Onlad karga

Onlad saray karga

 LEKSION 45

Naapag so Panarian

Naapag so Panarian

Nen si Jehova labat so dadayewen nen Solomon, walay kareenan ed Israel. Balet angasawa si Solomon na amayamay ya bibii ya nanlapud arum ya bansa tan mandadayew irad saray idolo. Kanian kalkalna ya anguman si Solomon, tan nandayew met la ed saray idolo. Nampasnok si Jehova. Imbaga tod si Solomon: ‘Ekalen kod pamilyam so panarian na Israel tan gawaen ko itan ya duaran panarian. Iter kod sakey ed saray lingkor mo so baleg ya parte, tan melag labat ya parte so uleyan na pamilyam.’

Pian mas malinew iyan desisyon nen Jehova, impaamta to itan diad sananey nin paraan. Nen walad dalan so sakey ya lingkor nen Solomon ya si Jeroboam, asabat to so propetan si Ahias. Pinilat nen Ahias so kawes to ed 12 ya piraso tan imbaga tod Jeroboam: ‘Ekalen nen Jehova so panarian na Israel ed pamilya nen Solomon tan gawaen to itan ya duaran panarian. Alam yay samploran piraso, ta sika so magmaliw ya ari na samploran tribu.’ Nen naamtaan itan nen Arin Solomon, labay ton pateyen si Jeroboam! Kanian tinmakas si Jeroboam tan linmad Ehipto. Nen inatey lay Solomon, say anak ton si Rehoboam so sinmalat ya ari. Diad saman et inisip nen Jeroboam ya sarag to lay ompawil ed Israel.

 Binilin na saray mamatatken ed Israel si Rehoboam: ‘No maong so pantratom ed saray totoo, tuloytuloy da kan suportaan bilang ari.’ Balet imbaga na saray kakaaro nen Rehoboam ya kaugawan to: ‘Pairap mo ray totoo! Gawam ya mas mairap so trabaho da!’ Say inunor nen Rehoboam et saray kakaaro to. Pinairap to ray totoo, kanian nanrebelde ira. Si Jeroboam so ginawa dan ari na samploran tribu, ya tinawag ya panarian na Israel. Say duaran tribu et tinawag ya panarian na Juda, tan matoor dan sinuportaan si Rehoboam. Kanian naapag la so 12 ya tribu na Israel.

Aglabay nen Jeroboam ya saray walad sakop to et onla nin mandayew ed Jerusalem, ya sakop na panarian nen Rehoboam. Antam no akin? Natatakot si Jeroboam ompan say suportaan da lan ari et si Rehoboam. Kanian nanggawa si Jeroboam na duaran balitok ya kilaw a baka tan imbaga tod totoo: ‘Arawdawi Jerusalem. Dia ki la mandayew.’ Kanian nandayew iray totoo ed saray balitok ya kilaw a baka tan nilingwanan da lamet si Jehova.

“Agkayo mikakasakey ed saray agmananisia. Ta panon a makapanulop so inkatunong tan kaugsan? . . . Odino antoy piparaan na sakey a mananisia ed sakey ya agmananisia?”​—2 Corinto 6:14, 15