Onlad karga

Onlad saray karga

 TEPET NA SARAY MANBABASA . . .

Nayari Kasin Man-Krismas Iray Kristiano?

Nayari Kasin Man-Krismas Iray Kristiano?

Manisia so minilyon ya totoo ed interon mundo ya say Krismas et selebrasyon na birthday nen Jesu-Kristo. Pero, naisip mo ta la no kasin nanselebra na Krismas iray Kristiano nen first century, saramay mismon kakaaro nen Jesus? Tan kasin antam no antoy ibabaga na Biblia tungkol ed birthday? No naamtaan moy ebat ed saratan ya tepet, natalosan mo no nayari kasin man-Krismas iray Kristiano.

Unona, anggapoy nabasa ed Biblia ya inselebra nen Jesus odino arum nin matoor a lingkor na Dios so birthday da. Diad Biblia, duara labat so nabasan nanselebra na birthday. Pareho ran agmandadayew ed si Jehova a Dios, tan parehon walay agawan mauges ed selebrasyon da. (Genesis 40:20; Marcos 6:21) Base ed Encyclopædia Britannica, saray inmuunan Kristiano et kontra irad “paganon kustombre na panselebray birthday.”

Antoy petsa na inkiyanak nen Jesus?

Anggapoy ibabaga na Biblia ya eksakton petsa na inkiyanak nen Jesus. “Say agew na inkiyanak na Kristo et agnaamtaan ed Balon Sipan odino, diad arum ni ran reperensya,” so kuan na McClintock and Strong’s Cyclopedia. No talagan labay nen Jesus ya selebraan na saray papatumbok to so birthday to, sinegurado to komon ya amta day petsa na inkiyanak to.

Komadua, anggapoy nabasa ed Biblia ya nanselebray Krismas si Jesus odino anggan sakey ed saray disipulo to. Inkuan na New Catholic Encyclopedia ya say panagselebra na Krismas et inmunan abitla “diad insulat nen Philocalus ya Chronograph, sakey ya Romanon almanac ya say reperensya to et nen 336 [C.E.] la.” Malinew ya diad satan et abayag lan akompletoy Biblia tan pigan lasus taon lay apalabas manlapud impanbilay nen Jesus diad dalin. Kanian, oniay komento na McClintock and Strong: “Say panselebra na Krismas et agnanlapud Dios, tan agmet itan nanlapud Balon Sipan.” *

Anton okasyon so ingganggan nen Jesus ya selebraan na saray disipulo to?

Lapud si Jesus so Sankamaongan ya Managbangat, malinew iray instruksion tod saray papatumbok to, tan akarekord iratan ed Biblia. Pero anggapoy instruksion to ya manselebra ira na Krismas. Say sakey ya teacher et agto labay ya onlampas iray estudyante ed inter ton instruksion. Ontan met ed si Jesus, agto labay ya saray papatumbok to et ‘onlampas ed saray bengatlan nisulat’ ed Masanton Kasulatan.​—1 Corinto 4:6.

Wala balet so sakey ya importantin okasyon ya sinelebraan na amin ya inmuunan Kristiano​—say pannodnonot, odino Memoryal, na impatey nen Jesus. Imbagan mismo nen Jesus ed saray disipulo to no kapigan tan no panon da itan ya nodnonoten. Sarayan espisipikon instruksion pati say eksakton petsa na impatey to et akarekord ed Biblia.​—Lucas 22:19; 1 Corinto 11:25.

On, say Krismas et selebrasyon na birthday, tan satan ya paganon kustombre et agsinelebraan na saray inmuunan Kristiano. Sakey ni, anggapoy nabasa ed Biblia ya nanselebray Krismas si Jesus o anggan siopa. Saratan so rason no akin ya manisia so minilyon ya Kristiano ed interon mundo ya agnayari ed sikara so Krismas.

^ par. 6 Parad kaaruman ya impormasyon tungkol ed nanlapuan na kaslakan ya tradisyon na Krismas, nengnengen so artikulon “Antoy Ibabaga na Biblia Tungkol ed Krismas?” ya available ed www.jw.org/pag.