Onlad karga

Onlad saray karga

 LEKSION 64

Si Daniel Diad Kulongan na Saray Leon

Si Daniel Diad Kulongan na Saray Leon

Si Dario ya Medo et nan-ari met ed Babilonia. Anengneng to ya duman maong si Daniel komparad arum nin atagey ya opisyal. Kanian si Daniel so pinili ton lider na saray lalakin atagey so posisyon da ed Babilonia. Nainggit irayan lalaki ed si Daniel kanian labay dan ompatey. Amta ra ya diad sanagew et mamitlon manpipikasi si Daniel ed si Jehova. Kanian imbaga dad si Dario: ‘O ari, wala komon so ganggan ya sika labat so nepeg ya pampikasian na amin. Say ag-onunor ed sayan ganggan et nepeg ya ibuntok ed abot ya pangikukulongan ed saray leon.’ Agustoan itan nen Dario, kanian pinirmaan to so ganggan.

Nen naamtaan nen Daniel so balon ganggan, linman tampol ed abung to. Inmarap ed akalukas ya bintana, tinmalimukor, tan nampikasi ed si Jehova. Biglan linmoob ed abung nen Daniel iramay lalakin nainggit ed sikato tan asabian dan manpipikasi. Indalem dan tampol ed si Dario. Say kuan da: ‘O ari, agto ka labay ya unoren nen Daniel. Mamitlod sanagew ya manpipikasi ed Dios to.’ Maong ya too si Daniel kanian aglabay nen Dario ya ompatey. Sanagew ya nannonot so ari no panon ton niligtas si Daniel. Balet anggan say ari et agto sarag ya umanen so ganggan ya pinirmaan to la. Kanian apilitan so ari ya iganggan  ya ibuntok si Daniel ed kulongan na saray masibeg a leon.

Diad saman ya labi, aburidon maong si Dario kanian agmakaugip. Kabkabuasan ni labat et inapura toy linma ya tinmakiling ed abot na kulongan na saray leon tan inyeyag to: ‘Daniel, inligtas ka na Dios mo?’

Walay boses ya arengel nen Dario. Si Daniel! Imbaga tod si Dario: ‘Pinepetan na anghel nen Jehova so sangi na saray leon. Kanian agda ak kinetket.’ Manliket si Dario! Impaagwat toy Daniel ed kulongan na leon. Anggapoy anggan sakey ya guyames nen Daniel. Insan ingganggan na ari: ‘Ibuntok yod kulongan na leon iramay angidalem ed si Daniel.’ Kapangibuntok dad saramay lalaki, inakan iran tampol na saray leon.

Ingganggan nen Dario ed amin ya walad sakop to: ‘Nepeg yon takotan so Dios nen Daniel. Inligtas toy Daniel ed saray leon.’

Sika ey, inagew-agew ka met ya manpipikasi ed si Jehova, singa si Daniel?

“Amta nen Jehova no panon ya iliktar ed subok iray totoon walaan na debosyon ed Dios.”​—2 Pedro 2:9