Onlad karga

Onlad saray karga

 MANUNAN ARTIKULO | INER SO PAKAROMOGAN MOY TULONG?

Kaukolan Tayon Amin so Tulong

Kaukolan Tayon Amin so Tulong

Asalim so nipatapba nen ugaw ka ni? Ompan asugat so limam o agasgas so pueg mo. Nanonotan mo no panon kan tinulongan nen nanay mo? Seguro nilinisan toy sugat mo insan to binerberan. Manakis ka, pero nen kinuyong tan nilakap to ka, agla ansakit. Nen ugaw ka ni, singa matmainomay ya solusyonan so problema awa?

Balet legan tayon ontatatken, magmamaliw ya mas komplikadoy bilay. Mas baleg iray problema tan mairap so makaromog na tulong. Makapaermen ya no matatken tayo la, saray problema tayo et agbasta nasolusyonan na lakap tan pankuyong na nanay. Nia ray pigaran alimbawa.

  • Asalim lay nakal ed trabaho? Imbaga nen Julian ya nen nakal ed trabaho, abigla tan naaburidon maong. ‘Panon kon bilayen so pamilyak ey?’ so naisip to. ‘Anta pigay taon ak ya makulikulin nantrabaho, akin et biglan anggapo lay kanak ed kompanya?’

  • Nayarin asakisakitan ka lapud nansian kayo nen asawam. “Nen bigla ak ya tinaynan nen asawak 18 bulan lay apalabas, agaylay ermen ko. Singa asugat so pusok,” kuan nen Raquel. “Asakisakitay liknaan ko tan naapektoan pati laman ko. Agko amtay gawaen ko.”

  • Ompan walay graben sakit mo ya singa ag-onaabig. Nayarin no maminsan et naliliknam imay alikna nen Job, ya maer-ermen ton imbaga: “Kabusol koy bilay ko; agko la labay so manbilay.” (Job 7:16) Ompan parehoy naliliknam ed si Luis ya mantaon na 80, ya inamin to, “No maminsan singa aalagaren ko labat lay ipatey ko.”

  • Odino kasin walay inatey ya inad-arom ed bilay kanian labay moy naligliwa? “Nen inatey so ana’ko lapud nan-crash so eroplanon niluganan to, diad gapo et agak makapanisia,” kuan nen Robert. “Insan ko aliknay sakit, amay sakit ya inkompara na Biblia ed andukey ya espadan dinmuyok ed sika.”​—Lucas 2:35.

Si Robert, Luis, Raquel, tan Julian et walay aromog dan tulong kanian nainawaan ira, anggano mair-irap so situasyon da. Nalmo day sankaabigan ya makatulong ed sikara​—anggapoy arum noag say Makapanyarin-amin a Dios. Panon to itayon tutulongan? Kasin iter to met so kaukolan mon tulong?