Onlad karga

Antoy Pangipapasen Mod Biblia?

Antoy Pangipapasen Mod Biblia?

Kasin satan ya libro et . . .

  • ginawa na matatalinon totoo?

  • is-istorya labat so ibabaga to?

  • Salita na Dios?

 SAY IBABAGA NA BIBLIA

“Say interon Kasulatan et impuyan [o impaisulat] na Dios.”—2 Timoteo 3:16, Balon Mundo a Patalos.

SAY NITULONG TOD SIKA

Naamtaan moy ebat ed importante iran tepet.Proverbio 2:1-5.

Igiya toy bilay mo ed dugan direksion.Salmo 119:105.

Ikdan to kay seguradon pag-asa.Roma 15:4.

 TUA KASI IBABAGA NA BIBLIA?

On, tan nia so taloran rason:

  • Agmankokontraan. Say Biblia et insulat na manga 40 ya nanduruman totoo diad loob na 1,600 ya taon. Maslak ed sikara et agda personal ya akabat so sakey tan sakey. Balet mankokonektaan so amin ya akasulat ed Biblia tan say manunan mensahe to et tungkol ed ngaran tan Panarian na Dios!

  • Aliwan matila iray nansulat. Maslak ed saray nansulat na history et inyamot day impakatalo na bansa ra. Duma balet iray nansulat na Biblia ta prangka dan insulat iray lingo na bansa ra tan anggan saray mismon kasalanan da.—2 Awaran 36:15, 16; Salmo 51:1-4.

  • Amin iray akasulat ditan ya propesiya et nagagawa. Manga 2,000 ya taon lay apalabas, akasulat la ed Biblia ya magmaliw ya mapeligro tan mair-irap so panaon tayo tan magmaliw ya aliwliwa iray ugali na totoo.—Mateo 24:7, 8; 2 Timoteo 3:1-5.

    Dakel ni ray akasulat ed Biblia ya tinmua anggad sankamelagan ya detalye. Prueba iratan a sayan libro et talagan impaisulat na Dios!—2 Pedro 1:21.

 ISIPEN PA

Panon ya makatulong so Salita na Dios pian magmaliw ya maliket so bilay mo?

Nabasa so ebat na Biblia diad ISAIAS 48:17, 18 tan 2 TIMOTEO 3:16, 17.