Onlad karga

Onlad saray karga

 TULONG PARAD PAMILYA | DIAD SANASAWA

Pideneng ed Katulangan

Pideneng ed Katulangan

NO AKIN YA MAIRAP

“Nen walay problema mi nen asawak, imbaga tod atateng to. Insan ak tinawagan nen tatay to tan binilin da ak no anto ray nayarin gawaen ko. Agko agustoan man ya ginawa nen asawak!”—James. *

“Mabetbet ya ibabaga na katulangan kon bii ya, ‘Makakailiw ak ya maong ed ana’ko!’ Lanang dan iistoryaen ya maap-apit iran sanina. Singa kasalanan ko laingen ya inmermen so bilay na katulongan ko ta akiasawa ak ed anak da!”—Natasha.

Anto kasi gawaen pian say problemad katulangan et agmagmaliw ya problema na sanasawa?

NO ANTOY NEPEG MON NAAMTAAN

Say sanasawa et balo lan pamilya. Ibabaga na Biblia ya say lakin mangasawa et ‘taynan to so ama tan ina to tan iyamong toy asawa to.’ Ontan met ed bii ya miasawa. Ibabaga na Biblia ya no miasawa la, “sikaran dua et magmaliw a sakey a laman.” Balon pamilya la ra.Mateo 19:5.

Iyunam so asawam nen say atateng mo. “Sakey ed saray importantin aralen na sanasawa et say naynay ya pangikonsiderad asawa ra ed amin ya gawaen da,” so insulat na marriage counselor ya si John M. Gottman. “Ompan kaukolan yoy onaknit ed atateng tan agagi yo, pian talagan magmaliw kayon saksakey nen asawam.” *

Wala ray ateng ya mairap day man-adjust. Oniay imbaga na sakey ya asawan laki: “Antis kamin nankasal, naynay ya iyuuna na asawak iray atateng to. Nen kasal kami la, alikna nen nanay ton aliwa lan sikaray iyuuna to. Agda naawat iman.”

Wala ra met so kapankasal ya mairap day man-adjust. “Aliwan singa ed kakaaro, agmo napili so katulangan mo,” so kuan nen James ya abitlad gapo. “Singa walay angibagad sikan, ‘Niay duaran balon kaarom, labay mo man odino andi.’ Anggan anto ni ugali da, kapamilyam la ra.”

 NO ANTOY NAYARIN GAWAEN MO

No lapud katulangan et mamoproblema kayon sanasawa, mantulongan kayon solusyonan itan. Unor yoy bilin na Biblia ya ‘anapen so kareenan’ tan pansiansiaen itan.Salmo 34:14.

Pian nagawaan yo itan, konsideraen pa irayan situasyon. Kada situasyon et onaplikad sikayon dua. Ontulong irayan prinsipyo pian naresolbe pigaran problemad pidedeneng ed katulangan yo.

Ibabaga na asawam ya labay ton marakep komoy relasyon yo nen ina to. Balet ta agkayo makapanpaknaan nen ina to.

Salien iya: Ibagam ed asawam so problema, tan nepeg ya akaparaan kan manpalugar. Say isyu et aliwan say liknaan mod katulangan mo, noagta say naliliknam ed asawam—say toon insambam ya aroen mo. No naimano iya na asawam, seguradon mas lalo to kan respetoen.Prinsipyod Biblia: 1 Corinto 10:24.

Ibabaga na asawam ya mas importantid sika so liknaan na atateng mo, nen say sikato.

Salien iya: Pantongtongan yo iyan dua, tan iyan moy sarilim ed situasyon to. Siempre, agmet nepeg ya manimon so asawam no gagawaen mo labat so obligasyon mon igalang iray ateng mo. (Uliran 23:22) Balet, ompan kaukolan mo nin siansian paseguroan—diad salita tan gawam—ya sikatoy mas manuna ed bilay mo nen saray ateng mo. No nalikna itan na asawam, agto isipen ya kakompetensya to ray ateng mod sika.Prinsipyod Biblia: Efeso 5:33.

Say aasinggeran na asawam no kaukolan toy simbawa et atateng to, imbes ya sika.

Salien iya: Katongtong moy asawam, tan pampaknaan yo no anto ray agyo la nayarin ibagad atateng yo. Magmaliw ya balanse. Lanang kasin aliwa so pangibagad saray ateng na problema? Anto ray situasyon ya sarag yoy onasingger ed sikara? No apantongtongan yo la ya, ag-iya magmaliw a problema.Prinsipyod Biblia: Filipos 4:5.

^ par. 4 Sinalatan iray ngaran ed sayan artikulo.

^ par. 9 Inala ed libron The Seven Principles for Making Marriage Work.