Onlad karga

Onlad saray karga

 LEKSION 52

Saray Mandarlang ya Kabayo tan Karwahen Pan-guerra nen Jehova

Saray Mandarlang ya Kabayo tan Karwahen Pan-guerra nen Jehova

Say ari na Sirya ya si Ben-hadad et lanang ya onlulusob ed Israel. Balet kada no onlusob la ra, papasakbayan nen Eliseo so ari na Israel, kanian napapaliisan ira na ari. Lapud satan, labay nen Ben-hadad ya erelen si Eliseo. Naamtaan to ya walad syudad na Dotan si Eliseo, kanian angibaki na dakdakel ya sundalo na Sirya ya mangerel ed sikato.

Labi so inyakar dad Dotan. Kaimbuasan to, anengneng na lingkor nen Eliseo ya apaliberan so syudad na dakdakel ya sundalo, kabayo, tan karwahen pan-guerra. Natatakot ya maong kanian imbaga tod Eliseo: ‘Antoy gawaen tayo ey?’ Imbaga nen Eliseo: ‘Agka natatakot ta mas dakel so kaiba tayo nen say sikara.’ Tampol ya impanengneng nen Jehova ed lingkor nen Eliseo ya saray palandey ed paliber na syudad et napno na saray mandarlang ya kabayo tan karwahen pan-guerra.

Nen erelen la na saray sundalo na Sirya si Eliseo, impikasi to: ‘Jehova, bulag mo ra komon.’ Biglan agla amta na saray sundalo  no iner so kawalaan da, anta makanengneng met ira. Imbaga nen Eliseo ed saray sundalo: ‘Aliwa yay nakar yo. Tumbok yo ak, ta iyakar ta kayod samay laki ya aanapen yo.’ Kanian tinumbok day Eliseo anggad Samaria, ya kawalaan na ari na Israel.

Atrasado la nen naamtaan na saray Siryano ya wala ra manayad Samaria. Tinepetan na ari na Israel si Eliseo: ‘Anto ey, pateyen ko la ra?’ Sinamantala kasi nen Eliseo so ombawi ed sarayan totoo ya malabay ya mangerel ed sikato? Andi. Imbaga nen Eliseo ed ari: ‘Agmo ra papateyen. Pakan mo ra insan mo la ra pasempeten.’ Kanian pinakan iran amin na ari insan to la ra pinasempet ed Sirya.

“Walaan itayo na onian panagmatalek ed sikato, ya antokaman so kekerewen tayo unong ed linawa to, dedengelen to itayo.”​—1 Juan 5:14