Onlad karga

Onlad saray karga

 SAY DALAN NA MALIKET YA KABIBILAY

Gagala na Bilay

Gagala na Bilay

SIKATAYO RAN TOTOO ET NIKADKADUMA​—SARAG TAYOY MANSULAT, MANPINTA, MANDESINYO, TAN ISIPEN IRAY IMPORTANTIN TEPET ED BILAY: Akin et walay uniberso? Panon itayon niwala? Anto so gagala na bilay? Antoy nagawad arapen?

Wala ray totoon agda iraya itetepet, ta iisipen da ya mairap ya talosan iray ebat. Ibabaga na arum ya andi-kakanaan iratan ya tepet ta say bilay et resulta na ebolusyon. “Anggapoy dios, anggapoy gagala,” so kuan na professor na history tan biology ya si William Provine. Imbaga to ni: “Anggapo so pundasyon na saray prinsipyo ed no antoy duga tan aliwa, anggapo so kabaliksan na bilay.”

Wala balet iray totoon aliwan ontan so papanisiaan da. Natatalosan da ya say uniberso et kokontrolen na saray ganggan ya eksakto, maayos, tan base ed science. Panbiliban day makapakelkelaw ya desinyo na kalikasan, ya arum ed saratan et sasalien na totoo ya aligen diad saray produkto da. Tan diad inagew-agew ya eksperiensya ra et nanenengneng da ya saray komplikadon desinyo et niwala lapud matalinon managdesinyo, aliwan diad panamegley na saray puersan anggapoy mangokontrol.

Lapud satan, wala ray ebolusyonista ya inaral da lamet so papanisiaan da. Niay duaran alimbawa.

NEUROSURGEON YA SI DR. ALEXEI MARNOV. “Diad nanaralan kon eskuelaan, ibabangat day ateismo tan ebolusyon,” so kuan to. “Saray manisia ed Dios et ipapasen ya anggapoy amta ra.” Pero nen 1990, anguman so papanisiaan to.

“Lanang kon sasalien ya talosan iray bengatla base ed lohika,” so impaliwawa to, “kaiba lay utek na too. Sayan makapakelkelaw ya organ et duga labat a tawagen ya sankakomplikadoan ya bengatla ed uniberso. Pero kasin say utek et denesinyo pian say too et nawalaan labat na kakabatan tan karunongan insan la ompatey? Parad siak, aliwa ’tan ya makatunongan. Kanian inisip ko: ‘Akin et niwala tayo? Antoy gagala na bilay?’ Kayarik ya ninonot itan a maong, say konklusyon ko et walay Amalsa.”

Lapud labay nen Alexei ya naamtaan so gagala na bilay, inaral toy Biblia. Ag-abayag, say asawa to ya doktor tan ateista met, et nanaral met na Biblia​—ta labay ton pruebaan ya aliwa si Alexei! Balet natan, pareho la ran manisia ya talagan walay Dios tan natatalosan da la so gagala to parad totoo base ed ibabaga na Biblia.

PLASMA SCIENTIST YA SI DR. HUABI YIN. Si Huabi Yin et nanaral na physics, tan dakel ya taon a nan-research tungkol ed plasma. Say plasma (ya walad agew), a komapat ya klase na matter, et bubuoen na saray electron tan positive ion.

“No aaralen mi ran scientist iray nagagawad kalikasan,” so kuan nen Huabi, “nanenengneng mi ya talagan organisado itan lapud saray eksakton ganggan. ‘Panon ya niwala irayan ganggan?’ so naisip ko. ‘No diad panagluto et kaukolan ya walay mankontrol ed apoy, di lalo lan kaukolan ya walay panlapuan na ganggan ya mangokontrol ed agew.’ Kanian asabi panaon, anengneng ko ya say sankamakatunongan ya ebat et samay sankaunaan ya nabasad Biblia: ‘Diad gapo et pinalsa na Dios so tawen tan say dalin.’”​—Genesis 1:1.

Tua ya dakel lan tepet ya “panon” so naebatan na science, singa say: Panon ya onggagana iray selula ed utek? Tan panon ya mamapawala so agew na petang tan liwawa? Pero singa adiskobre di Alexei tan Huabi, eebatan na Biblia iray mas importantin tepet ya “akin”: Akin ya walay uniberso? Akin et wala ray ganggan ya mangokontrol ed satan? Tan akin ya niwala tayo?

Oniay ibabaga na Biblia tungkol ed dalin: “[Say Dios et] agto [itan] pinalsa ya andiay gagala, noagta ginawa ton panayaman.” (Isaias 45:18) On, walay gagala na Dios parad dalin, tan singa nanengneng ed ontumbok ya artikulo, satan ya gagala et mikonektaan ed ilalo tayod arapen.