Onlad karga

Onlad saray karga

 MANUNAN ARTIKULO | SAY BIBLIA​—AKIN ET NIPRESERBA?

No Akin ya Nipreserba so Biblia

No Akin ya Nipreserba so Biblia

Nipreserba so Biblia kanian sarag moy makaala na kopya pian nabasa itan. Tan no say Bibliam et susto so inkipatalos to, segurado kan say babasaen mo et mipara ed orihinal ya sulsulat. * Balet akin et nipreserba so Biblia anta midederal so angisulatan, dakel so onkokontra, tan dakel so malabay ya umanen so mensahe to? Akin et nikadkaduma iyan libro tan makapakelkelaw ya nipreserba so mensahe to?

“Kombinsido ak la natan ya say Biblia ya walad siak et regalo na Dios”

Say nibaga na dakel ya manaaral na Biblia et parehod samay imbaga nen apostol Pablo ya, “Say interon Kasulatan et impuyan na Dios.” (2 Timoteo 3:16) Manisia ran nipreserba so Biblia lapud Salita itan na Dios tan lapud labay na Dios ya makasabi itan ed sikatayo natan. Si Faizal ya abitla ed unonan artikulo na sayan magasin et nandesisyon ya aralen so Biblia. Abigbigla ed adiskobre to. Naamtaan to ya anggapod Biblia so dakel ed saray bangat na Kakristianoan. Sakey ni, agustoan toy naaralan tod Biblia nipaakar ed labay na Dios ya nagawad dalin.

“Kombinsido ak la natan ya say Biblia ya walad siak et regalo na Dios. No sarag na Dios ya gawaen so interon uniberso, di sarasarag ton ipreserba so sakey ya libron parad sikatayo. Ta no ibagak ya andi, di singak ibabagan walay limitasyon na pakapanyari na Dios. Tan siopa ak pian limitaan so Makapanyarin-amin ya Dios?” so kuan nen Faizal.—Isaias 40:8.

^ par. 3 Nengnengen so artikulon “How Can You Choose a Good Bible Translation?” diad May 1, 2008 ya isyu na The Watchtower.