Onlad karga

Onlad saray karga

 LEKSION 87

Sampot Lan Pangdem nen Jesus

Sampot Lan Pangdem nen Jesus

Say Paskua et seselebraan na saray Judio kada taon diad koma-14 ya agew ed bulan na Nisan. Gagawaen da itan pian nanonotan da no panon iran inligtas nen Jehova ed Ehipto tan inyakar to ra ed Insipan a Dalin. Nen taon 33 C.E., sinelebraan nen Jesus tan saray apostol to so Paskua diad kuarto ed tagey na sakey ya abung diad Jerusalem. Kayari dan angan, imbaga nen Jesus: ‘Sakey ed sikayo so mantraidor ed siak.’ Abigla iray apostol, tan tinepet da ed si Jesus: ‘Siopa ey?’ Imbaga nen Jesus: ‘Amay pangiteran ko ed sayan tinapay.’ Insan to inter so tinapay ed si Judas Iscariote. Inmalagey ya tampol si Judas tan inmalis la.

Insan nampikasi si Jesus, pinisag-pisag to ray tinapay, tan inderew tod saray akeran apostol to. Imbaga to: ‘Akan yo yan tinapay. Isisimbolo na saya so laman ko, ya iter ko parad sikayo.’ Insan nampikasi lamet parad alak tan inderew tod saray apostol to. Imbaga to: ‘Inum yo yan alak. Isisimbolo na saya so dalak, ya iter ko pian naperdona iray kasalanan. I-promise kod sikayo ya magmaliw kayon ari ya nakaibak ed tawen. Dapat yon gawaen iya kada taon pian nanonotan yo ak.’ Anggad natan, mantitipon nin siansia iray patumbok nen Jesus kada taon parad satan ya okasyon. Satan ya pantitipon et tatawagen natan ya Pangdem na Katawan.

 Balet kayari dan angan, nankokolkol iray apostol no siopa ed sikara so sankaimportantian. Balet imbaga nen Jesus: ‘Say sankamanunaan ed sikayo et samay iisipen ton sikatoy sankayugtanan tan sankaabebaan.

‘Kakaaro ta kayo. Kanian ibabagak ed sikayo so amin ya labay nen Amak ya naamtaan yo. Magano ak lan onla ed Amak diad tawen. Natilak kayo ni dia, tan naamtaan na totoo ya disipulo ta kayo no manaaroan kayo. Dapat yon aroen so sakey tan sakey ya singa impangarok ed sikayo.’

Insan la nampikasi si Jesus, ya kinerew tod si Jehova ya protektaan Toy amin ya disipulo. Kinerew to met ed si Jehova ya tulongan To ran mankimey ya nankakasakey. Impikasi to ya napasanto komon so ngaran nen Jehova. Kayari to, angansion si Jesus tan saray apostol na panangidayew ed si Jehova, insan la ra pinmaway. Asingger lan erelen si Jesus.

“Agkayo natatakot, melag a pulok, ta inabobonan la na Ama yo so pangiter ed sikayo na Panarian.”​—Lucas 12:32