Onlad karga

Onlad saray karga

 LEKSION 32

Sakey ya Balon Lider tan Duaran Matapang ya Bii

Sakey ya Balon Lider tan Duaran Matapang ya Bii

Dakel ya taon ya si Josue so lider na totoo nen Jehova, balet sikatoy inatey nen 110 so taon to. Nen mabilay ni Josue, si Jehova so dadayewen na saray Israelita. Balet nen inatey la, nandayew irad saray imahen, ya singa gagawaen na saray Canaanita. Lanang ya ag-uunoren na saray Israelita si Jehova kanian pinaulyan ton pairapen ira na sakey ya ari na Canaan ya say ngaran to et Jabin. Akikasi iray Israelita ed si Jehova ya tulongan to ra. Kanian inikdan ira nen Jehova na balon lider, si Barak. Tulongan ira nen Barak ya mandayew lamet ed si Jehova.

Si Debora, ya sakey ya propetesa, et impatawag toy Barak tan walay imbaga ton mensahe ya nanlapud si Jehova, a kuan to: ‘Mangipila ka na 10,000 ya lalaki tan milaban kayod saray sundalo nen Jabin diad kulos na Kison. Diman et taloen moy Sisera, say lider na saray sundalo nen Jabin.’ Imbaga nen Barak ed si Debora: ‘Onla ak basta mila ka.’ Say kuan nen Debora: ‘Sige, mila ak. Balet aliwan sika so mamatey ed si Sisera. Imbaga nen Jehova ya bii so mamatey ed sikato.’

Akila si Debora ed si Barak tan ed saray sundalo to tan tinmatdang irad Palandey Tabor pian manparaan iran mi-guerra.  Nen naamtaan itan nen Sisera, tinipon ton tampol iray karwahe ton pan-guerra tan saray sundalo to diad leksab na palandey. Imbaga nen Debora ed si Barak: ‘Panaloen ka nen Jehova ed sayan agew.’ Inmepas ed palandey si Barak tan say 10,000 ya sundalo to tan nilusob da ray kalaban da.

Pinaleppua nen Jehova so danum ed kulos na Kison. Nikutep ed pitek iray karwahe nen Sisera. Kanian intilak to lay karwahe to tan batik la. Atalo nen Barak tan saray sundalo to iray sundalo nen Sisera, balet tinmakas si Sisera! Inmamot ed tolda na biin say ngaran to et Jael. Pinainum nen Jael na gatas si Sisera insan to inulesan. Akaugip iyan naksawan ya sundalo. Angalay Jael na palpal na tolda tan agnampalikas ya inmasingger insan to impanek itan ed ulo nen Sisera. Kanian inatey si Sisera.

Aanapen nen Barak si Sisera. Pinmaway si Jael ed tolda to tan imbaga tod si Barak: ‘Loob ka, ta wadia may lakin aanapen mo.’ Linmoob si Barak tan anengneng to ya inatey lay Sisera. Insan angansion si Barak tan Debora pian idayew si Jehova ta tinulongan to ray Israelita ya taloen iray kalaban da. Diad sinmublay ya 40 ya taon et anggapoy kalaban na Israel.

“Saray bibiin mangiyaabawag na maong a balita et baleg ya armada.”—Salmo 68:11