Onlad karga

Onlad saray karga

 LEKSION 94

Akaawat na Masanton Espiritu Iray Disipulo

Akaawat na Masanton Espiritu Iray Disipulo

Nen Pentecostes 33 C.E., samploran agew kapawil nen Jesus ed tawen, saray disipulo to et akaawat na masanton espiritu. Diad saman et linmad Jerusalem iray totoon nanlapud nanduruman lugar pian mipiesta. Nantitipon so manga 120 ya disipulo nen Jesus diad kuarto ed tagey na sakey ya abung. Insan biglan walay agawa ya makapakelaw. Walay singa apoy ya dinmapo ed ulo na kada disipulo, tan amin da et akapansalita na nanduruman lenguahe. Walay tanol na singa maksil a dagem ya manungol ed interon abung.

Saray totoon linmad Jerusalem ya nanlapud arum ya bansa et arengel da so ungol, kanian batik irad saman ya abung pian nengnengen no antoy nagagawa. Mankelaw ira nen arengel da iray disipulo ya mansasalita na nanduruman lenguahe. Imbaga da: ‘Di ba, taga Galilea iraya? Akin balet et makapansalita ira na lenguahe tayo?’

Insan inmalagey si Pedro tan saray arum ya apostol diad arap na dakel ya totoo. Impaliwawa nen Pedro no panon ya pinatey si  Jesus balet ta binilay lamet nen Jehova. Imbaga nen Pedro: ‘Natan et wala lad tawen si Jesus diad nikawanan na Dios, tan inkalbo to imay im-promise ton masanton espiritu. Atan so rason no akin ya anengneng tan arengel yo irayan milagro.’

Akasabid puso na totoo iray imbaga nen Pedro, kanian tinepet da: “Antoy nepeg min gawaen?” Imbaga tod sikara: ‘Magbabawi kayo ed saray kasalanan yo tan manpabautismo kayo ed ngaran nen Jesus. Makaawat kayo met na regalo ya masanton espiritu.’ Diad saman ya agew et manga 3,000 so nampabautismo. Manlapu lad saman, mapmaples ya dinmakel so disipulo diad Jerusalem. Tinulongan na masanton espiritu iray apostol ya makabuo na saray kongregasyon pian nibangat da ed saray disipulo so amin ya ingganggan nen Jesus ed sikara.

“No diad sangim et iyaabawag mon si Jesus so Katawan, tan diad pusom et ipapatnag moy pananisia a sikatoy pinaoli na Dios manlapud inaatey, niliktar ka.”​—Roma 10:9