Onlad karga

Onlad saray karga

 LEKSION 54

Maan-anos si Jehova ed si Jonas

Maan-anos si Jehova ed si Jonas

Diad syudad na Ninive ed Asirya, mauge-uges iray totoo. Ingganggan nen Jehova so propeta ton si Jonas ya onlad Ninive pian ibagad sikara ya tundaan da la ray mauges ya gagawaen da. Balet sananey ya lugar so nila nen Jonas. Linmugan ed barko ya paonlad Tarsis.

Nen wala lad pegley na dayat so barko, binmagyo ya makmaksil, kanian natatakot iray marino. Nampikasi ira ed saray dios da tan imbaga da: ‘Akin kasi et oniay nagagawa?’ Imbaga nen Jonas ed sikara: ‘Kasalanan ko, ta agko inunor so ipapagawa nen Jehova ed siak. Ipelag yo ak ed dayat pian ontunday bagyo.’ Agda komon labay ya ipelag si Jonas balet impilit to. Nen impelag dad dayat, tinmunday bagyo.

Inisip nen Jonas ya ompatey lad saman. Legan ya onlelereg ed dayat, nampikasi ed si Jehova. Angibaki si Jehova na balbaleg ya sira. Inakmon na sira si Jonas pero ag-inatey. Legan ya walad eges na sira, nampikasi lamet si Jonas: ‘Jehova, i-promise ko ya unoren ko lan amin so ibagam.’ Prinotektaan nen Jehova si Jonas kanian ag-inatey anggano taloy agew to ed eges na sira. Insan inyula na sira si Jonas diad amagan dalin.

Natan ta inligtas nen Jehova si Jonas, kasin agto la kaukolan so onlad Ninive? Andi. Ingganggan lamet nen Jehova si Jonas ya onla diman. Tan natan, inmunor lay Jonas. Linma tan imbaga tod saray  mauges ya totoo diman: ‘Kayari 40 ya agew, naderal so Ninive.’ Makapakelaw balet ta dinmengel iray taga Ninive tan anguman ira. Imbaga na ari na Ninive ed amin ya totoo diman: ‘Manpikasi kayod Dios tan magbabawi kayo, pian agto tayo la deralen.’ Nen anengneng nen Jehova ya magbabawi ira, agto la dineral so Ninive.

Mansyodot si Jonas ta ag-aderal so syudad. Isip mo pa: Maan-anos si Jehova ed si Jonas tan kinasian to, pero si Jonas agto nakakasian iray taga Ninive. Say ginawa to et yinmurong diad paway na syudad diad silong na tanaman ya tabyayong tan akasibangot. Insan nen alenes may tanaman, lalon mansyodot si Jonas. Kanian imbaga nen Jehova ed sikato: ‘Mas nakakasian mo ni yay tanaman nen saray taga Ninive. Agko ra dineral ta kinasian ko ra.’ Antoy labay ya ibangat nen Jehova ed si Jonas? Labay ton natalosan nen Jonas ya mas importante iray totoo ed Ninive nen say anggan anton tanaman.

“Si Jehova et . . . maan-anos ed sikayo ta agto labay a walay siopaman a naderal noagta labay to ya amin et naikday pankanawnawan magbabawi.”​—2 Pedro 3:9