Onlad karga

Onlad saray karga

 LEKSION 60

Panarian ya Agbalot Nasalatan

Panarian ya Agbalot Nasalatan

Aminsan ya labi, walay nikadkaduman akugip nen Arin Nabucodonosor. Lapud satan, aburidon maong so ari tan agmakaugip. Impatawag to ray magician to tan imbaga tod sikara: ‘Ibaga yod siak no antoy labay ya ibaga na akugip ko.’ Say kuan da: ‘Ibaga yod sikami no antoy akugip yo, O ari.’ Balet imbagad sikara nen Nabucodonosor: ‘Andi! Ibaga yod siak no anto may akugip ko, ta no andi, pateyen ta kayo.’ Imbaga da lamet ed sikato: ‘Ibaga yo sirin ed sikami no antoy akugip yo, pian amta mi no antoy labay ton ibaga.’ Imbaga na ari: ‘Lolokoen yo ak. Ibaga yod siak no anto may akugip ko!’ Imbaga dad ari: ‘Imposible tay ipapagawa yo. Anggan siopan too, agto itan sarag ya gawaen.’

Mamapasnok si Nabucodonosor kanian ingganggan to ya pateyen so amin ya marunong a lalaki ed Babilonia. Kaibad satan si Daniel, Sadrac, Mesac, tan Abednego. Akikasi Daniel ed ari ya ikdan toy panaon. Nampikasi si Daniel tan saray kakaaro to ed si Jehova ya tulongan to ra. Anto kasi ginawa nen Jehova?

Panamegley na pasingawey, impanengneng nen Jehova ed si Daniel so kugip nen Nabucodonosor tan no antoy labay ya ibaga na satan. Diad tinmumbok ya agew, linmay Daniel ed lingkor na ari tan imbaga to: ‘Agyo papateyen iray marunong ya lalaki. Amtak la so labay ya ibaga na kugip na ari.’ Intagar na lingkor si Daniel ed si Nabucodonosor. Insan imbaga nen Daniel ed ari: ‘Diad kugip mo et impaamta na Dios ed sika no antoy nagawad arapen. Nia so akugip mo: Akanengneng kay balbaleg ya estatua ya say ulo to et gawad balitok, say pagew tan saray taklay to et pilak, say eges tan saray ulpo to et gansa, saray bikking to et balatyang, tan saray sali to et balatyang ya walay laok ton pitek. Insan walay bato ya atapyas ed palandey, tan kinmena ed sali na estatua. Kanian atemek so estatua tan nagmaliw ya dabok insan intikyab na dagem. Amay bato et nagmaliw ya baleg ya palandey, tan asakop toy interon dalin.’

 Insan imbaga nen Daniel ed ari: ‘Oniay labay ya ibaga na kugip mo: Samay ulo ya gawad balitok et say panarian mo. Say pilak et say panarian ya onsublay ed sika. Insan salatan itan na panarian a singa gansa tan uleyan toy interon dalin. Say onsublay ya panarian et mabiskeg ya singa balatyang. Say sampot et naapag-apag ya panarian ya say arum a parte et mabiskeg a singa balatyang tan say arum a parte et makapuy a singa pitek. Amay bato ya nagmaliw ya palandey et say Panarian na Dios. Deralen to irayan amin ya panarian tan aglan balot nasalatan.’

Tinmalimukor ed arapan nen Daniel si Nabucodonosor tan imbaga to: ‘Impaamta ed sika na Dios mo iyan kugip. Anggapo so Dios ya mipara ed sikato.’ Kanian agpinatey nen Nabucodonosor si Daniel. Ginawa to ni ingen ya lider na amin ya marunong ya lalaki. Ginawa to met ya manuley ed interon probinsya na Babilonia. Talagan inebatan nen Jehova so pikakasi nen Daniel, awa?

“Tinipon da ra ed pasen a tatawagen ed Hebreo ya Armagedon.”​—Apocalipsis 16:16