Onlad karga

Onlad saray karga

Kaibak si Tabitha diad panagpulong

 UUMANEN NA BIBLIA SO BILAY

Parad Siak, Anggapoy Dios

Parad Siak, Anggapoy Dios
  • TAON NA INKIYANAK: 1974

  • BANSA: GERMAN DEMOCRATIC REPUBLIC

  • APALABAS: ATEISTA

ISTORYAY BILAY KO

Inyanak ak ed baley na Saxony, diad datin German Democratic Republic (GDR). Binmaleg ak ed maar-aron pamilya, tan imbangat ed siak na saray ateng ko iray maong ya ugali. Say gobierno na GDR et Komunista, kanian ag-importante so relihyon ed maslak ya totood Saxony. Tan parad siak, anggapoy Dios. Walay duaran bangat ya angimpluensya ed 18 ya taon na bilay ko: say ateismo tan Komunismo.

Akin et agustoan koy Komunismo? Ta labay ko ya patas so amin ya totoo. Sakey ni, manisia ak ya dapat et pantay-pantay so apag na dalin, pian anggapoy sobran mayaman tan anggapoy sobran mairap. Kanian akimembro ak ed sakey ya organisasyon na saray kabataan ya Komunista, tan aktibo ak ed satan. Nen 14 lay taon ko, nampokus ak ed sakey ya project ya man-recycle na basuran papel. Misalsalamat so baley na Aue ed saray sagpot ko kanian inikdan da ak na award. Anggano ugaw ak ni, akabat ko la ray sikat ya politiko na GDR. Pakaliknak et dugay gagawaen ko tan balibali pansumpalan ko.

Insan biglan aguloy mundok. Nen 1989, ageba so Berlin Wall tan binmagsak so Komunismo ed Eastern Europe. Abigbigla ak ed nantutumbokan ya agawa. Adiskobrek ya dakel manayay ag-inkahustisya ya nagagawad GDR. Singa bilang, saramay ag-onsusuporta ed Komunismo et ibabaliwala na gobierno. Akin et onman? Di ba say prinsipyo mi ran Komunista et dapat ya pantay-pantay so amin ya totoo? No ontan sirin, palpak so Komunismo? Aburido ak ya maong.

Kanian inuman koy prayuridad kod bilay tan nampokus ak ed musika tan panag-painting. Nanaral ak ed sakey ya music academy, tan posible ya makapanaral ak ed university kanian pinangarap koy magmaliw ya musician tan artist. Pero, imbaliwalak la iramay maong ya ugali ya naaralan ko nen ugaw ak. Say importante labat ed siak et man-enjoy, kanian pigapigaray girlfriend ko. Pero, agnin siansia linmemew so liknaan ko. Anggan diad saray painting ko et napatnagan so graben takot. Anto kasi nagawad arapen? Tan anto kasi gagala na bilay?

Nen nalmok ya siansiay ebat ed saratan ya tepet ko, abigbigla ak. Sakey ya labi diad academy, kaistoryaan ko  ray arum ya estudyante tungkol ed arapen. Sakey ed sikara si Mandy * ya Tasi nen Jehova. Balibali may kuan tod siak ed saman ya labi. “Andreas,” kuan to, “no labay mon naebatan iray tepet mo tungkol ed bilay tan arapen, aral mon maong so Biblia.”

Nen unona, talagan agak kombinsido, pero sinalik labat ya nengnengen so ibabaga na Biblia. Impanengneng ed siak nen Mandy so Daniel kapitulo 2, tan abigla ak ed abasak. Indeskribe ed satan ya propesiya so mantutumbokan ya pakayari na mundo, saray gobierno ya baleg so magmaliw ya epekto dad bilay tayo. Impanengneng ed siak nen Mandy so arum nin propesiya ed Biblia tungkol ed arapen. Sandaraiset kon naamtaan so ebat ed saray tepet ko! Pero siopay angisulat ed saraman ya propesiya, tan akin ya duga so prediksion ton nagawa ed arapen? Posible kasi ya wala manayay Dios?

NO PANON YA INUMAN NA BIBLIA SO BILAY KO

Inkabat ak nen Mandy ed sanasawan Tasi ya si Horst tan Angelika, tan tinulongan da ak ya mas natalosan so Salita na Dios. Anengneng kon tampol ya saray Tasi nen Jehova labat so relihyon ya naynay ya manguusar tan mangipapaimano ed personal ya ngaran na Dios, ya Jehova. (Salmo 83:18; Mateo 6:9) Naaralan ko ya wala manayay ilalon ipaparaan nen Jehova a Dios parad totoo​—say pambilay ya tuloytuloy ed paraiso ya dalin. Ibabaga na Salmo 37:9: “Saramay maniilalo ed si Jehova et tawiren day dalin.” Agusgustoan ko itan ya ilalo ta para itan ed amin ya totoon manguunor ed saray estandarte na Dios ya walad Biblia.

Pero nairapan ak ya manguman pian naunor koy ibabaga na Biblia. Nagmaliw ak ya mayabang lapud sinmikat ak bilang musician tan artist, kanian kaukolan kon araley manpaabeba. Sakey ni, aliwan mainomay parad siak ya itunda so imoral ya kabibilay ko. Misalsalamat ak ed si Jehova ta maan-anos, mapangasi, tan tatalosan to iramay gagawaen day anggaay nayarian dan unoren so ibabangat na Biblia!

Say Komunismo tan ateismo so angimpluensya ed 18 ya taon na bilay ko, pero kayari na satan, say Biblia la so mangigigiyad bilay ko. Lapud saray naaralan kod Biblia, agak la aburido ed arapen tan wala lay direksion na bilay ko. Nen 1993, abautismoan ak ya Tasi nen Jehova, tan nen 2000, nankasal kami nen Tabitha, sakey met ya makulikulin Tasi. Dakel ya oras so uusaren mi anggad posible pian tulongan so arum ya aralen so ibabagay Biblia. Amayamay so nakakabat mi ya naimpluensyaan met na Komunismo tan ateismo ya singa siak. Malikeliket ak no ipapanengneng kod sikara no panon dan nakabat si Jehova.

MARAKEP IRAN RESULTA

Nen ginmapo ak lan manpaiyaral na Biblia ed saray Tasi nen Jehova, aburidon maong iray atateng ko. Pero manlapu lad saman, anengneng da ray balibalin epekto ed siak na pipiulop kod saray Tasi. Malikeliket ak ta natan et manbabasa la ra na Biblia tan onaatendi la rad saray Kristianon pantitipon na saray Tasi nen Jehova.

Maliket so ulopan mi nen Tabitha lapud pansasagpotan min unoren iray bilin na Biblia ed saray sanasawa. Singa bilang, lapud uunoren mi so bilin ya manmatoor ed sakey tan sakey, lalon oneelet so relasyon mi.​—Hebreo 13:4.

Agak la natan natatakot tan aburido ed arapen. Naliliknak ya membro ak na mareen tan nankakasakey ya pamilya na saray Tasi nen Jehova ed interon mundo. Diad sayan pamilya et pantay-pantay so trato mi ed sakey tan sakey. Atan imay papanisiaan ko tan labalabay kon nagawa manlapu la nensaman.

^ par. 12 Sinalatan so ngaran.