramay ondadalan ya makakanengneng ed siak ta paniirapan ko nin gawaen iya. Apaseseg met iray agagi ya lalon onsuporta ed panagpaalagey tan panagmintina na sarili dan Kingdom Hall. Babalawen kami na saray lider na relihyon ta say atep na saray simbaan da et yero, sikami balet et andi. Balet agkami adismaya, intultuloy mi labat ya usaren iray simplin Kingdom Hall ya gawad dayami so atep da. Tinmunda labat so panagbalaw da nen walay sinmabin maksil a bagyo diad manunan syudad ya Bangui. Intikyab na dagem so yeron atep na sakey a simbaan tan binmasileng diad karsada. Balet say atep na saray Kingdom Hall mi ya gawad dayami et nansiansia. Pian naasikason maong so kimey na Panarian ditan, angipaalagey kami na balon sangan opisina tan missionary home diad loob labat na limaran bulan. *

AWALAAN AK NA MASESEG YA KAPAREHA

Diad agew na kasal mi

Nen 1976, insebel so kimey na Panarian diad Central African Republic, tan inyasain ak diad N’Djamena, say capital na Chad. Balet say balibalin agawa ed saman et akabat koy Happy, sakey a maseseg ya espisyal payunir a nanlapud Cameroon. Nankasal kami nen Abril 1, 1978. Diad saman met ya bulan, agawa so civil war, tan singa ginawa na dakel et tinmakas kami paonlad abalaten na satan ya bansa. Nen asumpal so panlalaban, sinmempet kamid abung mi tan naamtaan min nagmaliw itan ya kampo na sakey ya armadon grupo. Aliwa labat ya saray literatura so abalang, noagta pati say kawes nen Happy ya insulong to nen kasal mi tan saray regalo mi. Balet agmi inabuloyan ya onlaylay iray lima mi. Kaiba mi nin siansiay sakey tan sakey tan nampokus kami ed saray sinmublay ya kimey mi.

Kalabas na manga duay taon, aliwa lan sebel so kimey diad Central African Republic. Pinmawil kami ditan tan nanlingkor ak bilang ombiabiahen manangasikaso. Say ayaman mi et sakey ya van, walay folding bed mi, sakey ya baleg a pananginan na danum ya mankarga na 200 litro, sakey ya refrigerator a papaandaren na gas, tan sakey ya panaglutoan. Mairap so panagbiahe. Aminsan ya nambiahe kami, tinmunda kami na ag-onkulang ed 117 beses lapud saray checkpoint.

Naynay ya onaabot ed 50 degrees Celsius so temperatura. Diad saray asemblea, no maminsan et mairap so mananap na danum parad bautismo. Kanian mankokotkot iray brother diad naekatan ya ilog tan sandaraiset dan titiponen so danum parad bautismo, ya maslak et diad baleg a panagkargaan na danum.

SAY KIMEY ED ARUM NIN BANSA DIAD AFRICA

Nen 1980, linma kamid Nigeria. Diad loob na duara tan kapalduan taon, tinmulong kami ditan ed panagparaan parad pangipaalagey na balon branch. Angaliw iray agagi na warehouse ya duaran grado a kaukolan ya bagbagen insan uloren ed pasen a pangipaalageyan. Sakey ya kabuasan, kinmalab ak ed atagey ya pasen na satan a bilding pian ontulong a manbagbag. Nen bandad ugto la, linmeksab ak ed datin dinalan ko. Balet lapud impanbagbag et wala ray nauman, anggapo la manaya may tinuonan ko​—kanian naplag ak. Abaloan mi et grabe kondisyon ko, balet kayari na impan-X-ray tan impan-eksamin ed siak, imbaga na doktor ed si Happy: “Agka mapaga. Sikatoy alitda labat, tan ayos la kayari na sakey simba odino onsulok ni.”

Akalugan kamid “publikon luluganan” paonlad asemblea

 Nen 1986, inmalis kamid Côte d’Ivoire, ditan et nanlingkor ak bilang ombiabiahen manangasikaso. Lapud satan ya kimey et makakasabi kami anggad Burkina Faso, tan agkon balot naisip ya kalabas na pigaran taon et ditan so panayaman mi diad antikey ya panaon.

Legan na panlilingkor ko bilang ombiabiahen manangasikaso et van so panaayaman mi

Inmalis ak ed Canada nen 1956, balet nen 2003, kayari na 47 taon et pinmawil ak ed Bethel diad Canada ya kaibak lay Happy. Diad papel et Canadian citizen kami, balet say pakalikna mi et taga kamid Africa.

Mangikokondukta ak na panangiyaral na Biblia diad Burkina Faso

Insan nen 2007, nen 79 lay taon ko, pinmawil kami lamet ed Africa! Inyasain kami ed Burkina Faso, ditan et nanlingkor ak bilang membro na Country Committee. Agnambayag, say opisina et ginawa lan remote translation office diad panangasikaso na Benin branch, tan nen Agosto 2013, inyasain kami ed Bethel diad Benin.

Kaibay Happy, nen manlilingkor kami diad Benin branch

Anggano limitado lay nagawaan ko, siansia nin inar-arok so ministeryo. Legan na apalabas ya taloy taon, diad tulong na saray elder tan maaron suporta na asawak, maliket ak ya nanengneng so duara ed saray iyaaralan koy Biblia, si Gédéon tan Frégis, ya nabautismoan. Natan et maseseg iran manlilingkor ed si Jehova.

Kaleganan na saman, inmalis kami nen asawak ed branch diad South Africa, ditan et maar-aron intarya na pamilyan Bethel iray pankaukolan ko parad bunigas na laman ko. Say South Africa so komapiton bansa diad Africa ya apribilehyoan ak a manlingkor. Insan nen Oktubre 2017, akaawat kami na nikadkaduman bendisyon. Akaatendi kami ed dedikasyon na world headquarters diad Warwick, New York. Talagan agmin balot nalingwanan iman ya okasyon!

Oniay ibabaga na 1994 Yearbook diad pahina 255: “Parad amin ya nansungdo parad kimey diad loob na dakel iran taon, papasesegen mi kayo: ‘Manpakpel kayo tan agyo aabuloyan ya onlaylay iray lima yo, ta natumangan kayo ed gagawaen yo.’​—2 Awa. 15:7.” Determinado kami nen Happy ya tumboken iyan bilin tan papasesegen mi so arum ya ontan met so gawaen da.

^ par. 9 Im-publish na Saray Tasi nen Jehova nen 1944 balet agla natan iyiimprinta.

^ par. 18 Nengnengen so artikulon “Quebec Priest Convicted for Attack on Jehovah’s Witnesses” diad Awake! na Nobyembre 8, 1953, p. 3-5.

^ par. 23 Saray detalye et nabasad 1994 Yearbook of Jehovah’s Witnesses, p. 148-150.

^ par. 26 Nengnengen so “Building on a Solid Foundation” diad Awake!, Mayo 8, 1966, p. 27.