Onlad karga

Onlad saray karga

 APENDISE

Nepeg Kasin Mangusar na Krus Iray Kristiano Diad Panagdayew Da?

Nepeg Kasin Mangusar na Krus Iray Kristiano Diad Panagdayew Da?

SAY krus et papablien tan gagalangen na minilyon a totoo. Imbaga na The Encyclopædia Britannica ya atan so “manunan simbolo na Kristianon relihyon.” Balet, duga kasin mangusar na krus iray Kristiano diad panagdayew da?

Base ed saray reperensya et naamtaan tayo ya agmanaya inatey si Jesu-Kristo ed Krus. Say Griegon salita ya impatalos a “krus” et stau·rosʹ. Say labay ya ibaga na satan et “sakey a maptek a kiew odino poste.” Imbaga na The Companion Bible: “Say [Stau·rosʹ] et agbalot mankabaliksan na duaran piraso na tabla ya impan-kurosan  . . . Diad Griegon lenguahe na [Balon Sipan] et anggapon balot so nabasan ideya nipaakar ed duaran piraso na tabla.”

Diad pigaran teksto, inusar na saray nansulat na Biblia so sananey nin salita parad samay angipasakan ed si Jesus. Satan ya Griegon salita et xyʹlon. (Gawa 5:30; 10:39; 13:29; Galacia 3:13; 1 Pedro 2:24) Say labay ya ibaga labat na satan et “tabla” odino “bislak, pekpek, odino kiew.”

Diad libro nen Hermann Fulda ya Das Kreuz und die Kreuzigung (Say Krus tan say Impangipasak), impaliwawa to no akin ya poste so mabetbet ya uusaren ed saray senentensiaan na patey: “Anggapoy kakiewan ed saray pinilin pasen parad saray senentensiaan na patey, kanian mangipapanek ira na poste. Isinger odino ipasak ed poste so lima tan sali na kriminal.”

Balet, say talagan makakombinsin prueba et say ibabaga na Salitay Dios. Inkuan nen apostol Pablo: “Sinaliw itayo nen Kristo, ya imbulos to itayo ed samba na Ganggan diad impagmaliw ton sakey a nisamba imbes a sikatayo, ta nisulat: ‘Insamba so balang too ya impasak ed poste [“kiew,” Say Biblia].’” (Galacia 3:13) Satan ya imbaga nen Pablo et imbase to ed Deuteronomio 21:22, 23, a malinew ya ontutukoy ed sakey ya poste, aliwan krus. No say sakey et ontan so impatey to, sikatoy ipapasen ya “insamba” odino mauge-uges. Kanian agmanepeg ed saray Kristiano ya idekorasyon ed abung da iray imahen na Kristo ya akapasak ed krus.

Diad loob na 300 taon kayari impatey nen Kristo, anggapoy ebidensya ya angusar na krus ed panagdayew iramay mangibabagan Kristiano. Balet diad sinmublay iran taon, say paganon Emperador Constantino et nagmaliw a membro na saray mankunkunwarin Kristiano. Sikatoy angigapo na pangusar ed krus bilang simbolo. Agtayo amta no antoy motibo nen Constantino, balet seguradon anggapoy koneksion na krus ed si Jesu-Kristo. Diad tua, say krus et nanlapud pagano. Oniay inamin na New Catholic Encyclopedia: “Antis nin ginmapo so Inkakristiano tan aliwan Kristiano iran kultura et uusaren lay krus.” Base ed nanduruman reperensya, say krus et mikonektaan ed panagdayew ed saray palsa tan pagano iran ritual ed sekso.

Kanian, akin et ginawa iyan simbolo anta nanlapud pagano? Ompapaway ya say rason et pian mainomay ya nakomberte iray pagano ed “Inkakristiano.” Balet, malinew ya ag-aawaten na Dios  so pangusar ed anggan anton paganon simbolo ed panagdayew. (2 Corinto 6:14-18) Isesebel met na Kasulatan so amin a klase na panagdayew ed idolo. (Exodo 20:4, 5; 1 Corinto 10:14) Kanian mabiskeg so rason no akin ya agmanguusar na krus iray tuan Kristiano diad panagdayew da. *

^ par. 5 Parad mas detalyadon eksplinasyon nipaakar ed krus, nengnengen so pahina 89-93 na libron Reasoning From the Scriptures, ya im-publish na Saray Tasi nen Jehova.