Onlad karga

Onlad saray karga

 LEKSION 80

Nampili si Jesus na Labinduan Apostol

Nampili si Jesus na Labinduan Apostol

Nen manga sakey tan kapalduan taon lan manpupulong si Jesus, kaukolan toy manggawa na sakey ya importantin desisyon. Siopa ray pilien to ya nakaiba ton lanang ya manpulong? Siopa ray ipasal to ya mangasikaso ed kongregasyon na saray Kristiano? Labay nen Jesus so manpatulong ed si Jehova ed pampili to. Kanian linman bukor ed palandey tan sanlabin nampikasi. Kaimbuasan to, tinawag nen Jesus so pigaran disipulo to tan nampili na 12 ya apostol to. Antam so ngaran da? Say ngaran da et Pedro, Andres, Santiago, Juan, Felipe, Bartolome, Tomas, Mateo, Santiago ya anak nen Alfeo, Tadeo, Simon, tan Judas Iscariote.

Andres, Pedro, Felipe, Santiago

Sarayan Labindua so lanang ya kaiba nen Jesus. Nen nipasal to la ra, imbaki to ran manpulong ya sikara lan bukor. Inikdan ira nen Jehova na pakayarin papawayen iray demonyo ed saray aselepan tan paabigen iray mansasakit.

Juan, Mateo, Bartolome, Tomas

Imbaga nen Jesus ya kakaaro to irayan Labindua. Walay tiwala nen Jesus ed sikara. Inisip na saray Fariseo ya saray apostol et abebay-aral da tan ordinaryo labat iran totoo. Balet impasal iran  maong nen Jesus ya manpulong tan manbangat. Nakaiba ira nen Jesus diad sankaimportantian iran panaon ed bilay to, singa bilang diad antis na ipatey to tan kayari na ibilay to lamet. Dakel ed sarayan Labindua et tagad Galilea, ya singa si Jesus. Say arum ed sikara et walaay asawa.

Santiago ya anak nen Alfeo, Judas Iscariote, Tadeo, Simon

Aliwan perpekto iray apostol kanian nalilingo met ira. No maminsan, basta labat ira mansasalita ya agda la nononoten so ibabaga da, tan wala ray aliwa ya desisyon da. No maminsan anggapoy anos da. Aminpiga ni ra ingen ya nankolkol no siopa ed sikara so mas importante. Balet maomaong iran totoo tan inaro day Jehova. Sikara so manpabiskeg ed kongregasyon na saray Kristiano no anggapo lay Jesus diad dalin.

“Tinawag ta kayon kakaarok, lapud impaamtak lad sikayo so amin a nadngel kod Amak.”​—Juan 15:15