Onlad karga

Onlad saray karga

Sulat na Mananguley ya Ulop

Sulat na Mananguley ya Ulop

Inad-aro Min Agagi:

Diad sankaunaan ya isyu na publikon edisyon na Say Panag-bantayan ya Enero 1, 2008, abasa tayo so inmuna-unan artikulo na balon serye ya apauloay “Aligen so Pananisia Ra.” Manlapu lad saman, malikeliket tayo ta maminsan ed kada taloy bulan et walay nababasa tayon balon artikulo ed satan ya serye!

Antoy reaksion na saray akabasa ed sarayan artikulo? Oniay insulat na sakey ya bii kayari ton binasa so artikulo nipaakar ed si Marta: “Makakalek ak nen babasaen ko ta singa ak si Marta—labalabay koy mangimbita diad abung balet lapud busy ak ya manpaparaan, no maminsan et nalilingwanan koy ontundan magano pian na-enjoy koy miistoryaan ed saray kakaarok.” Oniay imbaga na sakey ya tinedyer kayari ton abasa imay istorya nen Ester: “No maminsan, say sankanonot tayon lanang et kawes tan no antoy uso. Siempre labay tayon maayos so itsura tayo; balet, aleg komon ya alablabas.” Onia ni imbaga to: “Say importantid si Jehova et no antoy walad puso tayo.” Tan oniay maligligsan reaksion na sakey ya agin bii sanen abasa to may artikulo nipaakar ed si Pedro: “Singa ak wadman ya mamatbantay ed amin ya nagagawa. Mabilabilay! Inusar koy imahinasyon ko pian talagan nalikliknak so dedeskribien na saray teksto.”

Sikara​—tan say dakel nin nansulat pian ibalikas so apresasyon dad sarayan artikulo—​so paneknek ya tua iyan insulat nen apostol Pablo: “Amin ya insulat nensaman et insulat pian nibangat itayo.” (Roma 15:4) On, impaisulat iraya nen Jehova diad Biblia pian nibangat to itayo. Amin tayo et makaaral ed saratan, anggano abayag ti lad katuaan.

Papasesegen mi kayo sirin ya basaen yon tampol iyan libro. Aral yo iya diad Panagdayew na Pamilya yo​—seguradon nagustoan iya na saray ugugaw! Sano aralen la iya diad Panagaral na Kongregasyon ed Biblia, komon ta agkayo onliliwat anggan maminsan! Agkayo manaapura no babasaen yo iyan libro. Imadyin yo imay babasaen yo. Kunwari et wadman kayon mismo ed eksena​—ya singa yo met nalilikna so nalilikna na sarayan karakter ed Biblia, tan singa yo met nanenengneng iray nanenengneng da. Usisa yo ray ginawgawa da tan isip yo no anto met so gawaen yo no sikayoy walad situasyon da.

Malikeliket min iter ed sikayo iyan publikasyon. Komon ta bendisyon iya ed sikayo tan ed pamilya yo. Say mangaaron maong ed sikayo tan lawas mannononot ed pankaabigan yo,

Mananguley ya Ulop na Saray Tasi nen Jehova