Onlad karga

Onlad saray karga

 APENDISE

Kasin Disyembre so Inkiyanak nen Jesus?

Kasin Disyembre so Inkiyanak nen Jesus?

AG-IBABAGA na Biblia no kapigan inyanak si Jesus. Balet, nanengneng tayo ditan iray rason ya aliwan Disyembre so inkiyanak to.

Imanoen pay panaon o tiempo ed Betlehem nen inyanak si Jesus. Ambetel tan mauran so panaon diad bulan na saray Judio ya tatawagen a Kislev (mipetekan itan ed Nobyembre/Disyembre). Say onsublay ya bulan et Tebet (Disyembre/Enero). Sankabetelan itan ya bulan na taon, ya no maminsan et man-snow diad saray kapalandeyan. Amtaen tayo no antoy ibabaga na Biblia nipaakar ed klima ed satan a lugar.

Ipapaamta na sakey ed saray nansulat na Biblia ya si Esdras ya say Kislev et talagan ambetel tan mauran ya bulan. Kayarin imbaga nen Esdras ya wala ray totoon nantitipon ed Jerusalem “diad koma-20 agew na komasiam a bulan [Kislev],” impaamta to ya saray totoo et “manggiwgiw . . . lapud maksil so uran.” Imbagan mismo na saramay nantitipon:  “Panaoy mamauran. Agnayari manalagey diad paway.” (Esdras 10:9, 13; Jeremias 36:22) Agpankelawan sirin no akin ya kada bulan na Disyembre, saray managpastol ya manaayam ditan et wala labat ed loob na abung da tan akapukok iray karnero da diad labi!

Balet ibabaga na Biblia ya diad samay labi na inkiyanak nen Jesus, walad uma iray managpastol ya babantayan day pulok da. Diad tua, imbaga na sakey nin nansulat na Biblia, si Lucas, ya diad saman a panaon, saray managpastol et “manaayam ed kaumaan tan sanlabin manbabantay na saray pulok da” diad asingger ed Betlehem. (Lucas 2:8-12) Imanoen ya saray managpastol et manaayam ed uma, aliwan basta manaakar ed paway diad agew. Ipapastol da ray pulok da ed kaumaan diad labi. Nagawaan da kasi itan no Disyembre anta diad satan a bulan et ambetebetel tan mauran diad Betlehem? Siempre andi! Kanian ipapanengneng na saratan ya ag-inyanak si Jesus ed bulan na Disyembre. *

Ibabaga ed sikatayo na Salitay Dios no kapigan so impatey nen Jesus, balet agla tanton indetalye na satan no kapigan so inkiyanak to. Lapud satan et nanonotan tayo so imbaga nen Arin Solomon: “Say maabig a ngaran et mas maong ni nen say maabig a larak, tan say agew na impatey et mas maong ni nen say agew na inkiyanak.” (Eclesiastes 7:1) Agtayo la sirin pankelawan no akin ya mas dakel so ibabaga na Biblia nipaakar ed ministeryo tan impatey nen Jesus nen say inkiyanak to.

Nen inyanak si Jesus, saray managpastol tan saray pulok da et walad kaumaan diad labi

^ par. 1 Parad kaaruman ya impormasyon, nengnengen so pahina 176-179 na Reasoning From the Scriptures, ya im-publish na Saray Tasi nen Jehova.