Onlad karga

Onlad saray karga

 KAPITULO 18

“Minorekdek To so Kabaliksan” na Saray Salita

“Minorekdek To so Kabaliksan” na Saray Salita

1, 2. Deskribien so impanbiahe di Maria tan Jose tan ipaliwawa no akin ya aliwa itan ya komportable ed si Maria.

AGKOMPORTABLE si Maria legan ton akalugan ed asno, ta pigay oras la ran manbiabiahe. Si Jose balet et tetengtengen to may asno. Arawi ni biahien da paonlad Betlehem. Alikna lamet nen Maria ya ginmalaw so ugaw ed eges to.

2 Baleg lay eges nen Maria ed saman. Say kuan na Biblia et “magano lan mananak.” (Luc. 2:5) Legan dan nalalabasan iray kaumaan, anganko sankanengneng ira na saray manbabaka o mantatanem ya dumaralos; mankelaw ira lagi no akin ya manbiabiahe ni iyan bii anta asingger lan mananak. Antoy rason akin et tinaynan nen Maria so abung tod Nazaret tan onlad arawin pasen?

3. Anton pribilehyo so naawat nen Maria, tan antoy aralen tayo nipaakar ed sikato?

3 Pigaran bulan antis to ’ya, sayan Judion marikit et akaawat na espisyal ya pribilehyo. Sikato so mangiyanak ed ugaw ya magmaliw a Mesias, say Anak na Dios! (Luc. 1:35) Kaukolan da balet so manbiahe sanen asingger lan mananak. Diad sayan iyakar dad Betlehem, dakel so pakasubokay pananisia nen Maria. Nengnengen tayo no antoy tinmulong ed sikato pian mansiansian mabiskeg so pananisia to.

Say Biahe Paonlad Betlehem

4, 5. (a) Akin ya kaukolan ya onlad Betlehem si Jose tan Maria? (b) Antoy asumpal ya propesiya lapud samay ganggan nen Cesar?

4 Aliwan si Jose tan Maria labat so manbiabiahe. Diad tua, kapkapangiganggan nen Cesar Augusto ed amin ya sakop to ya kaukolan day ompawil ed lugar ya nianakan da pian manparehistro. Kasin tinulok iya nen Jose? Oniay nabasa tayo: “Si Jose a walad Galilea, diad syudad na Nazaret, et linma met ed Judea, diad syudad nen David, a tatawagen a Betlehem, lapud sikatoy kabiangan na sankaabungan tan pamilya nen David.”​—Luc. 2:1-4.

5 Agnibanbana iyan ganggan nen Cesar. Manga 700 a taon lay apalabas, nipropesiya la ya say Mesias et iyanak ed Betlehem. Walay  sakey a baley a tatawagen ya Betlehem, 11 kilometro labat so kaarawi tod Nazaret. Balet espisipikon imbaga na propesiya ya say Mesias et iyanak ed Betlehem ya “Efrata.” (Basaen so Miqueas 5:2.) Pian makasabid satan ya baley, manlapud Nazaret et manga 130 kilometro so biahien no say dalanen et diad Samaria ya ditan et nipalpalandey so dalan. Satan imay Betlehem ya laen di Jose, ta ditan so nanayaman na pamilya nen Arin David​—say pamilya ya nanlapuan nen Jose tan say asawa ton si Maria.

6, 7. (a) Akin et nairapay Maria ed pambiahe ra paonlad Betlehem? (b) Antoy kaukolan ya ikonsidera nen Maria sanen sanasawa la ra nen Jose? (Nengnengen met so footnote.)

6 Kasin suportaan nen Maria so desisyon nen Jose ya onla rad Betlehem anggano nairapan ed biahe? Posiblin bandad gapo ni labat na Oktubre ed saman, kanian anganko et wala lay tayaketek na uran ta mansamposampot lay tiagew. Sakey ni, say Betlehem et walad pasen ya manga 760 a metro so kaatagey to​—kanian talagan agaylay irap ya tatdangen, tan sabien toy pigaran agew. Lalo lad sikara di Maria ta seguradon kaukolan toy manpainawan lanang, kanian talagan ombayag so biahe ra. No say sakey a bii et asingger lay pananak to, mas labay ton dia labat ed abung kaibay pamilya to tan saray kakaaro to ya wadtan ya ontulong sano manpasakit la. Kaukolan sirin nen Maria ya pakpelay liknaan tod sayan biahe.

Mairap so biahe paonlad Betlehem

7 Anggaman ontan, unong ed insulat nen Lucas, si Jose et linma ya “manparehistro a kaiba nen Maria.” Insulat to met ya si Maria  et “nagmaliw lan asawa [nen Jose] unong ya akisipanan to.” (Luc. 2:4, 5) Lapud sanasawa la ra nen Jose, kaukolan to lan ikonsideray masiken to ed saray desisyon to. Si Jose la natan so ulo na pamilya, tan papablien nen Maria so inter na Dios ya betang to bilang katulongan na asawa to kanian labay ton lawas suportaan iray desisyon to. * Pinaneknekan toy pananisia to diad impanpasakop tod si Jose.

8. (a) Anto ni ray nayarin amakiwas ed si Maria ya milad si Jose diad Betlehem? (b) Akin et inspirasyon so alimbawa nen Maria ed saray matoor a totoo?

8 Anto ni nayarin amakiwas ed si Maria ya ontulok? Amta to kasi imay propesiya ya iyanak so Mesias ed Betlehem? Anggapoy ibabaga na Biblia. Balet posiblin amta to itan, ta saray lider na relihyon tan anggan saray ordinaryon totoo et pamilyar ed satan a propesiya. (Mat. 2:1-7; Juan 7:40-42) Sakey ni, aliwan ignorante si Maria ed Kasulatan. (Luc. 1:46-55) Antokaman so rason na impila nen Maria ed Betlehem​—balanglan lapud matulok ed masiken to, ed ganggan na gobierno, o lapud propesiya nen Jehova, odino amin na saraya​—nibaga tayon makapadinayew so alimbawa to. Aapresyaen a maong nen Jehova iray totoon mapaabeba tan matulok. Diad  panaon tayo, parad dakel ya totoo et agla importante so katutulok, kanian inspirasyon so alimbawa nen Maria ed saray matoor a totoo.

Nianak so Kristo

9, 10. (a) Anto kasi walad nonot di Maria tan Jose sanen asingger la rad Betlehem? (b) Iner so naugipan di Jose ta Maria, tan akin?

9 Seguradon akainaway Maria sanen anengneng ton asingger la rad Betlehem. Legan ya ontatatdang ira nen Jose, nalalabasan da iray tanemay olibo, ya say bunga na saratan et burboren diad bandad sampot la na taon. Anganko legan dan sankanengneng iratan, anonotan day istorya na sayan melag ya baley. Melmelag labat itan no ikomparad saray syudad na Juda ya singa imbaga nen propetan Miqueas; balet ditan nianak si Boaz, Noemi, tan ontan met nen David, masulok ya sanlibon taon lay apalabas.

10 Kasabi di Maria tan Jose diman, dakdakel la manayay totoo. Wala la ray akaunan sinmabi ya manparehistro, kanian anggapo lay naromog dan napanayaman da. * Say naugipan da laingen et diad kuwadra. Seguradon agaylay paga nen Jose legan ton nanenengneng so paniirap ya maong nen asawa to lapud nalilikna ton sakit, ya lalon onloloor diad ilalabas na oras. Diad karakel na lugar, dia nid kuwadra nabetan na impanpasakit si Maria.

11. (a) Akin et natalosan na saray bibii so irap nen Maria? (b) Anto ray rason akin et atukoy si Jesus ya “panguloan”?

11 Natalosan na saray bibii so irap nen Maria. Manga 4,000 taon antis to ’tan, impasakbay nen Jehova ya amin a bibii et nairapan a mananak lapud atawir ya kasalanan. (Gen. 3:16) Seguradon anggan si Maria et nanirap met. Diad salaysay nen Lucas, anggapoy espisipikon detalye ed irap ya alikna nen Maria, basta say nabasa tayo et: “Inyanak toy anak to a laki, say panguloan.” (Luc. 2:7) On, nianak lay “panguloan” nen Maria​—say sankaunaan ed manga pitoran anak to. (Mar. 6:3) Balet duma ’ya ed arum. Sikatoy aliwa labat lan panguloan nen Maria, noagta “panguloan na amin a pinalsa” nen Jehova, say bogbogtong ya Anak na Dios!​—Col. 1:15.

12. Iner so angiparukolan nen Maria ed ugaw, tan antoy pandumaan na tuan agawa ed ipapanengneng dad saray belen, palabas, odino diad saray painting?

12 Diad sayan punto et nabasa tayo imay detalyin amta na dakel a totoo: “Binalkot to na abel tan imparukol to ed atotong.” (Luc. 2:7) Diad interon mundo, sayan eksena et papasobraan da tan aliwan realistikoy ipapanengneng dad saray belen, palabas, odino diad saray painting. Balet isip mo pay talagan agawa. Say atotong et pamapakanan  ed ayayep. Insan lapud kuwadra may kawalaan da di Maria, siempre aliwan malinis tan seguradon ambanget. Anganko anggan siopan ateng et agto labay so mananak ditan, no wala labat komoy napampilian! Natural labat ed atateng ya labay dan iter so sankaabigan ed saray anak da. Di nagkalalo lay Jose tan Maria​—seguradon labalabay dan iter so sankaabigan ed Anak na Dios.

13. (a) Akin et nibaga tayon ginawa nin siansia nen Maria tan Jose so anggaay nayarian da anggano onmay situasyon da? (b) Panon ya naalig na saray atateng natan si Jose tan Maria?

13 Imbes ya naingongotay Maria tan Jose, ginawa da nin siansiay anggaay nayarian da anggano onmay situasyon da. Singa bilang, si Maria ya mismo so angasikaso ed samay kapkapangiyanak ya ugaw, maalwar ton binalkot na abel, insan to imparukol ed atotong pian makaugip. Sinegurado ton agnaketel imay ugaw tan arawid kapeligroan. Anggano mair-irap so situasyon, inasikaso ton maong so anak to. Amta ran dua nen Jose ya say sankaimportantian ya nagawaan da parad sayan ugaw et say pangibangat dad sikato ya aroey Jehova. (Basaen so Deuteronomio 6:6-8.) Diad panaon tayo, ontan met so ipaprayuridad na saray maaron atateng legan dan papabalegey ananak da diad sayan mundon agmamapablid espiritual iran bengatla.

Say Makapabiskeg ya Imbisita

14, 15. (a) Akin et labalabay ya nanengneng na saramay managpastol so ugaw? (b) Antoy ginawa na saray managpastol kayari dan anengneng so ugaw ed atotong?

14 Nagugunoyan balet et wala ray nitan lan managpastol. Labay dan nanengneng so pamilya di Jose, lalo la may ugaw. Eksayted iran maong tan malikeliket ira. Nanlalapu rad gilig na kapalandeyan ya pangipapastolan dad saray ayayep da. * Mankelaw ira di Maria tan Jose. Inistorya na sarayan managpastol so makapakelaw ya agawa. Pegley labi lad saman sanen walay nampanengneng ed sikara ya anghel diad gilig na kapalandeyan. Sinminag ed kaliberliber so gloria nen Jehova, tan imbaga na anghel ya say Kristo, odino Mesias et nianak lad Betlehem. Naromog da kuno so ugaw ya akarukol ed atotong tan abalkot na abel. Insan wala ni mas makapakelaw ya agawa​—nampanengneng so dakerakel ya anghel ya angidaydayew ed Dios!​—Luc. 2:8-14.

15 Kampega lan nanapuran linmad Betlehem irayan managpastol! Seguradon agaylay liket na sarayan mapaabeban lalaki sanen  anengneng day ugaw ya akarukol ed atotong ya singa imbaga na anghel. Impaamta dad arum iyan maong a balita. “Impakabat da imay nibaga ed sikara . . . Et nikelkelawan so amin ya akadngel ed saray bengatlan imbaga na saray managpastol.” (Luc. 2:17, 18) Nensaman, abebbebay pakanengneng na saray lider na relihyon ed saray managpastol. Anengneng tayo balet ed sayan agawa ya talagan papablien nen Jehova irayan mapaabeba tan matoor ya lalaki. Anto balet so epektod si Maria na imbisita ra?

Talagan papablien nen Jehova iramay mapaabeba tan matoor ya managpastol

16. Akin et nibaga tayon aralem ya mannonot si Maria, tan akin ya apansiansia ton mabiskeg so pananisia to?

16 Seguradon naknaksaway Maria ed impananak to, balet siansia nin dinmengel ed amin ya imbaga na saray managpastol. Balet aliwan satan labat. “Tinandaan nen Maria irayan amin a salita, tan minorekdek to so kabaliksan na saraya.” (Luc. 2:19) Talagan aralem ya mannonot iyan bii. Amta nen Maria ya importante imay mensahe na anghel. Labay nen Jehova ya naamtaan tan natalosan a maong nen Maria no siopa imay inyanak to tan no akin ya importante itan ya ugaw. Kanian aglabat basta dinmengel. Aliling to et insinop to iratan ya salita ed puso to pian walay dalepdepen to anggano bulan odino taotaon ni onlabas. Atan so sakey a rason no akin ya apansiansia nen Maria ya mabiskeg so pananisia to legay bilay to.​—Basaen so Hebreos 11:1.

Dinengel ya maong nen Maria so imbaga na saray managpastol tan insinop to iratan ya salita ed puso to

17. Panon tayon naalig si Maria no nipaakar ed espiritual iran katuaan?

17 Aligen mo kasi alimbawa nen Maria? Say Salita nen Jehova et napno na dakel ya importantin katuaan. Balet, makatulong labat iratan ed sikatayo no ikdan tayoy imano. Nagawaan tayo itan no inagew-agew tayon basaen so Biblia, tan ipasen tayo aliwan bilang ordinaryon libro, noagta bilang impuyan a Salita na Dios. (2 Tim. 3:16) Insan singa ginawa nen Maria, kaukolan ya isinop tayo iratan ya katuaan ed puso tayo, tan morekdeken tayo. No dalepdepen tayo ray nababasa tid Biblia, tan nonoten no panon tayon lalon niyaplika iray simbawa nen Jehova, ombiskeg so pananisia tayo.

Arum nin Balikas ya Tandaan nen Maria

18. (a) Panon ya tinulok di Maria tan Jose so Mosaikon Ganggan nen pigaran agew ni labat nen Jesus? (b) Antoy nibaga tayod situasyon na bilay di Jose tan Maria base ed samay imbagat dad templo?

18 Diad komawalon agew to may ugaw, impasegat di Maria tan  Jose ta atan so walad Mosaikon Ganggan. Jesus so inngaran dad sikato, unong ya imbaga nen anghel Gabriel. (Luc. 1:31) Insan diad koma 40 ya agew to, sikatoy inawit dad templo diad Jerusalem, a manga 10 kilometroy kaarawi tod Betlehem. Ditan et angiyapay iray bagat ya unong ed Ganggan et nayarin ibagat na saray mairap bilay​—duaran palekpek odino duaran malapati. Anganko, anggan panon et nababaingan ira di Jose tan Maria ta ag-ira makapangibagat na karnero tan palekpek ya singa arum ya atateng. Balet agda la pinunuyan itan ya liknaan da. Say importante, apaseseg iran maong legan iran wadman.​—Luc. 2:21-24.

19. (a) Anto ray imbaga nen Simeon ya seguradon impapuso nen Maria? (b) Antoy reaksion nen Ana sanen anengneng toy Jesus?

19 Walay inmasingger ed sikaran masiken ya say ngaran to et Simeon, tan sikatoy angibalikas na arum ni ran salita ya insinop nen Maria ed puso to. Insipan nen Jehova ed sayan masiken ya antis na ipatey to et nanengneng toy Mesias, tan impaamtad sikato na masanton espiritu ya say ugaw ya awit da di Maria so nipasakbay a Manangiliktar. Imbaga nen Simeon ed si Maria ya diad arapen et kaukolan ton itepel so irap, ya kuan ton singa itan andukey ya espada ya ontalos ed kamarerwa to. (Luc. 2:25-35) Anggano singa makapataktakot itan, nayarin saratan a salita so tinmulong ed si Maria ya makapansungdo sanen tinmua itan ya imbaga nen Simeon kalabas na 33 taon. Kayari nen Simeon, anengneng met na propetesan  si Ana so ugaw tan imbalita to ed amin ya manatalaran ed kiliktar na Jerusalem so nipaakar ed si Jesus.​—Basaen so Lucas 2:36-38.

Apaseseg ya maong si Maria tan Jose legan ya wala rad templo nen Jehova diad Jerusalem

20. Akin et ag-alingolingoy Jose tan Maria ed desisyon dan awitey anak da diad templo?

20 Ag-alingolingoy Jose tan Maria ed desisyon dan awitey Jesus ed templo nen Jehova diad Jerusalem! Satan la so gapo na regular ya iyakar na anak da diad templo legay bilay to. Legan iran wadman ed templo, inyapay dad si Jehova so sankaabigan ya walad sikara tan akaawat ira na panamaseseg. Seguradon mas binmiskeg so pananisia nen Maria, tan say puso to et napno na saray importantin katuaan ya lanang ton nodnonoten tan inabang ed arum.

21. Panon tayon naseguro ya lalon ombiskeg so pananisia tayo, singa si Maria?

21 Makapalikliket ya nanengneng iray atateng natan ya mangaalig ed alimbawa di Jose tan Maria. Diad Saray Tasi nen Jehova, lanang ya aawiten na saray ateng so ananak da ed saray Kristianon pantitipon. Gagawaen na sarayan atateng so anggaay nayarian dan pasesegen iray kaagian da. Tan kayari na sarayan pantitipon et onsempet iran mas binmiskeg, mas maliket, tan manleppuay puso ran manginabang na maabig iran bengatla ed arum. Makapaseseg so pitongtong ed sikara! No ontan so gawaen tayo, mas lalon ombiskeg so pananisia tayo, singa si Maria.

^ par. 7 Imanoen so pandumaan na sayan salaysay ed samay akadkaunan impanbiahe nen Maria: “Namparaan si Maria tan nanapuran linma” pian bisitaen si Elizabet. (Luc. 1:39) Diad saman a panaon, akisipanan lay Maria ed si Jose balet agni ra kasal, kanian sarag ni nen Maria so mandesisyon anggano agmanpatanir ed si Jose. Balet nen sanasawa la ra, si Jose la so nandesisyon ed samay impanbiahe ra.

^ par. 10 Niyugali nensaman ya diad kada baley et walay akaparaan ya lugar ya napampainawaan na saray manbiabiahe.

^ par. 14 Diad saman et walad paway iramay pastol kaiba da ray ayayep da. Paneknek iya ya agnianak si Jesus ed bulan na Disyembre, ta diad satan ya bulan et akapukok iray ayayep diad asingger ed abung na saray managpastol. Imbes, say inkianak to et nayarin diad bandad gapo na Oktubre.