Onlad karga

Anto Kasi Nagawad Arapen?

Anto Kasi Nagawad Arapen?

Kasin say kabibilay tayo et . . .

  • agla manguman?

  • lalon onirap?

  • oninawa la?

 SAY IBABAGA NA BIBLIA

“Punasen [na Dios] so amin a lua ed kamataan da, tan anggapo lay patey, anggapo met lay panermen tan panakis tan panotot. Saray datin bengatla et linmabas la.”—Apocalipsis 21:3, 4, Balon Mundo a Patalos.

SARAY MARAKEP YA NAGAWAD BILAY MO

Makapaliket lay mantrabaho.​—Isaias 65:21-23.

Agka la mansakit tan manirap.​—Isaias 25:8; 33:24.

Maliket lay bilay mo tan tuloytuloy mo lan nakaiba so pamilyam tan kakaarom.​—Salmo 37:​11, 29.

 TUA KASI IBABAGA NA BIBLIA?

On, tan nia so duaran rason:

  • Sarasarag na Dios ya gawaen so impromisa to. Diad Biblia, say Dios ya Jehova labat so tinawag ya “Makapanyarin-amin,” ta anggapoy anggaan na pakapanyari to. (Apocalipsis 15:3) Kanian sarasarag ton tooren so impromisa to ya gawaen ton marakep so bilay tayo. Ibabaga na Biblia ya “diad Dios et posible so amin a bengatla.”​—Mateo 19:26.

  • Labalabay na Dios ya gawaen so impromisa to. Alimbawa, ‘pirpirawat’ nen Jehova ya bilayen lamet iray inatey lan totoo.​—Job 14:14, 15.

    Nabasa met ed Biblia ya say Anak na Dios ya si Jesus et pinaabig to ray mansasakit. Akin et ginawa to itan? Ta labay to. (Marcos 1:40, 41) Singa si Ama to, labalabay nen Jesus ya tulongan iray pakaskasi.​—Juan 5:19.

    Kanian segurado ya labay itayon tulongan nen Jehova tan nen Jesus pian magmaliw ya maliket so bilay tayod arapen!​—Salmo 72:12-14; 145:16; 2 Pedro 3:9.

 ISIPEN PA

Panon ya gawaen na Dios ya marakep so bilay tayo?

Nabasa so ebat na Biblia diad MATEO 6:​9, 10 tan DANIEL 2:44.