Onlad karga

Onlad saray karga

 ALIGEN SO PANANISIA RA | DAVID

“Kien nen Jehova so Panlalaban”

“Kien nen Jehova so Panlalaban”

NGALNGALI natumbay David legan ton nasasabat iray sundalon manuunaan ya ombatik. Manputi busaleg da. Akin et agaylay takot da? Paulit-ulit ya narerengel nen David so sakey ya ngaran a bibitlaen da diad pannerbiyos da​—amay ngaran na kalaban. Sikatoy malaslastog ya akaalagey ed lawak, tan nayarin aya lay sankabalegan ya toon anengneng nen David.

Si Goliat! Amta la nen David no akin ya natatakot iray sundalo, ta balbaleg, higante! Anggan ag-ipila so kabelat na samben ya sulong to, sikatoy mas ambelat ni nen say duaran angkabaleg a too. Kompletoy armas to, mabisbiskeg, tan apasal lan milaban. Sikatoy manaangat tan oneeyag. Seguradon sankarengel diad lawak so maksil tan malungog ya boses to legan ton kakantiawan iray sundalo na Israel tan say ari dan si Saul. Labay ton nasumpal la yan laban, kanian manhahamon na makpel ya milaban ed sikato, ya sikaran dua labat!​—1 Samuel 17:4-10.

Pinmayakot iray Israelita, anggan si Arin Saul. Naamtaan nen David ya masulok la manayan sakey bulan ya oniay situasyon! Anggapoy nagagawan panlalaban ed saray sundalon Filisteo tan sundalon Israelita, tan inagew-agew a mangakantiaw si Goliat. Agaylay syodot nen David. Ibabaingan toy ari tan sundalo na Israel, kaiba iray taloran kuya to, ta mankebet irad takot! Parad si David, aliwan saray sundalo na Israel labat so iinsultoen na sayan Goliat, noagta pati si Jehova a Dios na Israel! Balet antoy nagawaan nen David anta ugaw ni? Antoy naaralan tayo ed pananisia to?​—1 Samuel 17:11-14.

“LANAAN MO, TA SIKATO SO PINILIK!”

Pawilen tayo pa may agawa dakel ya bulan antis to ’ya. Mansirunget lad saman balet papastolan ni nen David iray karnero nen ama to diad saray kapukdolan ya asingger ed Betlehem. Tinedyer ni labat si David, guap-guapo, ambalbalangay laman to, tan balibali mata to. Hilig toy mantogtog na arpa no bukbukor to. Panamegley na kansion et idadayew toy Dios lapud mararakep iran palsa To, tan mas ondudunong ed panagtogtog to ta lanang ya manprapraktis. Balet diad saman ya labi et impatawag nen ama to. Kaukolan toy onsempet ya tampol.​—1 Samuel 16:12.

Kasabi tod abung da, anengneng ton walay masiken ya katongtong nen ama ton si Jesse. Si Samuel iman, say matoor ya propeta. Sikatoy imbaki nen Jehova ya lanaan so sakey ed saray anak nen Jesse pian onsublay ya ari ed Israel! Anengneng la nen Samuel so pitoran kuya nen David, balet imbaga nen Jehova ed sikato ya anggapod sikara so pinili to. Kasabi balet nen David, imbaga nen Jehova ed si Samuel: “Lanaan mo, ta sikato so pinilik!” Diad arapan na amin ya kuya nen David et nilukasan nen Samuel so saklor a pananginay espisyal a larak tan nilarakan toy ulo nen David. Kayari to man, anguma-uman so bilay nen David. Ibabaga na Biblia: “Manlapud saman ya agew, pinabiskeg na espiritu nen Jehova si David.”​—1 Samuel 16:1, 5-13.

Imbaga nen David ya apatey to ray masisibeg ya ayep lapud tulong nen Jehova

Kasin inambisyon ya tampol nen David so man-ari? Andi, maanos ton inalagar ya ipaamta na espiritu nen Jehova no kapigan so igapo to ed sayan  ambelat ya responsabilidad. Legan ya manaalagar, intuloy to labat so kimey ya panagpastol. Sineryoso to itan ya kimey. Tan kaukolan toy manpakpel, ta aminsan et walay leon ya inmataki ed pulok nen ama to tan aningkat na karnero, insan diad pidua et sakey ya oso. Agto ra labat inabol pian arawian da ray karnero, noagta inusilan tan nilabanan to ra pian isalba so pakaskasin karnero nen ama to. Pinatey ton bukor iyan duaran masisibeg ya ayep!​—1 Samuel 17:34-36; Isaias 31:4.

Kalabas na panaon, impatawag nen Arin Saul si David ta abalitaan ton marunong ya mantogtog. Anggano maong nin milaban si Saul, anggapo lad sikato so pabor nen Jehova lapud agto inunor so instruksion na Dios. Inekal la nen Jehova so espiritu to ed si Saul, kanian aliwliwa lay ugali to—misasanok, masuspetsa, tan bayolenti. Kada no onia lay ugali nen Saul, say mamakalma ed sikato et say balibalin togtog. Naamtaan na arum ya lingkor nen Saul ya aliwa labat a marunong ya mantogtog si David noagta maong met ya milaban. Kanian impatawag nen Saul si David, tan ginawa ton managtogtog tan manag-awit na armas to.​—1 Samuel 15:26-29; 16:14-23.

Dakel so naaralan na saray kabataan ed pananisia nen David. Inusar toy arum ya panaon to ed saray kimey ya lalon amaapit na relasyon tod si Jehova. Tan maanos ya nanaral na saray dunong ya amta ton mausa-usar kanian mainomay ya akalmoy trabaho. Balet say sankaimportantian, nampaigiya ed espiritu nen Jehova. Makaaral tayon amin ed balibalin alimbawa to!​—Eclesiastes 12:1.

‘ANGGAPO KOMOY ONTALAW ED SAYAN FILISTEO’

Legan ya manlilingkor si David ed si Saul, mabetbet met ya onsesempet ed abung da pian manpastol na karnero, tan no maminsan et manbayag ditan. Aminsan, legan ton manpapastol, imbaki nen Jesse si David pian kumustaen so taloran kuya to ya kaiba ed saray sundalo nen Saul. Lapud maunor si David, nila to ray kuya to diad Lawak na Elah ya inyawitan to ra na abasto. Kasabi tod man, adismaya nen anengneng ton anggapoy nagagawan panlalaban a singa adeskribe ed gapo na sayan artikulo. Wadman labat iray sundalo ed palandey, diad biek tan biek na maawang ya lawak.​—1 Samuel 17:1-3, 15-19.

Ag-iya nitepel nen David. Akin ya saray sundalo na mabilay a Dios a Jehova et natatakot ed sakey a toon mandadayew ed palson dios? Parad si David, si Jehova so mismon iinsultoen nen Goliat. Kanian, kinatongtong to ray sundalo ya kaukolan ya natalo si Goliat. Nadngel nen Eliab ya panguloan a kuya nen David so ibabaga to. Kanian nampasnokan toy agi to, ya pinalsaan ton linma labat diman pian man-osyoso tan nengnengen so panlalaban. Balet say kuan nen David: “Anto la lamet so ginawak? Mantetepet ak met labat.” Insan la linmad arum ya sundalo tan imbaga to lamet ya nepeg ya natalo si Goliat, anggad akasabi itan ed si Saul. Kanian impatawag na ari si David.​—1 Samuel 17:23-31.

Oniay imbaga nen David ed ari pian ag-ontakot ed si Goliat: “Anggapo komoy anggan sakey ya ontalaw so puso to ed sayan Filisteo.” Talagan tinmalaw si Saul tan saray sundalo to ed si Goliat. Seguro  inkompara day sarili da ed sayan balbaleg a too, ya inisip dan angga ra labat ed awak odino pagew to. Inisip da ya matmainomay to ran taloen. Balet aliwan ontan so inisip nen David. Parad sikato et mainomay ya taloen si Goliat. Kanian imbaga to ya sikato lan mismo so milaban.​—1 Samuel 17:32.

Agpinmayag si Saul. Kuan to: “Agmo sarag a labanan iyan Filisteo, ta ugaw ka ni, tan sikatoy sundalo la manlapud inkaugaw to.” Talaga kasin ugaw ni David? Andi, balet sikatoy ugaw ni pian mansundalo, tan nayarin ugaw nin nengnengen. Anggaman ontan, kabkabat lay David ya makpel tan mabiskeg ya milaban, tan ompan magano met lan man-20 ed saman.​—1 Samuel 16:18; 17:33.

Pian agmanpaga si Saul, inistorya nen David imay impamatey tod leon tan oso. Kasin manlalastog? Andi. Amta nen David no akin ya apatey to iratan ya ayep. Imbaga to: “Si Jehova, ya angiliktar ed siak ed leon tan oso, so mangiliktar ed siak ed lima na sayan Filisteo.” Akombinsin siansia si Saul, kanian imbaga to: “La ka, tan komon ta walad sika si Jehova.”​—1 Samuel 17:37.

Labay mon aligey pananisia nen David? Imanom ya say pananisia to et aliwan base ed ilusyon. Walay pananisia to ta kabkabat toy Dios tan naeksperiensya ton mismo so tulong to. Amta to ya maaron proprotektaan nen Jehova iray lingkor to tan totooren to ray impromisa to. No labay tayon ontan so pananisia tayo, kaukolan ya tuloytuloy tayon kabaten so Dios. Tan no manbilay tayo base ed satan ya kakabatan, maabig so pansumpalan tayo tan ombiskeg met so pananisia tayo.​—Hebreo 11:1.

“IYAWAT KA NEN JEHOVA ED LIMAK”

Nen unona et impaisulong nen Saul ed si David so samben tod pagew. Singa ontan imay akasulong ed si Goliat, ya gawad nantatapewan ya gansa a singa siksik. Balet nen sinali nen David so onakar ya akasulong ed sikato so balbaleg tan ambelbelat a samben, nairapan. Aliwan sundalo kanian ag-apasal ya mangisulong ed satan, lalo la may isusulong nen Saul, say sankatageyan ya laki ed Israel! (1 Samuel 9:2) Kanian inekal to tan mas pinili to imay apasalan to lan isulong tan saramay uusaren ton pamprotekta ed saray karnero to no manpapastol.​—1 Samuel 17:38-40.

Say inawit labat nen David et baston, pananginan na bato, tan palsot. No nengnengen, singa anggapoy kana na palsot, balet diad tua et makapatey itan. Saya et gawad duaran lubir ya katat a walay inkawing ya pangibalaan na bato. Mausa-usar itan ed sakey ya pastol. Balaan to itan na bato, mapmaples ton iwasiwes, insan to ikbanan so sakey ya lubir, kanian onkena so bato ed labay ton tiraen. Mausa-usar iyan armas anggan diad guerra, kanian wala ray grupo na sundalo nensaman ya say armas da et palsot.

Natan ta akaparaan lay David, nila ton tampol so kalaban. Seguro agaylay pampipikasi to legan ya wadman ed lawak ya mandodokdok na limaran angkelag tan makikinis ya bato diad inmekat ya kulos. Insan la linma pian milaban, ya agnanakar noagta manbattik!

Anto kasi reaksion nen Goliat nen anengneng toy milaban ed sikato? Say kuan na Biblia: “Binalawbalaw to lapud sikatoy sakey labat ya ugaw ya ambalangay baog tan guapo.” Insan to inyeyag: “Sakey ak ta’n aso, kanian inmarap kad siak a walaan na bislak?” Anengneng toy baston nen David balet agto naimano ya walay palsot to. Insamba toy David diad ngaran na dirios na saray Filisteo tan imbaga ton ipakan toy laman na sayan anggapoy kuentan kalaban ed saray manok tan ayayep.​—1 Samuel 17:41-44.

Nanengneng tayod ebat nen David ya talagan mabisbiskeg so pananisia to. Imadyin yo pa iyan kabataan ya iyeeyag tod si Goliat: “Onarap kad siak a walaay espada tan gayang tan jabelin, balet onarap ak ed sika diad ngaran nen Jehova na saray armada, say Dios na saray sundalo na Israel, a kinantiawan mo.” Amta nen David ya anggapoy kana na armas tan biskeg na too. Agnirespeto nen Goliat si Jehova a Dios, kanian si Jehova so ombales ed sikato. Singa imbaga nen David, “kien nen Jehova so panlalaban.”​—1 Samuel 17:45-47.

Siempre, sankanengneng nen David ya balbaleg si Goliat tan kompletoy armas to, balet ag-ataktakot. Aliwan singa si Saul tan saray sundalo to,  ag-inkompara nen David so sarili to ed si Goliat. Imbes, inkompara toy Goliat ed si Jehova. No ikomparad arum ya too, talagan balbaleg si Goliat ta manga 9 feet tan 6 inches (2.9 metro) so katagey to, balet panon to no ikompara la ed Sankatagyan ed uniberso? Anggapoy pidumaan tod arum a too. Parad si Jehova, si Goliat et singa labat bigis ya matmainomay ya tiplaken!

Batik si David paarap ed kalaban to, tan angaot na sakey a bato. Imbala tod palsot tan inwasiwes tod tagey na ulo to anggad narerengel lay panngisiw na lubir. Inmasingger met si Goliat, a nayarin walad benegan na manag-awit na samper to. Lapud atagtagey si Goliat tan normal labat so katagey na manag-awit na samper to, agto naprotektaan so ulo na sayan higante. Tan atan so pinuntirya nen David.​—1 Samuel 17:41.

Amta nen David ya anggan say higante et melmelanting no ikomparad si Jehova a Dios

Impalsot nen David so bato. Marendeen so amin, ya tatalaranan da no iner so kenaan to. Sinegurado nen Jehova ya maminsan labat ya tiraen nen David so kalaban. Nakna ed moling si Goliat tan kinmutep so bato. Kanian nipasubsob ed dalin so higante! Ataktakot imay manag-awit na samper to kanian batik. Dinmagoy David tan inuyos toy espada nen Goliat, insan to pinutotay ulo so higante.—1 Samuel 17:48-51.

Diad saman et sinmibeg si Saul tan saray sundalo to. Inmeyag ira tan inusilan da ray Filisteo. Agawa imay imbaga nen David ed si Goliat: ‘Iyawat to kayon amin nen Jehova ed lima mi.’—1 Samuel 17:47, 52, 53.

Saray lingkor na Dios natan et agla migi-guerra. Nensaman labat man. (Mateo 26:52) Balet siansia ni ya kaukolan tayon aligen so pananisia nen David. Singa sikato, kaukolan ya tua ed sikatayo si Jehova, tan sikato labat so Dios ya nepeg tayon lingkoran tan igalang. No maminsan, iisipen tayon agtayo sarag iray angkakabaleg ya problema tayo, balet diad tua et melmelag iratan no ikomparad abalbaleg ya pakayari nen Jehova. No say Dios tayo et si Jehova tan mabiskeg so pananisia tayod sikato a singa si David, agtayo takotan so anggan anton subok o problema. Anggapo tay agsarag ya taloen nen Jehova!