Onlad karga

Onlad saray karga

 INTERBYU | YAN-DER HSUUW

Impaliwawa na Embryologist so Pananisia To

Impaliwawa na Embryologist so Pananisia To

Si Professor Yan-Der Hsuuw et direktor na panag-research ed embryo diad National Pingtung University of Science and Technology ed Taiwan. Dati et manisiad ebolusyon, balet nen nagmaliw ya research scientist, anguman so nonot to. Impaliwawa to iray rason to ed Onliing!

Mangibaga kayo pay pigaran impormasyon nipaakar ed sikayo.

Inyanak ak nen 1966 tan binmaleg ak ed Taiwan. Say relihyon na atateng ko et miparad Taoism tan Buddhism. Anggano mandadayew kami ed inaatey lan atateng na saray ateng mi tan manpipikasid imahen, agmin balot panisiaan ya walay Dios ya nanggawad sikatayo.

Akin et nanaral kayoy biology?

Nen ugaw ak, labalabay koy man-alaga na ayep, tan labay kon naaralan no panon ya agla manirap iray ayayep tan totoo. Unona, nanaral ak na veterinary medicine, insan ko intuloy ed embryology—kurso ya iilaloan kon makatulong pian natalosan koy gapoan na bilay.

Diad saman et manisia kayod ebolusyon. Sarag ton ibaga yo no akin?

Ibabangat na saray propesor ed unibersidad so ebolusyon, ibabaga dan wala ray ebidensya ed satan. Anisia ak ed sikara.

Akin et ginapoan yoy manbasa na Biblia?

Lapud duaran rason. Unona, inisip ko ya diad kinarakel na dios ya dadayewen na totoo, seguradon sakey ed sikara so mas atagey nen say arum. Balet siopa? Komadua, antak ya say Biblia et talagan rerespetoen ya libro. Kanian akila ak ed saray Bible study.

Nen ginmapo ak ya manaral ed Catholic University of Leuven diad Belgium nen 1992, linma ak ed simbaan na Katoliko tan kinerew kod pari ya ibangat to ak ed Biblia, balet agto labay.

Panon yon nalmo so ebat ed saray tepet yo?

Kayari duay taon, nen wala ak nid Belgium tan manggagawa na research, walay akabat kon bii ya taga Poland ya si Ruth, sakey ed saray Tasi nen Jehova. Nanaral na Chinese pian natulongan to ray estudyante ed unibersidad ya makaaral nipaakar ed Dios. Atan may ipipikasik, kanian aliketan ak nen akabat ko.

Impanengneng nen Ruth ed siak ya say Biblia, anggano aliwan libro ed science, et susuportaan toy science. Singa bilang, impikasi na sakey ya nansulat na Biblia ya si David: “Anengneng mo ak la anggan sanen ilulukon ak ni labat; akasulat lad librom so amin a kabiangan ko, say nipaakar ed saray agew sanen aporma iratan, antis ni a niwala iratan.” (Salmo 139:16, NW) Anggaman angusar si David na salitan mangisisimbolo labat, diad prinsipyo et duga so imbaga to! Antis nin naporma so laman na too, wala lay kompleton instruksion no panon iratan ya nabuo. Say inkasusto na Biblia so akakombinse ed siak ya Salita na Dios itan. Natatalosan ko met la ya walay saksakey ya tuan Dios, si Jehova. 1

 Antoy akakombinse ed sikayo ya walay Dios ya nanggawad bilay?

Saray scientist et manre-research pian naamtaan so tua, aliwan pian suportaan iray dati lan papanisiaan da. Nen naaralan ko no panon ya nabubuo so ugaw ed dalem na eges, anguman so nonot ko, nibagak ya walay nanggawad bilay. Singa bilang, saray engineer et mandedesinyo na saray assembly line pian natuop iray dugan piyesa, diad dugan ayos tan dugan paraan. Singa ontan so pakakabuo na ugaw ed dalem na eges balet ta mas komplikado.

Agta onggapo ya amin itan ed sakey ya abilay a selula?

On. Satan ya tingtingot a selula et ondakel, onggapo lay proseso na cell division. Walay panaon ya say bilang na selula et nadodoble kada 12 anggad 24 oras. Diad kagapo na sayan proseso, nabuo iray tatawagen ya stem cell. 2 Sarag na saray stem cell ya pawalaen so anggan dinan lawari ed manga 200 ya nanduruman klase na selula ya kaukolan pian nabuo so sakey ya ugaw, singa say blood cell, bone cell, nerve cell, tan arum ni.

Nen inaral ko no panon ya nabubuo so ugaw ed dalem na eges, nibagak ya walay nanggawad bilay

Nepeg ya napawala iray dugan selula diad dugan ayos tan dugan posisyon. Unona et maniiba ira pian magmaliw iran tissue, insan maniiba met iraya pian magmaliw ya organ tan saray taklay tan sali. Wala tay engineer a malabay ya mangisulat ed saratan ya instruksion parad ontan ya proseso? Balet saray instruksion ed pakabuo na embryo et nayaryari inkisulat da ed DNA. No iisipen koy inkarakep na saratan ya amin, kombinsido ak ya say bilay et denisinyo na Dios.

Akin et nagmaliw kayon Tasi nen Jehova?

Lapud aro. Imbaga nen Jesu-Kristo: “Diad saya et naamtaan na amin a sikayo iray disipulok, no manaaroan kayo.” (Juan 13:35) Sayan aro et anggapoy pipilien to, anggan antoy bansa, kultura, o kolor na sakey ya too. Naobserbaan ko tan aliknak itan ya panangaro nen ginmapo ak ya miulop ed saray Tasi.

^ 2. Lapud agsarag na konsiensia to bilang Kristiano, si Professor Yan-Der Hsuuw et agmanguusar na embryonic stem cell na too.