Onlad karga

Onlad saray karga

 LEKSION 46

Subok Diad Palandey Carmel

Subok Diad Palandey Carmel

Amayamay so mauges ya nan-ari ed samploran tribu ya panarian na Israel, balet si Ahab so sakey ed saray sankaugesan. Say asawa to et mauge-uges met tan mandadayew ed Baal. Say ngaran to et Jezebel. Inimpluensyaan nen Ahab tan Jezebel iray totoo ya mandayew ed si Baal tan pinapatey da ray propeta nen Jehova. Antoy ginawa nen Jehova? Imbaki toy propetan Elias pian ibagad si Ahab so sakey a mensahe.

Imbaga nen Elias ed si Arin Ahab ya lapud mauge-uges iray gagawaen to, ag-onuran ed Israel. Masulok ya taloy taon ya anggapoy ani kanian naerasan iray totoo. Imbaki lamet nen Jehova si Elias ya onlad si Ahab. Imbaga na ari ed si Elias: ‘Sikay angawit na problema. Kasalanan mo yan amin!’ Inmebat si Elias: ‘Aliwan siak so akankasalanan. Sika, ta mandadayew kad Baal. Suboken tayo laingen no siopan talagay tuan Dios. Tipon mo ray totoo tan saray propeta nen Baal diad toktok na Palandey Carmel.’

Nantitipon iray totoo diad palandey. Imbaga nen Elias: ‘Mandesisyon kayo. No si Jehova so tuan Dios, sikato so unor yo. Balet no si Baal, unor kayod sikato. Suboken tayo. Mangiyapay na bagat iray 450 ya propeta nen Baal tan ontawag irad sikato, tan mangiyapay ak met na bagat tan ontawag ak ed si Jehova. Say Dios ya onebat panamegley na apoy et sikato so tuan Dios.’ Pinmayag iray totoo ed satan ya imbaga nen Elias.

Angiparaan na bagat iray propeta nen Baal. Sanagew iran ontatawag ed dios da: ‘O Baal, ebatan mo kami!’ Nen ag-onebat si Baal, inelek-elekan ira nen Elias. Imbaga to: ‘Ikasil yo ni pian narengel to. Ompan naugip, tan kaukolan ya bangonen.’ Tuloytuloy ya tinmawag iray propeta nen Baal anggad labi. Pero anggapo nin siansiay onebat.

Insan sinmublay si Elias. Inyan tod tapew na altar so bagat to tan kinalboan toy dakdakel ya danum. Insan nampikasi: ‘O Jehova, ipaamtam komon ed sarayan totoo ya sika so tuan Dios.’ Tampol ya angipelag si Jehova na apoy manlapud tawen tan apoolan so bagat. Inmeyag iray totoo: ‘Si Jehova so tuan Dios!’ Imbaga nen Elias:  ‘Agyo patatakasen iray propeta nen Baal!’ Diad saman ya agew et pinatey iray 450 ya propeta nen Baal.

Nen walay pinmaway ya melag ya lurem diad petek na dayat, imbaga nen Elias ed si Ahab: ‘Nitan lay maksil ya uran. Lugan ka lad karwahem, tan sempet ka la.’ Binmilunget so tawen tan sinmiplog so dagem, insan inmuran na makmaksil. Asalog a siansia so amagaan ya dalin! Pinelesan ya maong nen Ahab so karwahe to. Balet mas maples so batik nen Elias nen samay karwahe ta tinulongan nen Jehova! Pero, anggapo la kasi problema nen Elias? Nengnengen ta.

“Komon ta naamtaan na totoo a say ngaran mo et Jehova, a sika labat so Sankatagyan ed interon dalin.”​—Salmo 83:18