Onlad karga

Onlad saray karga

Sulat na Mananguley ya Ulop

Sulat na Mananguley ya Ulop

Inad-aro min agi:

Seguradon pamilyar kan maslak ya walad Biblia et istoryay bilay na totoo. Dakel ed sikara et matoor ya lalaki tan bibii ya miparad sikatayo iray subok ya inarap da, tan walay “liknaan a singa sikatayo.” (Santiago 5:17) Say arum et dakel so dinadalan dan problema tan kapagaan. Wala ray asakitan ed ginawa na kapamilya o kapara dan mananisia. Tan wala ra met so pinairap na konsiensia ra lapud agawaan dan kasalanan.

Kanian wala ray inmarawid si Jehova. Balet talaga kasin tinaynan da lay Jehova? Andi. Dakel ed sikara et singa samay salmista ya nampikasin: “[Akaarawi] ak nensaman a singa sakey ya abalang a karnero; anap mo so aripen mo; ta agko lingwanan so saray ganggan mo.” (Salmo 119:176) Ontan met kasi naliliknam?

Agbalot lingwanan nen Jehova iramay akaarawid pulok to. Sikatoy onaasingger ed sikara—mabetbet et panamegley na saray agagi. Singa bilang, ikonsidera pa no panon ya tinulongan nen Jehova so lingkor ton si Job ya dakel so probleman dinalan to​—biglan inmirap so bilay to, inatey iray ananak to, tan nansakit na grabe. Inanosan met nen Job iray ansasakit ya salita na saramay onsuporta komon ed sikato. Anggano walay panaon ya aliway inisip to, agton balot tinaynan si Jehova. (Job 1:22; 2:10) Balet, panon ya tinulongan nen Jehova?

Sakey ya paraan et inusar nen Jehova si Elihu ya lingkor met na Dios. Nen imbaga nen Job iray kapagaan to, dinmengel si Elihu kanian apakiwas ya mansalita. Antoy ibaga to ey? Balawen to kasi Job? Konsiensiaen to kasi o pabaingan to pian namoria nen Job so lingo to? Inisip to kasin mas maong ni nen si Job? Andi! Oniay imbaga nen Elihu ya pinakiwas na masanton espiritu: ‘Singa met sika, gawa ak met ed dalin.’ Insan to impasegurod si Job ya agnepeg ya ontakot tan agnadedesdes ed sikato. (Job 33:6, 7) Imbes ya aruman nen Elihu iray nantatabunan lan problema nen Job, maar-aro ton sinimbawa tan pinaseseg.

Ontan met nen ipaparaan mi yan brosyur. Dinmengel kami ni, insan mi inkonsideran maong iray situasyon tan istorya na saray akaarawid kongregasyon. (Uliran 18:13) Insan mi kinonsultay Biblia, manpipikasi kami nen aaralen mi ray salaysay no panon ya tinulongan nen Jehova iray lingkor to nensaman ya dinmalan met ed ontan iran kipapasen. Insan, impaniba mi iratan ya salaysay ed Biblia tan saray eksperiensyad panaon tayo pian nagawa iyan brosyur. Pasesegen mi kan basaen tan dalepdepen iya. Labay min naamtaan mo ya inad-aro mi ka.

Mananguley ya Ulop na Saray Tasi nen Jehova