Onlad karga

Onlad saray karga

 KAPITULO 23

Akaaral ed Panamerdona na Katawan To

Akaaral ed Panamerdona na Katawan To

1. Antoy sankaermenan lan agawa ed bilay nen Pedro?

AGBALOT nalinglingwanan nen Pedro imay bektan akapanmataan ira nen Katawan to. Alikas to kasid nengneng nen Jesus ya singa adismaya o walay sakit na linawa To? Agtayo amta. Basta say kuan na Biblia, “linmingaw so Katawan tan ninengneng toy Pedro.” (Luc. 22:61) Balet lapud saman ya linggis, amoria nen Pedro so kabelat na agawaan ton lingo. Tan diman to met labat amoria ya satan imay mismon impasakbay nen Jesus. Atan pa ni met may imbaga ton agton balot gawaen. On, imburi nen Pedro so inad-aro ton Katawan. Agaylay pagbabawi to! Anganko et aman lay sankaermenan ya agawad bilay to.

2. Antoy kaukolan ya aralen nen Pedro, tan panon itayon nagunggonaan ed agawad sikato?

2 Balet, agto labay ya ibagan anggapo lay ilalo nen Pedro. Mabiskeg so pananisia to kanian sarag to nin ipetek iray lingo to tan kaukolan ton aralen so sakey ya importantin bangat nen Jesus​—say panamerdona. Nepeg tayo met ya aralen itan, kanian amtaen tayo no panon itan ya naaralan nen Pedro.

Dakel ni Kaukolan Ton Aralen

3, 4. (a) Antoy intepet nen Pedro ed si Jesus, tan antoy nayarin iisipen nen Pedro? (b) Panon ya impanengneng nen Jesus ya naimpluensyaan si Pedro na ugali na totoo ed saman a panaon?

3 Manga anem bulan antis na saman ya agawa, sanen wala rad Capernaum et oniay intepet nen Pedro ed si Jesus: “Katawan, anggad maminpiga a perdonaen koy agik a mankasalanan ed siak? Anggad maminpito?” Diad satan ya imbaga nen Pedro, anganko et inisip to ya mainomay toy mamerdona no ikomparad arum. On ta nensaman et ibabangat na saray lider na relihyon ya mamitlo labat kunoy pamerdona! Balet oniay inyebat nen Jesus: “Aliwa ya, Anggad maminpito, noagta, Anggad maminpitomplo tan pito.”​—Mat. 18:21, 22.

4 Kasin labay ya ibaga nen Jesus ya ilista nen Pedro so lingo na arum? Andi. Imbes, sanen ginawa ton 77 imay 7 ya imbaga nen  Pedro, idadanet ton lapud aro et agtayo bibilangen so pamerdona tayo. (1 Cor. 13:4, 5) Impanengneng nen Jesus ya naimpluensyaan si Pedro na saray totood saman a panaon ya anawet so puso ra tan mairap day mamerdona, ya singa da ililista so kada lingo na arum. Balet no labay tayon aligen so Dios, perdonaen tayo so arum, anggano maminpigapiga.Basaen so  1 Juan 1:7-9.

5. Kapigan tayo mas naaralay mamerdona?

5 Agla akikatunongan si Pedro. Balet talaga kasin akasabid puso to imay imbaga nen Jesus? No maminsan et mas naaralan tayoy mamerdona no amta tayon sikatayon mismo et mankaukolan met na panamerdona. Pawilen tayo sirin iramay agawa antis ya inatey si Jesus. Diad saraman ya oras, dakel so agawaan nen Pedro ya lingo a mankaukolay panamerdona na Katawan to.

Kakkaukolan Toy Panamerdona

6. Antoy reaksion nen Pedro sanen ibabangat nen Jesus so inkamapaabeba ed saray apostol to, balet panoy impideneng nen Jesus ed sikato?

6 Agnalinglingwanan iman ya labi​—saman la so sampot ya labi nen Jesus diad dalin. Dakel ni kaukolan ton ibangat ed saray apostol to​—singa say inkamapaabeba. Impanengneng to itan sanen inurasan toy sali ra, ya kaslakan et kimey na sankaabebaan ya aripen. Diad primero et kontra si Pedro. Agto labay ya paurasay sali to. Insan nen kien balet, aliwan sali to labat so papaurasan tod si Jesus, pati ulo tan lima to! Anggaman ontan, agnaandi so pasensia nen Jesus. Kalmado ton impaliwawa so kaimportantian tan kabaliksan na gagawaen to.​—Juan 13:1-17.

7, 8. (a) Panon ya asubok lamet so pasensia nen Jesus ed si Pedro? (b) Panon ya impanengneng nen Jesus ya sikatoy maaro tan mainomay ya mamerdona?

7 Kayari na satan, asubok lamet so pasensia nen Jesus ed si Pedro. Nansasangsangan di Pedro tan arum nin apostol no siopay manunaan ed sikara. Anggaman ontan, maaro iran impetek nen Jesus tan kinomendaan to ni ra ingen ta matoor irad sikato. Balet impasakbay to ya sikatoy taynan dan amin. Inmebat si Pedro ya agto kunon balot taynan si Jesus anggano ipatey to ni. Impasakbay balet nen Jesus ya sikatoy mamitlon iburi nen Pedro diad saman ya mismon labi, antis na mikaduan ikukaok na lalong. Kinontra itan nen Pedro tan impasirayew to ni ingen ya sikatoy mas matoor nen say arum ya apostol!​—Mat. 26:31-35; Mar. 14:27-31; Luc. 22:24-28; Juan 13:36-38.

8 Naingongotan la kasi Jesus ed si Pedro? Diad tua, anggan oniay situasyon, say nenengnengen nin siansia nen Jesus et say kamaongan na saray apostol to. Anggano amta ton sikatoy iburi nen Pedro, onia nin siansiay imbaga to: “Impikasi ta ka lan masimsimoon ta pian ag-onkapuy  so pananisiam; tan sano akapawil ka la, pabiskeg mo iray agagim.” (Luc. 22:32) On, matalek si Jesus ya makabangon la lamet ed espiritual si Pedro tan ompawil ed matoor ya panlilingkor to. Talagan maar-aroy Jesus tan mainomay ya mamerdona!

9, 10. (a) Panon ya impetek nen Jesus si Pedro diad hardin na Getsemani? (b) Antoy ipanonot na samay agawad si Pedro?

9 Ag-abayag, aminpiga lamet ya nipetek si Pedro sanen wala rad hardin na Getsemani. Imbaga nen Jesus ed sikato tan ed si Santiago tan Juan ya mantultuloy iran manbantay legan Ton manpipikasi. Diad saman et ambelbelat so liknaan nen Jesus tan kaukolan toy suporta, balet aminpiga ton asabian ya nanaugip si Pedro tan saramay kakaiba to. Tinalosan nen Jesus so kipapasen da tan pinerdona to ra, kanian oniay imbaga to: “Magunaet so espiritu, balet maletey so laman.”​—Mar. 14:32-41.

10 Nagugunoyan et wala ray sinmabi, akaawit iray silew, espada, tan pekpek. Kaukolan ya manalwar ira di Pedro. Balet bengatbengat la lamet. Anguyos na espada insan to sinigbat si Malco, say aripen na atagey ya saserdote, kanian atapyas so layag to. Kalmadon impetek nen Jesus si Pedro, pinaabig toy Malco, tan impaliwawa to no akin ya agnepeg ya magmaliw ya bayolenti iray papatumbok to. (Mat. 26:47-55; Luc. 22:47-51; Juan 18:10, 11) Dakel lay agawaan nen Pedro ya kaukolan a perdonaen na Katawan to. Ipapanonot na satan ya amin tayo et mabetbet ya nalilingo. (Basaen so Santiago 3:2.) Siopad sikatayo so agmankaukolay panamerdona na Dios kada agew? Balet agditan angangga iray lingo nen Pedro. Say sankagrabian ya lingo to et agawad saman met lanlamang ya labi.

Sankagrabian ya Lingo nen Pedro

11, 12. (a) Akin et nibagan anggan panon et impanengneng nen Pedro so pakpel kayari impangarestod si Jesus? (b) Akin et agmet lanlamang atoor nen Pedro imay insipan tod Katawan to?

11 Imbaga nen Jesus ed saramay sinmabi ya no sikato labat so aanapen da, paulyanan da lan onalis iray apostol to. Anggapoy agawaan nen Pedro sanen babaloren da lay Jesus. Nen kien et batik la, tinaynan toy Jesus, singa ginawa met na arum nin apostol.

12 Agnitepel di Pedro tan Juan si Jesus, kanian tinmunda rad asingger ed abung na datin Atagey ya Saserdoten si Anas, ta diman so primeron angawitan ed si Jesus. Sanen iloloob da lay Jesus, tinmumbok ira di Pedro tan Juan balet wala rad “bandad arawi.” (Mat. 26:58; Juan 18:12, 13) Labay ton ibaga aliwan payakot si Pedro, ta kaukolan ya talagay pakpel pian nagawaan to itan. Insan sakey ni, armado imay grupo, tan asugatan to so sakey ed sikara. Anggaman ontan, agnin siansia nipanengneng nen Pedro imay matoor ya  panangaro ya insipan tod si Jesus​—ya no nakaukolan et akaparaan kunon ompatey parad Katawan to.​—Mar. 14:31.

13. Panoy dugan paraan na itumbok ed Kristo?

13 Singa si Pedro, dakel natan so malabay ya ontumbok ed Kristo balet aliling to et wala rad “bandad arawi” pian ag-ira naimanoy arum. Balet diad saginonor et insulat ya mismo nen Pedro ya no labay tayon tumboken so Kristo ed dugan paraan, kaukolan tayon gawaey anggaay nayarian tayon onapit ed Sikato, tan aligen tayon amin so alimbawa To, anggan antoy nagawa.​—Basaen so 1 Pedro 2:21.

14. Antoy ginawa nen Pedro legan ya lilitisen si Jesus?

14 Maal-alwar ya tinumbok nen Pedro iramay angerel ed si Jesus ya anggad sikatoy akasabid puerta na sakey ed saray sankabalegan ya mansyon ed Jerusalem. Abung itan nen Caifas, say mayaman tan maimpluensyan atagey ya saserdote. Kaslakan et walay sular na saratan ya abung tan walay puerta ed bandad arap ya sular. Akaasingger lay Pedro diman ed puerta balet agda pinaloob. Si Juan et akaloob ta kabat to may atagey ya saserdote, tan akombinse to may bantay kanian akaloob met lay Pedro. Mapatnag balet ya ag-ira saniba; ta agla linmoob si Pedro ed mismon abung pian ibaan komoy Katawan to. Wadman labat ed sular, kaiba to ray pigaran aripen ya mandadangdang. Sankanengneng dan onloloob tan ompapaway iray palson testigo legan ya lilitisen si Jesus.​—Mar. 14:54-57; Juan 18:15, 16, 18.

15, 16. Ipaliwawa no panon ya agawa imay propesiya nen Jesus nipaakar ed mamitlon pangiburi nen Pedro.

15 Lapud liwawa na apoy, si Pedro et alupaan na samay biin amaloob ed sikato. Abirbir toy Pedro kanian inkuan to: “Sika met, kaiba ka nen Jesus a taga Galilea!” Lapud abiglay Pedro, imbaga ton agto kabat si Jesus tan inkuan to ni ingen ya agto amta so ibabaga na sayan bii. Inmalagey si Pedro ed abay na puertad sular pian anggapo lay makaimanod sikato, balet abirbir nin siansia na sananey ya bii ya say kuan to met et: “Sayan too et kaiba nen Jesus a Nazareno.” Oniay insamba nen Pedro: “Agko kabat itan a too!” (Mat. 26:69-72; Mar. 14:66-68) Anganko diad sayan komaduan impangiburi to et nadngel ton kinmukaok so lalong. Balet lapud aburidon maong si Pedro, agto la anonotan imay impropesiya nen Jesus pigaran oras ni labat so linmabas.

16 Kayari na satan, siansia nin pinmaliis si Pedro pian agnaimano na arum. Balet sikatoy inasinggeran na sakey a grupo ya wadman ed sular. Say sakey ed sikara et kanayon nen Malco, amay aripen ya sinigbat nen Pedro. Inkuan tod Pedro: “Agta sika imay anengneng kon kaiba to ed hardin?” Labay nen Pedro ya paneknekan ya nalilingo ra kanian nansamba lamet. Anganko et imbaga to ni ingen ya walay nagawan mauges ed sikato no mantitila. Atan so komatlon impangiburi  nen Pedro. Kapangibaga tod satan, kinmukaok so lalong​—say mikaduan kukaok ya nadngel nen Pedro ed saman ya labi.​—Juan 18:26, 27; Mar. 14:71, 72.

“Linmingaw so Katawan tan ninengneng toy Pedro”

17, 18. (a) Antoy reaksion nen Pedro sanen amoria toy kabaleg na kasalanan tod Katawan to? (b) Anto kasi inisip nen Pedro?

17 Dugarugan pinmaway si Jesus ed balkonahe ya ditan et sankabantag so sular. Aya may bektan akapanmataan ira nen Pedro, ya adeskribe ed gapo na sayan kapitulo. Diman amoria nen Pedro so kabelat na kasalanan tod Katawan to. Lapud nakokonsiensian maong, batik la tan maer-ermen kalamor ya linmad karsada na syudad ya naliliwawaay managaag a bulan. Kinmakkapuy so liknaan to kanian inyaki-akis to.​—Mar. 14:72; Luc. 22:61, 62.

18 Diad onia ran situasyon, anganko et isipen na sakey ya lapud belat na kasalanan to et agla naperdona. Nayarin ontan met so inisip nen Pedro. Naperdona ni kasi?

Kasin Agla Naperdona si Pedro?

19. Anto kasi alikna nen Pedro lapud samay ginawa to, balet panon tayon amta ya nilabanan toy ermen to?

19 Agnadeskribe ermen nen Pedro nagkalalo la sanen kaimbuasan la tan naimatonan to ray agawad saman ya agew. Seguradon tinetel toy sarili to sanen inatey si Jesus ed saman ya ngarem kayari pigay oras ya impamairap ed sikato! Seguradon ansakisakit so liknaan nen Pedro sano naiisip to ya akaarum nid impanirap na Katawan to imay ginawa tod sampot la manayan agew na bilay To bilang too. Balet nilabanan nen Pedro so ermen to. Nibaga tayo itan ta ag-abayag et akiulop lamet ed saray espiritual ya agagi to. (Luc. 24:33) Seguradon pagbabawian na amin ya apostol imay ginawa rad saman ya labi, tan anggan panon et niligliwa ray balang sakey.

20. Antoy naaralan tayod samay maabig ya ginawa nen Pedro anggano agaylay ermen to?

20 Maabig iyan ginawa nen Pedro. Sano natumba so sakey a lingkor na Dios, aliwan say inkagrabe na impakatumba to so importante, noag say determinasyon ton ombangon lamet pian ipetek so ginawa ton lingo. (Basaen so Uliran 24:16.) Impanengneng nen Pedro ya malet so pananisia to sanen akitipon ed saray agagi to anggano agaylay ermen to. No nabebelatan ka lapud ermen tan pakakakonsiensia, ompan say labay mo et ibiig mo lay sarilim, balet delikado itan. (Uli. 18:1) Say sankaabigan ya gawaen mo et mansiansia kan  maapit ed saray agagi tan pabiskeg mo lamet so espiritualidad mo.​—Heb. 10:24, 25.

21. Antoy abalitaan nen Pedro lapud akitipon ed arum nin disipulo?

21 Lapud kaiba nen Pedro iray arum ya disipulo, abalitaan ton nababalang imay bangkay nen Jesus. Abigla rad sayan balita kanian batik ira di Pedro tan Juan pian nengnengen no kasin tua itan. Lapud mas ugaw ni Juan, akasabin tampol diman ed lubok. Mankelaw ta akalukas, anta akakapot man nen imponpon day Jesus. Agla linmoob si Juan, balet si Pedro dirediretso anggano abet-abeten to ni engas to. Anggapo ya tua may bangkay!​—Juan 20:3-9.

22. Akin et nakal so amin ya ermen tan panduaruwa nen Pedro?

22 Kasin anisia si Pedro ya apaoli lay Jesus? Nen unaan et andi, anggano wala ray bibiin angibalita ya nampanengneng ed sikara iray anghel ya angibagan apaoli lay Jesus. (Luc. 23:55–24:11) Balet antis ya manampot itan ya agew, nakal so amin ya ermen tan panduaruwa nen Pedro. On, mabilay si Jesus, tan sakey lan makapanyarin espiritu! Sikatoy nampanengneng ed amin ya apostol to. Balet antis to ’tan et nampanengneng nid si Pedro. Oniay imbaga na saray apostol: “Tua ya apaoli so Katawan tan nampanengneng ed si Simon!” (Luc. 24:34) Diad saginonor et insulat met nen apostol Pablo so nipaakar ed satan ya agnalingwanan ya agew a ‘nampanengneng si Jesus ed si Cefas, insan diad labindua.’ (1 Cor. 15:5) Say Cefas tan Simon et arum nin ngaran nen Pedro. On, diad satan ya agew et nampanengneng si Jesus ed si Pedro sanen bukbukor to.

Dakel so ginawa nen Pedro ya mankaukolay panamerdonay Katawan to, balet siopad sikatayo so agmankaukolay panamerdona na Dios diad kada agew?

23. Akin et kaukolan ya tandaan na saray Kristianon akagaway kasalanan imay agawad si Pedro?

23 Anggapoy nabasad Biblia ya detalye na impannengneng lamet nen Jesus tan si Pedro. Sikaran dua labat so makaamtad satan. Seguradon malikeliket si Pedro ya anengneng ton mabilay lamet so inad-aro ton Katawan tan nibalikas toy ermen tan pagbabawi to! Diad saman ya bekta, anggapo lay mas importantid si Pedro noag say panamerdona na Katawan to. On, sikatoy mabulos ya pinerdona nen Jesus! Sayan agawad si Pedro et kaukolan ya tandaan na saray Kristiano natan ya akagaway kasalanan. Agtayon balot iisipen ya ag-itayo la naperdona na Dios. Sigpot ya inalig nen Jesus so Ama to ya ‘mameperdona na daakan.’​—Isa. 55:7.

Kaaruman nin Paneknek ya Sikatoy Aperdona La

24, 25. (a) Deskribien imay sanlabin impansigay di Pedro diad Dayat na Galilea. (b) Antoy reaksion nen Pedro ed samay milagro nen Jesus sanen kabuasan la?

24 Imbaga nen Jesus ed saray apostol to ya onla rad Galilea ta diman ira mannenengneng lamet. Kasabi diman na saray apostol, si Pedro et linman nansigay ed Dayat na Galilea tan wala met iray akilad  sikato. Tinatkenan la nen Pedro so panagsigay kanian anggan panon et nailiw toy pakabemben lamet na iket, say panateteet na baloto, tan saray sipwak na daluyon. Sanlabi la ra di Pedro, balet anggapo nin balot so narel da.​—Mat. 26:32; Juan 21:1-3.

Tinmaboy si Pedro tan linmangoy paarap ed gilig na dayat

25 Balet sanen onkakabuasan la, walay laki diman ed gilig na dayat ya inyeyag ton ipelag day iket da diad bandad kawanan na baloto. Kanian impelag da ed saman ya banda tan akarel iray 153 ya sira. Kabat nen Pedro iman ya too! Tinmaboy a tampol tan linmangoy paarap ed gilig na dayat. Ditan et pinakan nen Jesus na inkalot ya sira irayan matoor ya kakaaro to. Insan to kinatongtong si Pedro.​—Juan 21:4-14.

26, 27. (a) Anton pankanawnawa so amitlon inter nen Jesus ed si Pedro? (b) Antoy sankabiskegan lan paneknek ya sigpot lan pinerdona nen Jesus si Pedro?

 26 Oniay intepet nen Jesus ed si Pedro: “Kasin mas inarom ak nen saraya?” Anganko et intepet to itan legan ton ituturo iramay dakerakel ya sira. Dinan kasi mas inaro nen Pedro​—say panagsigay odino si Jesus? Amitlon imburi nen Pedro so Katawan to, kanian natan et amitlo met ya inikdan nen Jesus na pankanawnawa ya nibalikas toy panangaro to diad arap na kakaaro to. Diad kada pangibalikas nen Pedro na panangaro to, imbagad sikato nen Jesus no panon ton nipanengneng itan: diad pangiyuna tod sagradon serbisyo​—say pamakan tan pampastol tod pulok nen Kristo, salanti, saray matoor ya papatumbok To.​—Luc. 22:32; Juan 21:15-17.

27 On, impaseguro nen Jesus ya si Pedro et siansia nin papablien to tan na Ama to. Sikatoy inikdan na importantin responsabilidad ed kongregasyon ya idadaulo nen Kristo. Saya so sankabiskegan lan paneknek ya sikatoy sigpot ya pinerdona nen Jesus! Seguradon impapusoy pisalsalamat nen Pedro ed satan ya panangasi.

28. Panon ya impanengneng nen Pedro ya sikatoy singa sakey a bato, a singa kabaliksan na ngaran to?

28 Matoor a ginawa nen Pedro iyan responsabilidad to ed dakel ya taon. Pinabiskeg to ray agagi to, ya singa ingganggan nen Jesus diad samay labi antis na impatey To. Maaro tan maanos ton pinastolan tan pinakan iray papatumbok nen Kristo. On, sinumpal nen Simon imay kabaliksan na ngaran ya inter nen Jesus ed sikato​—Pedro, odino Bato​—malet, nailaloan, tan maong ya alimbawa ed kongregasyon. Paneknekan itan na duaran maaron sulat nen Pedro ya nagmaliw ya importantin kabiangan na Biblia. Nanengneng met ed sarayan sulat to ya agton balot alingwanan so naaralan tod si Jesus nipaakar ed panamerdona.​—Basaen so 1 Pedro 3:8, 9; 4:8.

29. Panon tayon naalig so pananisia nen Pedro tan say panangasi na Katawan to?

29 Komon ta makaaral itayo met ed satan. Kasin inagew-agew tayon onkekerew na panamerdona ed Dios lapud naynay itayon nalilingo? Kasin nalilikna tayon peperdonaen itayo na Dios tan lapud satan et malinis itayod arapan to? Tan peperdonaen tayo met kasi so arum? No ontan so gagawaen tayo, aaligen tayoy pananisia nen Pedro tan say panangasi na Katawan to.