Onlad karga

Onlad saray karga

 MANUNAN ARTIKULO

Mausar Ni Kasi Biblia Natan?

Mausar Ni Kasi Biblia Natan?

‘Diad interon bilay ko, natan ko labat aliknay liket.’

LABALABAY nen Hilton so boksing. Pitoy taon to ni labat, naynay lan mipoponitian—anggano anggapod ring! Nen high school la, akar-akar kaiba ray barkada to tan mananap iray bugbogen da. “Matakew tan sugarol ak, mabantay ak na bold, babastosen ko ray bibii, tan ayew-ayewen ko ray ateng ko,” so kuan to. “Parad saray ateng ko et agak la manguman. Ka-graduate kod high school, inmalis ak lad abung mi.”

Nen sinmempet si Hilton kayari 12 taon, aga makapanisia iray ateng to ya sikato may anak da! Mareen, agla mipepetang so ulo to, tan marespeto la. Antoy agawa? Legan ton walad arawi, ninonot ton maong no anto la kasi nagawad bilay to. Sinali to met ya aralen so Biblia pian nanengneng no kasin makatulong itan pian manguman. “Ginawak iray nababasak ed Biblia,” so kuan nen Hilton, “kanian inuman koy datin ugalik tan inunor koy ganggan ed Efeso 6:2, 3 ya igalang iray ateng ko. Diad interon bilay ko, diad saman ko labat aliknay tuan liket. Tan apaliket kon siansiay nanay tan tatay ko, agak la sakit na ulo!”

Ipapanengneng na agawad si Hilton ya anggad natan et mausar ni ray prinsipyo na Biblia tan walay pakayari na satan ya umanen so too. (Hebreos 4:12) Konsideraen tayoy pigarad saratan ya prinsipyo—inkamatua, kontrol ed sarili, katooran ed asawa, tan aro—tan no panon iratan a makatulong ed bilay tayo.