Onlad karga

Onlad saray karga

 SAY EBAT NA BIBLIA

Krus

Krus

Ipapasen na dakel so krus bilang simbolo na Kristianismo. Balet, aliwan amin ed sikara et manisian kaukolan ya isulong itan odino i-displey ed abung tan ed simbaan.

Kasin inatey si Jesus ed krus?

NO ANTOY IBABAGA NA ARUM

 

Pinatey na saray Romano si Jesus diad impangipasak dad sikato ed krus ya gawad duaran piraso na tabla.

NO ANTOY IBABAGA NA BIBLIA

 

Pinatey si Jesus diad impangipasak dad sikato ed “sakey a kiew.” (Gawa 5:30, Say Biblia) Pareho so tutukoyen na saray salitan inusar na saray nansulat na Biblia ed angipasakan ed si Jesus—sakey a piraso na tabla, aliwan duara. Base ed Crucifixion in Antiquity, say labay ya ibaga na Griegon salitan stau·rosʹ et “sakey labat a poste. Ag-itan ontutukoy ed ‘krus.’” Say salitan xyʹlon ya inusar ed Gawa 5:30 et “sakey labat ya maptek a kiew odino poste ya uusaren na saray Romano ya pangipasakan ed saray kriminal [odino, saramay senentensiaan na ipapatey].” *

Inkonekta met na Biblia so paraan na impamatey ed si Jesus ed sakey a ganggan na saray Israelita nensaman. Oniay ibabaga na ganggan: “No walay toon nankasalanan a makanepegan na dusan ipapatey, tan sikatoy pinatey tan imbitay mo ed sakey a poste, . . . samay imbitay et insamba na Dios.” (Deuteronomio 21:22, 23) Atan so ganggan ya tutukoyen na Kristianon apostol ya si Pablo nen insulat to ya si Jesus et “nisamba imbes a sikatayo, ta nisulat: ‘Insamba so balang too ya impasak ed poste [xyʹlon].’” (Galacia 3:13) Nanengneng ed imbaga nen Pablo ya si Jesus et inatey ed sakey a poste—sakey a piraso na tabla.

“Pinatey da ya insabit da ed sakey a kiew.”Gawa 10:39, Say Biblia.

 Kasin inusar na saray disipulo nen Jesus so krus pian dayewen so Dios tan isimbolo so Kristianismo?

NO ANTOY IBABAGA NA BIBLIA

 

Anggapoy nabasad Biblia ya saray inmunan Kristiano et angusar na krus bilang relihyoson simbolo. Imbes, saray Romano ed saman so angusar na krus bilang simbolo na saray dios da. Insan, manga 300 taon kayari impatey nen Jesus, inusar na Emperador na Roma ya si Constantine so krus bilang simbolo na saray sundalo to, tan ag-abayag et inusar met na “Kristianon” simbaan.

Lapud inusar na saray pagano odino saray aliwan Kristiano so krus pian dayewen iray dios da, kasin inusar met itan na saray disipulo nen Jesus pian dayewen so tuan Dios? Andi. Amta da ya nensaman ni et agla labay na Dios ya usaren ed panagdayew so “anggan anton simbolo,” tan bilang Kristiano et kaukolan dan ‘ibatikan so idolatriya.’ (Deuteronomio 4:15-19; 1 Corinto 10:14) “Say Dios et Espiritu” tan agtayo nanengneng. Kanian, saray inmunan Kristiano et ag-angusar na saray nanengneng ya bengatla tan simbolo pian ontulong ed sikaran makaasingger ed Dios. Imbes, indayew day Dios “diad espiritu,” ya igigiya na agnanengneng ya masanton espiritu. Tan sikatoy indayew dad “katuaan” ya base ed paraan ya aawaten na Dios ya walad Kasulatan.—Juan 4:24.

“Saray mandadayew ed Ama et mandayew ed sikato diad espiritu tan katuaan.”Juan 4:23.

Panon ya nipanengneng na saray Kristiano so dugan panagrespeto ed si Jesu-Kristo?

NO ANTOY IBABAGA NA TOTOO

 

“Duga labat ya pablien tan respetoen a maong so inusar pian nisalba tayo. . . . Siopaman ya idadayew toy imahen, idadayew to met so personan irerepresenta na satan.”—New Catholic Encyclopedia.

NO ANTOY IBABAGA NA BIBLIA

 

Papablien na saray Kristiano so ginawa nen Jesus, ta lapud impatey to et posiblin naperdona iray kasalanan da, sarag day makaasingger ed Dios, tan nawalaay bilay ya anggapoy anggaan. (Juan 3:16; Hebreo 10:19-22) Ag-ira ingganggan ya ipanengneng day respeto ed satan ya regalo diad pangusar na simbolo nen Jesus odino diad basta pangibaga labat ya manisia irad si Jesus, ta “say pananisia ya andian na saray gawa et inatey.” (Santiago 2:17) Kaukolan ya ipanengneng na saray Kristiano so pananisia rad si Jesus. Panon?

Oniay ibabaga na Biblia: “Say panangaro na Kristo so mamapakiwas ed sikami, lapud oniay konklusyon mi: say sakey a too et inatey parad amin . . . Saramay manbibilay et agla ra manbilay parad sarili ra, noagta parad samay sakey ya inatey lapud sikara tan pinaoli.” (2 Corinto 5:14, 15) Lapud baleg ya panangaro ya impanengneng na Kristo, napapakiwas iray Kristiano ya umanen so kabibilay da pian naalig day alimbawa to. Diad ontan a paraan, nipanengneng day dugan panagrespeto ed si Jesus nen say diad pangusar na relihyoso iran simbolo.

“Saya so linawa nen Amak, a balang sakey a mamidbir ed Anak tan mangipatnag na pananisia ed sikato et nawalaan na bilay ya andi-anggaan.”Juan 6:40.

^ par. 8 A Critical Lexicon and Concordance to the English and Greek New Testament, 11th Edition, nen Ethelbert W. Bullinger, pahina 818-819.