Onlad karga

Onlad saray karga

 LEKSION 33

Si Ruth tan si Noemi

Si Ruth tan si Noemi

Nen walay agawan eras ed Israel, nanayam ed Moab so sakey ya Israelitan bii ya say ngaran to et Noemi, kaiba toy asawa to tan duaran anak da ya lalaki. Ag-abayag, inatey so asawa nen Noemi. Aramay anak nen Noemi et angasawa na bibiin Moabita, si Ruth tan Orpa. Makapaermen balet ta inatey met so duaran anak nen Noemi.

Nen abalitaan nen Noemi ya anggapo lay eras ed Israel, nandesisyon ya ompawil la diman. Sikatoy inibaan nen Ruth tan Orpa, balet nen wala la rad dalan, imbaga nen Noemi ed sikara: ‘Maomaong kayon asawa ed saray anak ko tan maomaong kayon manugang. Komon makapiasawa kayo lamet. Pawil ki lad Moab.’ Imbaga nen Ruth tan Orpa: ‘Inar-aro mi kayo. Agmi kayo taynanan.’ Balet aminpigan imbaga nen Noemi ed sikara ya onsempet la ra. Kanian sinmempet lay Orpa, balet ag-inmalis si Ruth. Imbaga nen Noemi ed sikato: ‘Ni, ompapawil lay Orpa ed baley yo tan mandayew lad saray dios yo. Mila ka lad sikato.’ Balet imbaga nen Ruth: ‘Andi, mila ak ed sikayo. Say baley yo et baley ko met la, tan say Dios yo et Dios ko.’ Anto kasi alikna nen Noemi ed satan ya imbaga nen Ruth?

Nen sinmabid Israel si Ruth tan Noemi, kakkagapoy panag-ani na sebada. Sakey ya agew, linmay Ruth diad alog na lakin say ngaran to et Boaz, ya anak nen Rahab, pian mandokdok na ilik ya natitilak na saray manag-ani. Abalitaan nen Boaz ya si Ruth et Moabita tan akilad si Noemi lapud agto labay ya taynan. Imbaga nen Boaz ed saray manag-ani ya aruman day itilak dan ilik pian walay nadokdok nen Ruth.

 Diad saman ya labi, tinepet nen Noemi ed si Ruth: ‘Iner so nandokdokan moy ilik natan?’ Imbaga nen Ruth: ‘Diad alog na laki ya say ngaran to et Boaz.’ Imbaga nen Noemi: ‘Kanayon nen asawak si Boaz. Diman lay lanang ya pandokdokan mo kaiba iray arum nin bibii. Protektado ka diman.’

Kanian diad alog nen Boaz so lanang ya pandodokdokan nen Ruth anggad asumpal so panag-ani. Anengneng nen Boaz ya makulikulin bii si Ruth tan balibali ugali to. Diad panaon da, no say laki et inatey tan anggapoy anak to, say abalo ya asawa to et asawaen na kanayon to. Kanian nagmaliw ya asawa nen Boaz si Ruth. Awalaan ira na anak ya nginaranan day Obed, ya diad kalabas na panaon et nagmaliw ya laki nen Arin David. Malikeliket iray kakaaro nen Noemi. Imbaga dad sikato: ‘Inter nen Jehova ed sika si Ruth ya maomaong ed sika, tan natan et wala lay apom. Nirayew komon si Jehova.’

“Walay kaaro a mas mansiansia ed abay mo nen say sakey ya agi.”​—Proverbio 18:24