Onlad karga

Onlad saray karga

 INTERBYU | ANTONIO DELLA GATTA

No Akin ya Inmekal so Sakey a Pari ed Relihyon To

No Akin ya Inmekal so Sakey a Pari ed Relihyon To

NAGMALIW ya pari si Antonio Della Gatta nen 1969 kayari ton nanaral ed Rome na 9 taon. Nagmaliw met ya rector o head na seminaryo ya asingger ed Naples, Italy. Kayari na dakel ya impanaral tan impannonot ton maong legan ya wadman, anengneng ton aliwan base ed Biblia so relihyon ya Katoliko. Inistorya tod Onliing! no panon ton inanap so Dios.

Istorya yo pay impanugaw yo.

Inyanak ak ed Italy nen 1943. Binmaleg kamin talo ya sanaagi diad melag a baryo. Dumaralos tan karpentero so tatay mi. Pinabaleg kami na atateng mi ya magmaliw a maong a Katoliko.

Akin et labay yoy magmaliw ya pari?

Ugaw ak ni labalabay ko lay ondengel ed saray sermon na pari. Nararakepan ak ed boses da, pati ed saray ritual ed simbaan. Kanian labay koy magmaliw ya pari. Nen 13 años ko, pinan-aral ak nen nanay ko ed eskuelaan ya mangipaparaan ed ugugaw a lalaki ya labay day man-pari.

Inaral yo met diman so Biblia?

Aliwan masyado. Nen 15 años ko, inikdan ak na maestrok na libro na Saray Ebanghelyo—say istorya na bilay tan ministeryo nen Jesus—tan aminpigapigak iman ya binasa. Nen 18 ak la, nanaral ak ed taloran university ed Rome, ya ididirekta na Papa. Nanaral ak na Latin, Greek, history, philosophy, psychology, tan theology. Anggano bibitlaen mi ray bersikulo ed Biblia tan ondedengel kamid pambabasa na Biblia no sermon kada Simba, agmin talaga aaralen so Biblia.

Nagmaliw kayon rector, nambangat kayo met?

Diad opisina so maslak ya trabahok. Balet asalik met so nambangat na Second Vatican Council.

Akin ya nanduaruwa kayod relihyon yo?

Walay taloran bengatla ya agko natalosan. Mibabali simbaan ed politika. Kokonsintien day aliwliwan gagawaen na saray pari tan saray mimimisa. Tan wala ray bangat na Katoliko ya singa aliwa. Singa bilang, panon ya nagawaan na maaron Amalsa ya dusaen ed andi-angga iray totoo no inatey la ra? Tan talaga kasin labay na Dios ya ulit-uliten tayo ray pikakasi tayo ya mangusar na rosaryo? *

Antoy ginawa yo ey?

Matalareter so luak ya nampikasid Dios. Angaliw ak met na Catholic Jerusalem Bible, ya kakkapan-publish nid saman ed lenguahen Italian, tan ginapoan kon basaen itan. Sakey a kabuasan na Simba, nen isasabit ko lay kapak kayari Misa, walay duaran laki ya linmad seminaryo. Nampakabat ira ya Tasi nen Jehova. Masulok ya sakey oras kamin nantongtong nipaakar ed Biblia tan no antoy ibabaga na satan ed saray pakabidbiran na tuan relihyon.

 Antoy nibaga yod saramay linmad sikayo ey?

Bilib ak ed pananisia ra, tan kabisado da ray bersikulo na Katolikon Biblia. Insan wala lamet so Tasi ya binmisitad siak, si Mario. Maan-anos ya oonlad seminaryo kada Sabado anggan uran. Alas-nuebe kabuasan et man-doorbell la.

Anto met so kuan na arum ya pari ed ibibisita na saray Tasi?

Inimbitaan ko ran mila ed panaaral mi Biblia, balet anggapoy interesado. Siak balet et labalabay koy manaral. Dakel so mararakep ya naaaralan ko, singa no akin ya aabuloyan na Dios so kaugsan tan kairapan—abayag ko lan iisipen itan.

Saray superior yo ey, agda met kinontra so panaaral yoy Biblia?

Nen 1975, linma ak ed Rome tan aminpigak ya impaliwawa iray opinyon ko. Sasalien na saray superior ko ya umaney nonot ko, balet anggapo labat ed sikaray angusar na Biblia. Anggad nen Enero 9, 1976, sinmulat ak ed Rome tan imbagak ya agko la ipapasen so sarilik ya Katoliko. Kayari duay agew, inmalis ak lad seminaryo tan nan-tren ak pian onlad pantitipon na Saray Tasi nen Jehova. Aman so sankaunaan ya inyakar ko, et assembly da manaya ya maniiba so pigaran kongregasyon. Amin ya anengneng ko et arawdawin maong ed apasalan ko. Kada Tasi et walay Biblia ya ibubukay da legan ya ipapaliwawa na saray espiker so nanduruman topic.

Anto met so kuan na pamilya yo ey?

Maslak ed sikara et kontra. Naamtaan ko balet ya manaaral met ed saray Tasi so agik a laki diad Lombardy, Italy. Linma ak diman, tan tinulongan ak na saray Tasi ya makalmoy trabaho tan panayaman. Diad saman met a taon, abautismoan ak bilang sakey ya Tasi nen Jehova.

Aliknak a siansia ya talagan maapit ak ed Dios

Wala met iray pagbabawian yo?

Anggapon balot! Aliknak a siansia ya talagan maapit ak ed Dios ta akabat ko aliwan lapud pilospiyay too odino tradisyon na simbaan, noagta base ed Biblia. Segurado ak la natan ed saray ibabangat ko. Naibabangat ko met la iratan ya manlapud puso.

^ par. 13 Walay ebat na Biblia ed sarayan tepet tan ed dakel ni ran tepet. Nengnengen so BIBLE TEACHINGS > BIBLE QUESTIONS ANSWERED.