Onlad karga

Onlad saray karga

 LEKSION 29

Pinili nen Jehova si Josue

Pinili nen Jehova si Josue

Abaybayag ya si Moises so lider na saray Israelita, balet natan et asingger lan ompatey. Imbaga nen Jehova ed sikato: ‘Aliwan sika so mangiyakar ed saray Israelita diad Insipan a Dalin. Balet ipanengneng ko itan ed sika.’ Imbaga nen Moises ya manpili komon si Jehova na balon lider ya mangasikaso ed saray totoo. Imbaga nen Jehova ed sikato: ‘La kad si Josue, tan ibagam ya sikatoy pinilik.’

Imbaga nen Moises ed saray Israelita ya sikatoy asingger lan ompatey tan si Josue so pinili nen Jehova ya mangiyakar ed sikara diad Insipan a Dalin. Insan imbaga nen Moises ed si Josue: ‘Agka natatakot. Tulongan ka nen Jehova.’ Ag-abayag, linma si Moises ed toktok na Palandey Nebo, tan impanengneng nen Jehova ed sikato so dalin ya im-promise Tod si Abraham, Isaac, tan Jacob. Si Moises et inatey nen 120 so taon to.

Imbaga nen Jehova ed si Josue: ‘Baliw kayod Ilog Jordan, tan la kayod Canaan. Tulongan ta ka ya singa ginawak ed si Moises. Nepeg mon basaen ya inagew-agew so Ganggan ko. Agka natatakot. Dapat matapang ka. La ka tan gawam so ingganggan kod sika.’

 Angibaki si Josue na duaran man-espiya ed syudad na Jerico. Diad onsublay ya istorya, naamtaan ta no antoy agawa diman. Kapawil da, imbaga dad si Josue ya aman la so balibalin panaon ya iyakar ed Canaan. Diad sinmublay ya agew, imbaga nen Josue ed saray Israelita ya manparaan la ran onalis. Insan imbaga tod saray saserdoten mangaawit ed kaban na sipanan ya unona la rad Ilog Jordan. Araldalem so ilog. Balet kadakat na saray saserdote ed danum, tinmunday agus na ilog, tan inmekat so danum! Nanakar iray saserdote anggad pegley na ilog tan inmalagey ira diman ya anggad akabaliw lan amin iray Israelita. Palagay mo, anonotan da met kasi may milagron ginawa nen Jehova ed Ambalangan Dayat?

Akasabin siansia iray Israelita diad Insipan a Dalin kayari na dakel ya taon. Sarag da lay manpaalagey na abung tan saray syudad. Sarag da lay ondalus tan mantanem na saray ubas tan kiew ya manbunga. Dakdakel ditan so gatas tan dilo.

“Naynay kan iwanwan nen Jehova tan peneken to ka anggan wala kad amagaan a dalin.”—Isaias 58:11