NANDURUMAN LUGAR TAN TOTOO
Ombisita Tayod Cameroon
SAY etnikon grupo a tatawagen ya Baka
Angi-publish iray Tasi nen Jehova na saray literatura ed salitan Bassa, sakey ya lenguahe ed Cameroon
Maparawes iray manaayam ed saray probinsya ed Cameroon. Ibabano da iray bisita tan papalooben da irad abung da, insan da ra parungoay naakan tan danum. Insulto ed sikara no agmo awaten so pamisita ra, balet maliket ira no ontuloy kad abung da.
Onggapoy istoryaan diad pangibano tan pangumustad interon pamilya. Ugali da ni ingen ya komustaen anggan saray ayayep! “No onalis la may bisita, aglabat la basta manpatanir,” so kuan nen Joseph ya tagad Cameroon. “Ibaan ni na akan-abung diad dalan tan legan iran manaakar et manistoryaan ira. Insan no kien, manpatanir met la may akan-abung tan onsempet la. No agmo ipatnubang so bisita, ompan isipen ton agmo inikday importansia.”
Kaslakan et nanengneng so onia ran baloto ed Sanaga River. Saray layag et gawad materyales ya available ditan
Sano mandurungo ira, no maminsan et manuukob ed saksakey ya plato iray sankakaaro
Saray Tasi nen Jehova, say publisher na sayan magasin, et walaan na masulok ya 300 iran kongregasyon diad Cameroon tan manga 65,000 so iyaaralan da na Biblia ed sayan bansa