Onlad karga

Onlad saray karga

 LEKSION 36

Say Promise nen Jefte

Say Promise nen Jefte

Tinaynan lamet na saray Israelita si Jehova tan nandayew ira ed saray dios ya aliwan tua. Balet anggapoy agawaan na saratan ya dios nen nilusob tan nilabanan na saray Ammonita iray Israelita. Dakel ya taon ya nanirap iray Israelita. Asabi panaon, imbaga dad si Jehova: ‘Nankasalanan kami. Ipangasim ya iligtas mo kami ed saray kalaban mi.’ Dineral na saray Israelita iray imahen da tan nandayew lamet irad si Jehova. Aglabay nen Jehova ya tuloytuloy iran manirap.

Walay sundalo ya say ngaran to et Jefte. Sikato so pinilin magmaliw a lider na saray Israelita diad pilaban dad saray Ammonita. Imbaga tod si Jehova: ‘No tulongan mo kami ya manalo, i-promise kod sika ya kasempet kod abung, say unonan ompaway ya onabet ed siak et iter kod sika.’ Dinengel nen Jehova  so pikakasi nen Jefte tan tinulongan ton manalo ed guerra.

Kasempet nen Jefte, say unonan pinmaway ya onabet ed sikato et say mismon marikit to, say saksakey ya anak to, ya onsasayaw tan mantotogtog na tamburin. Anto kasi gawaen nen Jefte? Anonotan to may promise to kanian imbaga to: ‘Ay agi, ana’ko! Pinaermen mo ak. Walay im-promise kod si Jehova. Pian nagawaan koy im-promise ko, kaukolan ya ibaki ta ka ya manlingkor ed tabernakulo diad Silo.’ Balet imbaga na anak to: ‘Tay, no nam-promise kayod si Jehova, gawa yo. Say kerewen ko labat et nakaibak ni komon ya duay bulan diad palandey iray bibiin kakaarok. Kayari to, onla ak lad tabernakulo.’ Matoor ya nanlingkor ed tabernakulo so anak nen Jefte diad interon bilay to. Tinaon ya oonlad Silo iray kakaaro to pian ombisita ed sikato.

“Siopaman a mas inaro toy anak ton laki odino bii nen say siak et agmakana ed siak.”​—Mateo 10:37