Onlad karga

Onlad saray karga

 INTERBYU | FAN YU

Impaliwawa na Software Designer so Pananisia To

Impaliwawa na Software Designer so Pananisia To

SI Dr. Fan Yu et nantrabaho bilang research mathematician diad China Institute of Atomic Energy, asingger ed Beijing. Sikatoy ateista ni ed saman tan manisia ed teorya na ebolusyon. Balet manisia la natan si Dr. Yu ya say bilay et denisinyo tan pinalsa na Dios. Sikatoy ininterbyu na Onliing! tungkol ed pananisia to.

Mangibaga kayo pay pigaran impormasyon tungkol ed sikayo.

Nianak ak nen 1959 diad Fuzhou City, Jiangxi Province, China. Nen waloy taon ko, agawad bansa mi imay tatawagen natan ya Cultural Revolution. Si tatay ko et civil engineer, tan imbaki na gobierno ya manggaway riles na tren diad arawrawin lugar. Abayag ya maminsan labat ed sakey taon so pakasempet tod abung mi. Kanian say kaibak ed abung et si nanay ko ya elementary school teacher. Say panaayaman mi et diad mismon eskuelaan ya pambabangatan to. Nen 1970, apilitan kamin inmalis ed Liufang, ya diad saman et sakey ya mair-irap ya lugar diad Linchuan District. Daiset so naakan ed satan ya lugar.

Antoy papanisiaan na pamilya yo?

Ag-interesado si tatay ed relihyon o politika. Buddhist si nanay ko. Diad eskuelaan, imbangat dad sikami ya say bilay et nan-evolved panamegley na natural iran proseso, tan anisia ak ed imbangat na saray teacher mi.

Akin et mathematics so pinili yon kurso?

Labalabay koy mathematics ta kaibad satan so pananap na ebat panamegley na logic. Nanaral ak ed university nen 1976, ag-abayag kayari na impatey na lider na revolution ya si Mao Tse-tung. Mathematics so pinilik ya major. Kayarik ya angalay master’s degree, say unaan ya trabahok et tungkol ed mathematical research parad pandesinyo na nuclear reactor.

Antoy unaan ya impresyon yod Biblia?

Nen 1987, linma ak ed United States pian mangalay doctorate studies ed Texas A&M University. Amtak ya diad America, dakel so totoon manisia ed Dios tan manbabasa na Biblia. Naamtaan ko met ya dakel so praktikal ya prinsipyon walad Biblia, kanian inisip ko ya dapat nabasak met.

 Apatunayan ko ya praktikal iray bangat na Biblia. Balet wala ray agko natalosan kanian intundak ya basaen.

Akin et naisip yon basaen lamet so Biblia ey?

Balo ed siak so ideyan walay Amalsa kanian nandesisyon ak ya i-research itan

Nen 1990, walay Tasi nen Jehova ya apulongan to ak diad abung ko tan impanengneng tod siak so ibabaga na Biblia tungkol ed balibalin arapen parad totoo. Angitagar na sanasawa ya ontulong ed siak ya natalosay Biblia. Ag-abayag, say asawak ya si Liping ya manbabangat na high school physics ed China tan ateista met, et ginmapon nanaral na Biblia. Naaralan mi so ibabaga na Biblia no panon ya ginmapo so bilay. Balo ed siak so ideyan walay Amalsa kanian nandesisyon ak ya i-research itan.

Panon yon ginawa itan?

Lapud mathematician ak, kabisadok no panon ya kuentaen so porsiento na posibilidad ya nagawa so sakey a bengatla. A-research ko met ya pian onlesa so bilay, dapat wala la ray proteins. Kanian kinuentak so posibilidad ya basta labat onlesa so protein panamegley na natural ya proseso. Say protein so sakey ed saray sankakomplikadoan ya molecule, tan saray mabilay ya selula et walaan na nilibo ya nanduruman klase na protein a mankokonektaan tan eksakto so igagana ra. Singa saray arum ya researcher, a-realize ko ya talagan imposible ya basta labat onlesa so protein! Anggapo ni abasak tungkol ed teorya na ebolusyon ya akakombinse ed siak ya sarayan komplikadon molecule et basta labat linmesa. Kanian mas imposible sirin imay ibabaga ran basta labat linmesa so amin ya mabilay a bengatla. Lapud sarayan impormasyon, apatunayan ko ya wala sirin so Amalsa.

Antoy akakombinse ed sikayo ya say Biblia et nanlapud Dios?

Diad panaaral ko kaiba iray Tasi nen Jehova, naamtaan ko ya nabasad Biblia so dakel ya detalyadon propesiya ya agawa. Baleg met so nitulong ed siak na panguunor kod saray prinsipyo na Biblia. Say kuan ko ed sarilik, ‘Akin ya praktikal ni anggad natan iray prinsipyo ya walad Biblia, anta nilibon taon lay apalabas nen insulat iratan?’ Kalkalna ya atalosan kon say Biblia et Salita na Dios.

Anto ni ray akakombinse ed sikayo ya walay Amalsa?

No iisipen koy amayamay ya elements ed uniberso, talagan anggapoy nibaraan kon agmanisia ed Amalsa. Say trabahok natan et man-design na saray computer software, tan pambiliban ko ya anggapoy computer program ya napantayan toy utek tayo. Singa bilang, makapabilib so abilidad na utek tayon nibiig iray salita. Sikatayo ran totoo et matmainomay tayon talosan iray salita, anggano aliwan kompleto so sentence, walay laok ton elek, ukok, pansigam, duman tono, echo, walay ingal, odino choppy so signal na telepono. Ompan isipen na arum ya aliwa yan makapakelaw. Pero pankelawan iya na saray software designer ta anggan say sankamaongan ya speech-recognition software et agmakakiking ed utek na too.

Aliwan singa saray sankamodernoan ya computer, say utek tayo et nalikas toy emosyon, nibiig toy tono na boses, tan nabirbir to no siopay mansasalita. Manre-research iray software designer no panon ya naalig na saray computer itan ya abilidad na utek na too. Kombinsido ak ya diad satan ya gagawaen da et aaligen da labat so desinyo na Dios.