Onlad karga

Onlad saray karga

 KAPITULO 16

Mantitipon Pian Mandayew

Mantitipon Pian Mandayew

KARGA NA KAPITULO

No panoy inggapo tan inyaligwas na saray pantitipon tayo tan no antoy kaimportantian na saratan

1. Nen nantitipon iray disipulo, antoy naawat dan tulong, tan akin et kaukolan da itan?

AG-ABAYAG kayari inkioli nen Jesus, nantitipon iray disipulo pian manpapasesegan. Balet, intalak da ray puerta ta natatakot irad saray mamubusol ed sikara. Seguradon naandi takot da nen nampanengneng si Jesus ed sikara tan inkuan to: “Awat yo so masanton espiritu”! (Basaen so Juan 20:19-22.) Insan, nantitipon ira lamet, tan inkalbo nen Jehova ed sikara so masanton espiritu. Talagan apabiskeg iran manpulong!​—Gawa 2:1-7.

2. (a) Panon itayon papabiskegen nen Jehova, tan akin et kaukolan tayo itan? (b) Akin et importantin maong so Panagdayew na Pamilya? (Nengnengen so footnote tan kahon ya “ Panagdayew na Pamilya.”)

2 Singa saray agagi tayo nen inmunan siglo, naeeksperiensya tayo met natan iray subok ya adalan da. (1 Ped. 5:9) No maminsan, saray arum ed sikatayo et nadaeg na takot ed too. Tan kaukolan tayoy biskeg ya iiter nen Jehova pian makapan-anos ya manpulong. (Efe. 6:10) Itatarya to itan diad saray aral tayo. Diad kaplesan et pribilehyo tayoy onatendid duaran sinimba ya pantitipon​—say Pantitipon Parad Publiko, Panagaral na Panag-bantayan, pantitipon ed midweek a tatawagen ya Ministeryo tan Bilay na Kristiano. * Maliket tayo met ya aatendian so apatiran tinaon ya pantitipon tayo​—say regional a kombension, duaran sirkiton asemblea, tan say Memoryal na impatey na Kristo. Akin et kaukolan ya atendian tayo iratan ya amin? Panoy inggapo tan inyaligwas na saray modernon agew a pantitipon tayo? Tan antoy ipapanengneng na panmoria tayod pantitipon nipaakar ed sikatayo?

Akin et Mantitipon?

3, 4. Antoy kakaukolanen nen Jehova ed saray totoo to? Mangiter na alimbawa.

3 Abayag lan kakaukolanen nen Jehova ya mantitipon iray lingkor to pian mandayew ed sikato. Singa bilang nen 1513 B.C.E., inter toy Ganggan ed bansan Israel, tan kaibad satan so sinimban Sabaton pian makapandayew so kada pamilya tan nibangat nipaakar ed Ganggan. (Deu. 5:12; 6:4-9) Nen inunor na saray Israelita itan ya instruksion, apaseseg iray pamilya tan nansiansian malinis tan mabiskeg ed espiritual so bansa. Nen agda inunor so Ganggan, tan imbaliwala  da ray kakaukolanen a singa say regular ya pantitipon pian dayewen si Jehova, naandi pabor tod sikara.​—Lev. 10:11; 26:31-35; 2 Awa. 36:20, 21.

4 Imanoen met so alimbawa nen Jesus. Niyugali toy sinimban onlad sinagoga diad agew na Sabaton. (Luc. 4:16) Kayari impatey tan inkioli to, intultuloy na saray disipulo so niyugali ran regular a pantitipon anggano inekal lay Sabaton. (Gawa 1:6, 12-14; 2:1-4; Roma 14:5; Col. 2:13, 14) Diad saraman a pantitipon, aglabat akaawat na instruksion tan panamaseseg iray inmunan siglon Kristiano noagta indayew da met so Dios panamegley na saray pikakasi, komento, tan kansion.​—Col. 3:16; Heb. 13:15.

Nantitipon iray disipulo nen Jesus pian manpapabiskegan tan manpapasesegan

5. Akin et onaatendi tayod sinimban aral tan tinaon iran asemblea tan kombension? (Nengnengen met so kahon ya “ Tinaon a Pantitipon Pian Mankakasakey so Totoo na Dios.”.)

5 Ontan met natan, no onaatendi tayod sinimban aral tan tinaon iran asemblea tan kombension, ipapanengneng tayon susuportaan tayoy Panarian na Dios, naaawat tayoy biskeg manlapud masanton espiritu, tan napapaseseg tayoy arum diad pangipapatnag tayoy pananisia. Nagkalalo ed amin, pankanawnawa tayon idayew si Jehova panamegley na saray pikakasi, komento, tan kansion. Nayarin midumaay inkaorganisa na saray aral tayo natan no ikomparad pantitipon na saray Israelita tan saray inmunan siglon Kristiano. Balet, parehon importante iratan. Panon ya ginmapo tan inmaligwas iray modernon agew ya pantitipon tayo?

Sinimban Aral ya Mangipapaseseg a “Mangaro tan Manggawa na Maabig”

6, 7. (a) Antoy gagala na saray aral tayo? (b) Antoy pandumaan na saray aral na pigapigaran grupo?

6 Nen ginapoan nen Brother Charles Taze Russell ya anapey katuaan diad Salita na Dios, amoria ton kaukolan toy  mitipon ed saray kapara ton manaanap met ed katuaan. Nen 1879, oniay insulat nen Russell: “Siak tan saray kaibak diad Pittsburgh et angorganisa na regular ya panagaral ed Biblia pian usisaen itan, kada Simba et mantitipon kami.” Pinaseseg iray manbabasa na Zion’s Watch Tower ya mantitipon, tan nen 1881, ginawa iray aral diad Pittsburgh, Pennsylvania, kada Simba tan Mierkoles. Imbaga na Nobyembre 1895 ya isyu na Watch Tower ya say gagala na saraman a pantitipon et pian “manuulop iray Kristiano, manaaroan tan manpapabiskegan” tan pian walay pankanawnawa na saray inmatendi ya manpapasesegan.​—Basaen so Hebreos 10:24, 25.

7 Diad dakel a taon, agnampaparay inkaorganisa tan kabetbet na saray aral na nanduruman grupo na Saray Estudyante na Biblia. Singa bilang, oniay insulat na sakey a grupo ed America ya im-publish nen 1911: “Diad loob na sakey simba, maminlima kamin mantitipon.” Gagawaen da itan kada Lunes, Mierkoles, Biernes, tan mamiduad Simba. Onia ni insulat na sakey a grupo ed Africa ya im-publish nen 1914: “Mamiduad sakey bulan kamin mantitipon, manlapud Biernes ya anggad Simba.” Balet asabi panaon, inuman so inkaorganisa na saray aral tayo. Amtaen tayon magano so history na kada aral.

8. Anto ray pigaran tema ed publikon paliwawa nensaman?

8 Pantitipon Parad Publiko. Nen 1880, sanen ginapoan nen Brother Russell ya im-publish so Zion’s Watch Tower, inalig toy alimbawa nen Jesus tan linmad nanduruman lugar pian manpulong. (Luc. 4:43) Diad satan et inggapo nen Brother Russell so pangaligan ed Pantitipon Parad Publiko. Diad Watch Tower et impakabat so biahe nen Russell tan nabasa ditan ya sikatoy “maliket ya manpaliwawa ed publiko ‘nipaakar ed panarian na Dios.’” Nen 1911, kayarin niletneg iray klase odino kongregasyon diad pigaran bansa, pinaseseg so kada klase ya mangibaki na kualipikadon espiker ed nanduruman lugar pian mangiter na anemiran lektyur nipaakar ed panangukom, dondon, tan arum ni. Kayari na kada paliwawa, iyaanunsio lay ngaran na espiker tan tema na paliwawa ed ontumbok a simba.

9. Panon ya inuman so Pantitipon Parad Publiko diad inlabas na saray taon, tan panon mon nasuportaan iya?

9 Nen 1945, impakabat na The Watchtower so igapo na kampanyad interon mundo ya Pantitipon Parad Publiko. Ipaliwawad satan so nantutumbokan ya waloran lektyur ed Biblia nipaakar ed “kaplesan iran problema.” Diad dakel a dekada, aglabat inusar na saray apilin espiker iray teman inter na matoor ya aripen noagta nanggawa met ira na sarili dan paliwawa. Balet nen 1981, binilin so amin ya espiker ya ibase ray paliwawa da ed saray outline ya inter ed kongregasyon. * Anggad 1990, arum ed saray outline na paliwawa ed publiko et  walay pibiang na dumerengel odino demostrasyon. Balet diad saman a taon, in-adjust iray instruksion tan manlapud saman et ginawa la itan ya diretson paliwawa. Nen Enero 2008, ginawan 30 minuto so 45 minuton publikon paliwawa. Anggano wala ray pananguman, siansian napapabiskeg na imparaan a maong ya paliwawa so pananisia tayod Salita na Dios tan nibabangat itayod nanduruman aspekto na Panarian na Dios. (1 Tim. 4:13, 16) Kasin maseet mon iimbitaan iray RV tan arum nin aliwan Tasi ya ondengel ed saray importantin paliwawa ya based Biblia?

10-12. (a) Anto ray pananguman ed Panagaral na Panag-bantayan? (b) Anto ray itepet tayod sarili tayo?

10 Panagaral na Panag-bantayan. Nen 1922, saray brother ya tatawagen a pilgrim​—ministron ibabaki na Watch Tower Society pian manpaliwawad saray kongregasyon tan mangidaulod panagpulong​—so angirekomenda na regular ya panagaral na The Watch Tower. Tinumbok na agagi itan ya suhestion, tan nen unaan et gagawaen so panagaral na Watch Tower balanglan diad midweek odino Simba.

Panagaral na Watch Tower diad Ghana, 1931

11 Angiter so Hunyo 15, 1932 ya Watchtower na kaaruman ya instruksion no panon ya ikondukta iyan panagaral. Inusar so panagaral ed Bethel bilang pangaligan, tan imbaga na artikulo ya nepeg a sakey a brother so mangidaulod satan. Nayarin onyurong so taloran brother diad arap na pantitiponan tan mansusublayan iran manbasa na parapo. Diad saman et anggapoy niimprintan tepet ed artikulo, kanian binilin so mangikokondukta ya manurod saray dumerengel na mantepet nipaakar ed aaralen. Kayari to, turoen toy arum nin agagi ya onebat. No kaukolan nin linewen, binilin so mangikokondukta ya mangiter na “antikey tan malinew” ya eksplinasyon.

 12 Nen unaan, naabuloyan so kada kongregasyon ya manpili na isyu ed magasin a labay na karaklan ya aralen. Balet, insuheri na Watchtower, Abril 15, 1933 ya aralen na amin a kongregasyon so sankabaloan ya isyu. Nen 1937, akaawat iray agagi na instruksion a nepeg ya gawaen itan a panagaral kada Simba. Wala ni ray kaaruman ya pananguman ed sayan pantitipon ya im-publish ed Oktubre 1, 1942 ya Watchtower a miparad gagawaen tayo natan. Unona, impakabat na magasin ya wala la ray tepet diad leksab na kada pahina na aaralen ya artikulo tan kaukolan ya saratan so itepet. Insan, imbaga met na satan a nepeg ya sakey oras so panagaral. Impaseseg met na magasin ya agbabasaen na saray onebat iray parapo noagta mankomento ra diad “dilin salita ra.” Say Panagaral na Panag-bantayan et siansia nin manunan paraan ya uusaren na matoor ya aripen pian itaryay espiritual a naakan diad dugan panaon. (Mat. 24:45) Maabig no itepet tayod sarili tayo: ‘Kasin sinimba ak ya manpaparaan parad panagaral na Say Panag-bantayan? Tan kasin pansasagpotan koy mankomento?’

13, 14. Anto ray pananguman ed Panagaral na Kongregasyon ed Biblia, tan antoy labalabay mod sayan aral?

13 Panagaral na Kongregasyon ed Biblia. Nen kapegleyay 1890’s, kayarin in-release so pigaran volume na Millennial Dawn, insuheri nen Brother H. N. Rahn, sakey ya Estudyante na Biblia ya manaayam ed syudad na Baltimore, Maryland, U.S.A., ya manporma ira na grupo na panagaral ed Biblia tan tawagen itan ya “Dawn Circles.” Nen unaan, sinali da iyan gawaen diad kaabungan. Nen Setyembre 1895, maabig so resulta na sayan panagaral diad pigaran syudad ed America. Kanian, insuheri na Watch Tower ed satan a bulan a nepeg ya gawaen na amin ya agagi iyan panagaral. Inkuan na satan a say mangikokondukta et nepeg a maong ya manbasa. Kaukolan ton basaen so sakey a sentence insan to pakomentoan ed saray dumerengel. No asumpal to lan abasa tan apantongtongan da lay kada sentence na parapo, basaen to ray teksto. Kayari na sakey a kapitulo, mangiter na antikey ya repaso so kada inmatendi.

14 Aminpigan inuman so tawag ed sayan panagaral. Tinawag iyan Berean Circles for Bible Study, ya impara dad saray inmunan siglo a taga Berea a maalwar ya angusisad Kasulatan. (Gawa 17:11) Asabi panaon, tinawag iyan Panagaral na Kongregasyon ed Libro. Natan, tatawagen la iyan Panagaral na Kongregasyon ed Biblia tan mantitipon so interon kongregasyon diad Kingdom Hall imbes ya grupo-grupo ed kaabungan. Diad pigaran dekada, nanduruman libro, brosyur, tan anggan saray artikulo na Panag-bantayan so inaral. Manlapu la nensaman, pinaseseg so amin ya mibiang ed sayan panagaral. Baleg so agawaan na saya pian napaaralem so  kakabatan tayod Biblia. Kasin regular kan manpaparaan parad saya tan gagawaen moy anggaay nayarian mon mankomento?

15. Antoy gagala na samay Teokratikon Eskuelaan Parad Ministeryo?

15 Teokratikon Eskuelaan Parad Ministeryo. Oniay nanonotan nen Carey Barber ya manlilingkor ed saman diad headquarters ed Brooklyn, New York: “Nen Lunes na labi, Pebrero 16, 1942, inimbitaan so amin ya lalakin membro na pamilyan Bethel ed Brooklyn ya manpa-enroll ed tatawagen natan ya Teokratikon Eskuelaan Parad Ministeryo.” Si Brother Barber, ya nagmaliw a membro na Mananguley ya Ulop, et deneskribe to so eskuelaan a “sakey ed saray makapadinayew a bendisyon nen Jehova ed totoo to diad modernon panaon.” Talagan maabig so resulta na sayan kurso ta atulongan iray agagin lalaki ya napaaligwas so panagbangat da tan abilidad dan manpulong. Kanian manlapu nen 1943, im-publish so bokletan Course in Theocratic Ministry tan ag-abayag et  intaryad saray kongregasyon ed interon mundo. Imbaga na Watchtower, Hunyo 1, 1943 ya say gagala na Teokratikon Eskuelaan Parad Ministeryo et tulongan so totoo na Dios ya “nipasal a magmaliw ya mas marunong a tasi diad panangiyabawag ed Panarian.”​—2 Tim. 2:15.

16, 17. Kasin dunong ed panagsalita labat so imbangat ed samay Teokratikon Eskuelaan Parad Ministeryo? Ipaliwawa.

16 Nen unaan, parad dakel et makapanerbiyos so manpaliwawad arap. Si Clayton Woodworth, Jr., ya say ama to et basta labat impriso nen 1918 kaibay Brother Rutherford tan arum ni, et nanonotan to ni alikna to nen unaan ya asainmin tod eskuelaan nen 1943. Inkuan to: “Nairapan ak a manpaliwawa. Singa dinmukey so dilak, amagaay sangik, tan no aliwan singa maksil ya ungol so boses ko, singa esaes.” Balet, legan ya onaaligwas so abilidad nen Clayton, dakel so naawat ton pribilehyo a manpaliwawa. Aglabat apaaligwas na eskuelaan so abilidad ton mansalita. Noagta imbangat met na satan ed sikato so kaimportantian na panagpaabeba tan  panagmatalek ed si Jehova. Imbaga to: “Amoriak ya aliwan say espiker so importante. Pero no manparaan ya maong tan sigpot a manmatalek ed si Jehova, dengelen day ibabaga to tan makaaral irad sikato.”

17 Nen 1959, naimbitaan iray agagin bibii ya manpa-enroll ed eskuelaan. Imbaga nen Sister Edna Bauer ya nadngel to iyan anunsio diad samay asemblean inatendian to. “Agko nalinglingwanan may liket na saray sister,” so kuan to. “Natan et dinmakel so oportunidad da.” Diad inlabas na taon, dakel ya agagi so malikeliket ya nampa-enroll ed Teokratikon Eskuelaan Parad Ministeryo pian paibangat ed si Jehova. Diad panaon tayo, siansia nin makakaawat tayo na ontan ya panangipasal diad aral tayod midweek.​—Basaen so Isaias 54:13.

18, 19. (a) Panon tayon makakaawat natan na praktikal a giya pian nagawaan tayoy ministeryo tayo? (b) Akin et mangakansion tayod saray aral? (Nengnengen so kahon ya “ Pangansion Nipaakar ed Katuaan.”)

18 Pantitipon Parad Panagserbi. Nen 1919, wala la ray pantitipon pian naorganisa so lawak na kimeyan. Diad saman, saray mangibubunog na literatura labat so onaatendi ed satan a pantitipon. Ginmapo nen 1923, maminsan ed sakey bulan ya gagawaen so Pantitipon Parad Panagserbi, tan onaatendi lay interon klase odino kongregasyon. Nen 1928, pinaseseg iray kongregasyon ya gawaen a sinimba so Pantitipon Parad Panagserbi. Tan nen 1935, impaseseg na The Watchtower ed amin a kongregasyon ya ibase itan a panagaral ed impormasyon ya im-publish ed Director (ag-abayag et tinawag ya Informant insan nen kien et Ministeryo Tayo ed Panarian). Asabi panaon, sayan pantitipon et nagmaliw lan regular a kabiangan na aral ed kongregasyon.

19 Diad sayan panaon, naaawat tayod midweek ya pantitipon tayo so praktikal a giya no panon ya gawaen so ministeryo tayo. (Mat. 10:5-13) No makakaawat ka lay workbook ed aral, kasin aaralen tan iyaaplikam iray suhestion ed satan diad ministeryom?

Sankaimportantian ya Pantitipon ed Interon Taon

Manlapu la nen inmunan siglo C.E., tinaon ya mantitipon iray Kristiano pian nodnonoten so Memoryal na impatey na Kristo (Nengnengen so parapo 20)

20-22. (a) Akin ya nonodnonoten tayoy impatey nen Jesus? (b) Anto ray bendisyon ed sika diad tinaon ya iyaatendim ed Memoryal?

20 Ingganggan ed saray papatumbok nen Jesus ya nodnonoten day impatey to anggad isabi to. Singa say selebrasyon a Paskua, maminsan ed sakey taon ya gagawaen so Memoryal na impatey na Kristo. (1 Cor. 11:23-26) Kada taon, onaatendid sayan pantitipon so minilyon a totoo. Nipapanonot na saya ed saray alanaan so pribilehyo dan miuley ed Panarian. (Roma 8:17) Tan diad saray arum a karnero, napapakiwas iran respetoen a maong so Ari na Panarian na Dios tan manmatoor ed sikato.​—Juan 10:16.

21 Binidbir di Brother Russell tan saray kakaiba to so kaimportantian na pannodnonot ed Pangdem na Katawan tan amta ran kaukolan iyan nodnonoten maminsan labat ed sakey taon. Inkuan na Abril 1880 ya Watch Tower: “Pigay taon  lan niyugali na maslak ed sikami diad Pittsburgh ya . . . nodnonoten so Paskua [Memoryal] tan mibiang ed saray emblema na laman tan dala na Katawan tayo.” Ag-abayag, ginawa iray kombension kaibay Memoryal. Nen 1889, diad sankaunaan a pankanawnawa et inalay bilang ed ontan ya pantitipon, 225 so inmatendi tan 22 so abautismoan.

22 Natan et agti la ipipilad programa na kombension so Memoryal, balet iimbitaan tayoy amin ed lugar tayo ya onatendid satan diad Kingdom Hall odino diad nirentaan ya pasilidad. Nen 2013, masulok a 19 milyon so inmatendid Memoryal na impatey nen Jesus. Talagan pribilehyo tayoy onatendid Memoryal tan pasesegen so arum ya milad sikatayo ed satan ya sankasagradoan ya labi! Kasin maseet mon iimbitaan so dakel anggad posible diad Memoryal kada taon?

No Antoy Ipapanengneng na Panmoria Tayo

23. Antoy panmoriam ed saray pantitipon tayo?

23 Ag-ipapasen na saray matoor a lingkor nen Jehova ya pabelat so bilin ya mantitipon. (Heb. 10:24, 25; 1 Juan 5:3) Singa bilang, labalabay nen Arin David so onlad abung nen Jehova pian mandayew. (Sal. 27:4) Panlikliketan toy milimog ed saray kapara ton mangaarod Dios. (Sal. 35:18) Ontan met nen Jesus. Anggan nen ugaw ni, talagan pipilaleken to lay onlad abung na Ama to pian mandayew.​—Luc. 2:41-49.

Ipapanengneng na kaaralem na pilalek tayon mantitipon ya talagan tua ed sikatayo so Panarian na Dios

24. Sano onaatendi tayod saray pantitipon, antoy pankanawnawa tayon ipanengneng?

24 Sano onaatendi tayod saray pantitipon, ipapatnag tayoy panangarod si Jehova tan pilalek ya pasesegen iray agagi. Ipapatnag tayo met ya labalabay tayon aralen no panoy pampasakop ed Panarian na Dios, ta diad saray aral, asemblea, tan kombension et manuna tayon naaawat so panangipasal. Sakey ni, itataryad pantitipon tayo so dunong tan biskeg ya kaukolan tayo pian nagawaan so sakey ed saray sankaimportantian a kimey ya susumpalen na Panarian na Dios natan​—say panggawa tan pangipasal ed disipulo na Arin Jesu-Kristo. (Basaen so Mateo 28:19, 20.) On, ipapanengneng na kaaralem na pilalek tayon mantitipon ya talagan tua ed balang sakey ed sikatayo so Panarian na Dios. Komon ta lawas tayon pablien iray pantitipon tayo!

^ par. 2 Likud nid sinimban aral ed kongregasyon, papasesegen so kada pamilya odino indibidual ya mangigana na panaon parad personal a panagaral odino panagdayew na pamilya.

^ par. 9 Nen 2013, wala lay masulok a 180 ya outline parad publikon paliwawa.