Onlad karga

Onlad saray karga

 ISTORYAY BILAY

Sanaagin Madre a Nagmaliw ya Sanaagi ed Pananisia

Sanaagin Madre a Nagmaliw ya Sanaagi ed Pananisia

“AGMO ak la kakatongtongen,” kuan na yugtan kon si Araceli. “Agko la gabay so makarengel na nipaakar ed relihyon mo. Onsasawa ak la. Makapasyodot ka!” Anggano 91 ak la, natatandaan ko ni no panon kasakit iraman ya imbaga to. Balet ibabaga na Eclesiastes 7:8 ya “maong so sampot na sakey a bengatla nen say gapo to,” tan tua itan ed sikami.—Felisa.

Felisa: Deboton Katoliko so pamilya mi. Diad tua, 13 ed saray kakanayon mi so pari odino ordinadon Katoliko. Indeklara ni ingen nen Pope John Paul II a masanto so kapinsan nen nanay kon pari ya nambangat ed Katolikon eskuelaan. Simpli labat so bilay na pamilya mi. Si Tatay et managpanday, tan si Nanay et mankikimey ed alog. Walora kamin sanaagi tan siak so panguloan.

Nen 12 taon ko, agawa so Spanish Civil War. Kayari na guerra, apriso si Tatay. Ipapasoot to ray ideya to kanian binusol na gobiernon diktatorya. Nairapan si Nanay ya legpeten so pamilya mi kanian imbaga na kaaro to ya iyakar ed kombento ed Bilbao, Spain, so taloran agagik—si Araceli, Lauri, tan Ramoni. Anggan panon et ag-ira naerasan diman.

Araceli: Say edad mid saman et 14, 12, tan 10, kanian mair-irap so makapisian ed pamilya mi. Say trabaho mid Bilbao et managlinis. Kayari duay taon, inyalis kami na saray madre ed baleg a kombento diad Zaragoza ya mangaasikaso ed saray maedad la. Managlinis kami kusina tan makapakesaw iman ed saray tinedyer.

Felisa: Nen niyakar iray agagik ed Zaragoza, nandesisyon si Nanay tan say pangamaen kon pari ya mantrabaho ak met ed saman ya kombento. Ontan so inisip da pian niyarawi ak ed lakin onggugusto ed siak. Lapud relihyoso ak, labay koy manayam ed kombento anggan magano labat. Inagew-agew ak ya mimimisa, tan naisip ko met so magmaliw ya misionero ya singa samay kapinsan kon pari diad Africa.

Kawigi: Kombento ed Zaragoza, Spain; Kawanan: Nácar-Colunga ya Biblia

 Agak pinaseseg na saray madre ya manserbi ed Dios diad arum ya bansa, tan singa ak priso ed kombento. Kanian kayari sakey taon, sinmempet ak la pian asikasoen imay pangamaen kon pari. Likud ed kimey ed abung, nilabilabi ak met ya manrorosaryo ya kaiba to. Labalabay ko met so man-ayos na saray rosas ed simbaan tan ayosan iray imahen na birhen tan saray “santo.”

Araceli: Anguman so bilay mi diad kombento. Kayari na unonan vow ko ed panmadre, pinansisian kamin sanaagi na saray madre. Si Ramoni so atilak ed Zaragoza, si Lauri et inyakar ed Valencia, tan siak et diad Madrid, ya diman ko ginaway komaduan vow ko. Diad kombento ed Madrid et wala ray panaayaman na saray estudyante, maedad la, tan arum ya bisita, kanian dakel so kimey diman. Nantrabaho ak ed klinika na kombento.

Diad tua, iilaloan kon balibali bilay na madre. Labalabay ko lay manbasa na Biblia tan natalosan itan. Balet anggapoy mangibabagad siak na nipaakar ed Dios odino si Jesus, tan agkami manguusar na Biblia. Akaaral ak na daiset ya Latin, inaral koy bilay na saray “santo,” tan nandayew ak ed si Maria. Aman labat, insan puro la mair-irap ya trabaho.

Agak la maliket ed gagawaen ko, kanian akitongtong ak ed madre superyora. Imbagak ya singa no aliwan makatunongan ya pinasya so pantratrabahok pian nakuartaan so arum balet say pamilyak et agko natutulongan. Inkulong to ak ed sakey ya kuarto, agla pigan manguman so nonot ko tan agak la ontaynan ed kombento.

Amitlo ak ya imbulos na saray madre, pian suboken da labat no labay ko nin siansiay onalis. Lapud desidido ak, imbaga da ya oniay isulat kon rason ko, “Onalis ak la ta mas labay kon lingkoran si Satanas nen say Dios.” Abigla ak ed satan, tan anggano labalabay ko lay ontaynan, agko sarag ya isulat iratan. Tinepet ko no walay parin napankumpisalan ko, tan imbagak ed sikatoy agawa. Kinatongtong to so diocese ya ipawil to ak ed samay nanlapuan kon kombento ed Zaragoza. Kayari pigaran bulan diman, inabuloyan da ak lan onsempet. Ag-abayag, inmalis met la si Lauri tan Ramoni ed kombento.

PINANSISIAN KAMI NA “SEBEL” YA LIBRO

Felisa

Felisa: Asabi panaon, akiasawa ak tan nanayam kamid Cantabria. Naynay ak nin mimimisa, tan aminsan ya Simba, legan ya mansesermon so pari et walay makapabiglan inyanunsio to. Manpapasnok  tan inyeyag to, “Nengneng yo yan libro!” impanengneng toy libron The Truth That Leads to Eternal Life. Intuloy to, “No walay angiter ed sikayo na onian libro, iter yod siak odino ibantak yo!”

Anggapoy onman ya librok, balet labay koy nawalaan a tampol. Kalabas na pigaran agew, walay duaran bibii ya Tasi ya tinmoktok ed puerta mi tan inikdan da ak na “sebel” ya libro. Diad labi to man et binasak, insan nen pinmawil ira, inmabuloy ak ya iyaralan da ak na Biblia.

Say “sebel” ya libro

Tinmalos a tampol ed pusok so katuaan. Say datin inkadebotok ed relihyon ko et asalatan na aralem a panangarod si Jehova tan inkaseseg ed ministeryo. Abautismoan ak nen 1973. Anggano daiset so pankanawnawak ya ninabang so katuaan ed pamilyak, ginawak so anggaay nayarian kon inabang itan. Singa nibagak lad gapo, talagan agda labay iray papanisiaan ko, lalo lad si Araceli.

Araceli

Araceli: Lapud saray aliwan marakep ya naeksperiensyak ed kombento, adismaya ak a maong. Balet siansia nin mimimisa ak kada Simba, tan inagew-agew ak ya manrorosaryo. Pirpirawat ko nin siansia ya natalosan so Biblia, tan kinerew kod Dios ya tulongan to ak. Balet nen intongtong ed siak nen atsi Felisa so nipaakar ed balon pananisia to, kukkumbinsidod ibabaga to kanian inisip ko ya panatiko. Agak balot manisiad sikato.

Kayari pigaran taon, pinmawil ak ed Madrid pian mantrabaho tan akiasawa ak. Asabi panaon et manduaruwa ak lad relihyon. Naimanok ya saray totoon lanang ya mimimisa et agda lanlamang iyaaplika iray bangat na Ebanghelyo. Kanian tinmunda ak lan mimisa. Agak la manisia ed saray “santo,” panagkumpisal, odino ed impiernon apoy. Imbantak ko met lay amin ya imahen ko. Agko anta no dugay gagawaen ko. Adisdismaya ak, balet ipipikasik nin siansia ed Dios: “Labay ta kan nakabat. Tulongan mo ak!” Nanonotan ko ya aminpigan tinmoktok iray Tasi nen Jehova ed abung mi, balet agko ran balot nilukasan. Anggapo lay talek kod relihyon.

 Nen kagapo na dekada 1980, si Lauri tan Ramoni ya manaayam ed France tan Spain et manaaral met la na Biblia ed saray Tasi. Inisip ko ya nibalang met la ra ya singa si atsi Felisa. Ag-abayag, akabat koy Angelines ya kaabay mi, tan nagmaliw kamin sankaaro. Sikatoy Tasi nen Jehova met. Aminpigan ibabagad siak nen Angelines tan say asawa to ya iyaralan da ak na Biblia. Anengneng da ya anggano manduaruwa ak ed relihyon, labalabay koy makaaral ed Biblia. Akombinse da ak ya siansia tan imbagak: “Sige. Manaral ak basta say Bibliak so usaren,” say tutukoyen ko et say Nácar-Colunga ya patalos na Biblia.

PINANKAKASAKEY KAMIN SIANSIA NA BIBLIA

Felisa: Nen abautismoan ak nen 1973, manga 70 labat so Tasi diad syudad na Santander, say capital na probinsya na Cantabria, Spain. Maawa-awang so teritorya mi kanian onlulugan kamid bus insan kami lamet onlugan ed sananey ya luganan pian napulongan so interon probinsya. Oonla kamid kada baryo, anggad asumpal min aliber so nilasus a baryo.

Diad pigara lan taon, panliliketan koy ontulong ed dakel ya manaral na Biblia, tan 11 ed sikara so abautismoan la. Maslak ed sikara et Katoliko. Lapud dati ak ya deboton Katoliko, amtak ya kaukolan koy magmaliw ya maanos tan makatalos. Natatalosan ko ya kaukolan so panaon pian nataynan da ray abangonan da lan pananisia. Kaukolan met ya onsabid puso ra so bangat na Biblia tan masanton espiritu nen Jehova pian naamtaan da no anton talaga so katuaan. (Heb. 4:12) Say asawak ya si Bienvenido, a datin pulis, et abautismoan met nen 1979 tan si Nanay et ginmapon nanaral na Biblia antis ya ompatey.

Araceli: Nen ginmapo ak ya manaral na Biblia ed saray Tasi, agak ni manisia. Balet kalabas na pigaran simba, naimanok ya kalkalnan naandi so pakakadismayak. Say alabalabayan kod saray Tasi et gagawaen da no antoy ipupulong da. Asalatan na pananisia so panduaruwak, tan mas maliket ak. Anggan saray kakaabay mi et ibabaga da, “Araceli, itultuloy mo ’tay gagawaen mo!”

Natatandaan kon impikasik, “Salamat Jehova ta agka sinmawa ed siak tan inikdan mo ak na dakel ya pankanawnawan naromog koy aanapen ko—say tuan kakabatan ed Biblia.” Kinmerew ak na perdona ed si atsi Felisa lapud saray ansasakit ya imbagak ed sikato. Saray sangsangan mi et asalatan na maliket a pantotongtong nipaakar ed Biblia. Abautismoan ak nen 1989 diad edad ya 61.

Felisa: Natan et 91 ak la, abalo ak la tan makapuy lay laman ko, aliwan singa dati. Balet inagew-agew ak ya manbabasa na Biblia, mimiaral ak no sarag na laman ko, tan panliliketan koy mibiang ed ministeryo ed anggaay nayarian ko.

Araceli: Seguro kanian labalabay kon pulongan so amin ya pari tan madre ya nanaabet kod ministeryo ta dati ak ya madre. Dakel so nipapalimak ya publikasyon ed sikara tan balibali ray pantotongtong mi. Nanonotan kon imbagad siak na sakey ya pari kayari na aminpigan indalaw kod sikato: “Araceli, manisia ak ed sika, balet anto ni nagawaan ko ed sayan edad ko? Anto kasi ibaga na saray mimimisa tan say pamilyak?” Say ebat ko: “Anto met kasi ibaga na Dios?” Maer-ermen ya tinmanger, balet diad saman et anggapoy biskeg na liknaan ton ituloy ya usisaen so katuaan.

Say nanonotan kon makapaliket ya agawad bilay ko et nen unaan ya imbaga na asawak ya labay toy milad siak ya miaral. Anggano masulok to lan 80, manlapud saman et tuloytuloy lan akiaral. Nanaral na Biblia tan nagmaliw ya agbautismadon manangipalapag. Agko nalingwanan iray maliket ya panuulop min dua ed ministeryo. Balet ta duay bulan antis ya manpabautismo, sikatoy inatey.

Felisa: Sakey ed saray sankaliketan ed bilay ko et say impakanengneng kod taloran agagik, ya datin agmanisiad siak, a nagmaliw ya agagik ed espiritual. Malikeliket kami no pantotongtongan mi nipaakar ed maaron Dios, si Jehova, tan say Salita to! Sikami ran sanaagi et nankakasakey ya siansia ed pananisia. *

^ par. 29 Si Araceli (87), Felisa (91), tan Ramoni (83) et maseseg ya manlilingkor ed si Jehova anggad natan. Si Lauri et inatey nen 1990, ya matoor ed si Jehova.