Onlad karga

Onlad saray karga

 KAPITULO 5

“Nengneng Mo Ray Mauges tan Makapadimlan Gagawaen Da”

“Nengneng Mo Ray Mauges tan Makapadimlan Gagawaen Da”

EZEQUIEL 8:9

TOPIC: Say inyabeba na espiritualidad tan moralidad na apostatan Juda

1-3. Antoy labay nen Jehova ya ipanengneng ed si Ezequiel diad templo ed Jerusalem, tan akin? (Nengnengen so introduksion na Komaduan Seksion.)

SI PROPETA Ezequiel et anak na saserdote, kanian kabisado to so Mosaikon Ganggan. Kabisado to met so templo ed Jerusalem tan say dugan panagdayew ed si Jehova a nepeg ya gawaen ditan. (Eze. 1:3; Mal. 2:7) Balet natan et 612 B.C.E. la, tan seguradon nabigla so anggan siopan matoor ya Judio, kaiba lay Ezequiel, ed nagagawad templo nen Jehova.

2 Labay nen Jehova ya ipanengneng ed si Ezequiel so makapabaing ya nagagawad templo tan ibagay nanengneng to ed saray “mamatatken na Juda,” saray kapara ton Judion inawit ed Babilonia ya wala natan ed abung to. (Basaen so Ezequiel 8:1-4; Eze. 11:24, 25; 20:1-3) Inusar nen Jehova so masanton espiritu to pian diad pasingawey et iyalis Toy Ezequiel manlapud abung tod Tel-abib ya asingger ed Ilog Kebar diad Babilonia, paonlad Jerusalem ya nilasus kilometro so kaarawi to diad sagur. Inyakar nen Jehova so propeta diad templo, diad amianen a puerta na loob a sular. Inggapo ditan nen Jehova ya ipanengneng diad pasingawey so nagagawa ed templo.

3 Nanengneng natan nen Ezequiel so apatiran makapabiglan nagagawa  a pakapatnagan ya talagan aderal lay espiritualidad na nasyon. Antoy agawa ed dugan panagdayew ed si Jehova? Tan antoy kaimportantian na sayan pasingawey ed sikatayo natan? Mila tayod si Ezequiel legan ton nenengnengen iray nagagawa diman. Balet antis na satan, ikonsidera tayo ni no antoy manepeg labat ya ilaloan nen Jehova ya iter na saray mandadayew ed sikato.

“Siak . . . et Sakey a Dios a Kakaukolanen Ton Sikato Labat so Dayewen”

4. Antoy kakaukolanen nen Jehova ed saray mandadayew ed sikato?

4 Manga 900 a taon antis ya nambilay si Ezequiel, malinlinew ya imbaga nen Jehova no antoy kakaukolanen tod saray mandadayew ed sikato. Diad samay komadua ed Samploran Ganggan, imbaga tod saray Israelita: * “Siak, si Jehova a Dios mo, et sakey a Dios a kakaukolanen ton sikato labat so dayewen.” (Exo. 20:5) Ipapanengneng na saray salitan “sikato labat so dayewen” ya ag-abuloyan nen Jehova so pandayew ed arum ya dios. Singa naaralan tayod Kapitulo 2 na sayan publikasyon, say unonan kakaukolanen ed dugan panagdayew et nepeg ya si Jehova labat so dayewen tayo. Kaukolan ya sikatoy manuna ed bilay na saray mandadayew ed sikato. (Exo. 20:3) Labay ton ibaga, iilaloan nen Jehova ya mansiansian malinis ed espiritual iray mandadayew ed sikato, ya agda panlalaoken so duga tan aliwan dugan panagdayew. Nen 1513 B.C.E., mabulos ya akisipanan iray Israelita panamegley na Ganggan a sipanan. Diad saman et impromisa da ya si Jehova labat so dayewen da. (Exo. 24:3-8) Matoor ya susumpalen nen Jehova iray impisipanan to, tan iilaloan to ya manmatoor met iray totoon akisipanan ed sikato.​—Deu. 7:9, 10; 2 Sam. 22:26.

5, 6. Akin et kanepegan nen Jehova ya sikato labat so dayewen na saray Israelita?

5 Kasin duga labat ya kerewen nen Jehova ed saray Israelita ya sikato labat so dayewen da? On, siempre! Sikato so Makapanyarin-amin a Dios, say Soberano ed Uniberso, tan say Subol tan Managsustini na bilay. (Sal. 36:9; Gawa 17:28) Si Jehova met so Manangiliktar na saray Israelita. Nen inter tod sikara so Samploran Ganggan, impanonot to: “Siak si Jehova a Dios mo, ya angipaway ed sika ed dalin na Ehipto, manlapud abung ya akaaripenan mo.” (Exo. 20:2) Malinew ya si Jehova labat so nepeg ya dayewen na saray Israelita.

6 Agmanguuman si Jehova. (Mal. 3:6) Lanang ton kakaukolanen ya sikato labat so dayewen. Kanian isip mo pay alikna to ed saray apatiran makapaermen ya nagagawa ya ipanengneng to la natan ed si Ezequiel diad pasingawey.

Unonan Nagagawa: Say Dadayewen a Simbolo na Imon

7. (a) Antoy gagawaen na saray apostatan Judio diad amianen a puerta na templo, tan antoy reaksion nen Jehova? (Nengnengen so litrato ed gapo na kapitulo.) (b) Panon ya nibagan asagyat ya onimon si Jehova? (Nengnengen so paimanod leksab 2.)

7 Basaen so Ezequiel 8:5, 6. Seguradon abigbigla si Ezequiel! Diad amianen a puerta na templo, mandadayew iray apostatan Judio ed sakey a simbolo odino imahen. Nayarin sakey iman ya sagradon poste a mangirerepresenta ed si Asera, say palson diosa na  saray Canaanita ya ipapasen dan asawa nen Baal. Antokaman itan, agtinoor na saraman ya Israelita so impisipanan dad si Jehova. Inter dad sakey ya imahen so panagdayew ya kanepegan nen Jehova tan para labat komon ed sikato. Kanian sikatoy sinagyat dan onimon tan duga labat ya sikatoy onsanok ed sikara. * (Deu. 32:16; Eze. 5:13) Isipen pa: Diad masulok ya 400 a taon, say templo et irerepresenta toy presensia nen Jehova. (1 Ara. 8:10-13) Balet natan, lapud mandadayew la rad imahen diad mismon sular na templo, si Jehova et ‘inmarawi ed santuaryo to.’

8. Akin et importantin pannonotan tayo natan imay pasingawey ya anengneng nen Ezequiel nipaakar ed simbolo na imon?

8 Akin et importantin pannonotan tayo natan imay pasingawey ya anengneng nen Ezequiel nipaakar ed simbolo na imon? Nayarin nanonotan tayoy piparaan na apostatan Juda ed Kakristianoan. Uusaren na saray simbaan na Kakristianoan iray idolo diad panagdayew da, kanian sayang labat so debosyon ya iiter da kuno ed Dios. Lapud agmanguuman si Jehova, duga labat ya sikatoy onsanok ed Kakristianoan, a singa ed apostatan Juda. (Sant. 1:17) Seguradon arawi si Jehova ed sarayan aliwan tua ya Kristiano!

9, 10. Anton pasakbay so naaralan tayo ed ginawa na saramay mandadayew ed imahen diad templo?

9 Anton pasakbay so naaralan tayo ed ginawa na saramay mandadayew ed imahen diad templo? Pian niiter tayod si Jehova so dayew ya para labat ed sikato, kaukolan tayon ‘ibatikan so idolatriya.’ (1 Cor. 10:14) Ompan isipen tayo, ‘agak balot mangusar na saray idolo odino simbolo diad pandayew kod si Jehova!’ Balet nanduruma so klase na idolatriya, tan saray arum et agnaliklikas. Inkuan na sakey ya reperensya ed Biblia: “No say sakey et ibaliwala toy Dios lapud mas importante ed sikato so antokaman ya walaay kantidad, kana, odino pakayari, singa la itan idolatriya.” Kanian, kaibad idolatriya so materyal iran kaykayarian, kuarta, sex, panagligliwaan—amin ya bengatlan magmaliw ya sankaimportantian ed sikatayo tan alaen to lay panagdayew ya para labat komon ed si Jehova. (Mat. 6:19-21, 24; Efe. 5:5; Col. 3:5) Kaukolan ya arawian tayo so amin ya klase na idolatriya, ta si Jehova labat so nepeg ya pangiteran na interon puso ya panangaro tan panagdayew tayo!—1 Juan 5:21.

10 Samay unonan nagagawa ya impanengneng nen Jehova ed si Ezequiel et “mauge-uges tan makapadimla.” Balet, imbaga nen Jehova ed matoor ya propeta to: “Wala ni ray mas makapadimlan bengatla a nanengneng mo.” Anto ni kasi mas makapadimla nen say pandayew ed simbolo na imon diad sular na templo?

Komaduan Nagagawa: 70 Mamatatken ya Mangiyaapay na Insenso ed Saray Palson Dios

11. Anton makapabiglan bengatla so anengneng nen Ezequiel nen linmad loob a sular ya asingger ed altar na templo?

11 Basaen so Ezequiel 8:7-12. Binungaw nen Ezequiel so padir insan linmad loob a sular ya asingger ed altar na templo, tan anengneng to natan iray makapabiglan akaukit ed padir ya “onkukurong a bengatla tan makapadimlan ayayep tan amin a makapadimlan  idolo.” * Saraman ya akaukit ed padir et irerepresenta da ray palson dios. Balet mas makapabigla so onsublay ya nanengneng nen Ezequiel: Akaalagey “diad kabilungetan” so “70 ed saray mamatatken na sankaabungan na Israel” tan mangiyaapay ira na insenso ed saray palson dios. Base ed Ganggan, say pinoolan ya ambalbalingit ya insenso et irerepresenta toy makapaliket ya pikakasi na saray matoor ya mandadayew ed Dios. (Sal. 141:2) Balet, samay insenso ya inyapay na 70 mamatatken ed saray palson dios et marutak tan ambanget parad si Jehova. Say pikakasi ra et makapadimla ed sikato. (Pro. 15:8) Lolokoen labat na saraman ya mamatatken so sarili da, ya iisipen dan, “Ag-itayo nanenengneng nen Jehova.” Balet sankanengneng ira nen Jehova, tan impanengneng to ni ingen ed si Ezequiel so mismon gagawaen dad templo To!

Nanenengneng nen Jehova so amin ya makapadimlan bengatla ya gagawaen “diad kabilungetan” (Nengnengen so parapo 11)

12. Akin et kaukolan tayoy mansiansian matoor anggan “diad kabilungetan,” tan siopa so lalon nepeg ya mangipanengneng na maong ya alimbawa ed saya?

12 Antoy naaralan tayo ed samay anengneng nen Ezequiel ya 70 Israelitan mamatatken ya mangiyaapay na insenso ed saray palson dios? Pian dengelen na Dios iray pikakasi tayo tan ipasen ton duga so panagdayew tayo, kaukolan tayoy mansiansian matoor anggan “diad kabilungetan.” (Pro. 15:29) Tandaan ya nanenengneng nen Jehova so amin ya gagawaen tayo. No tudtua si Jehova ed sikatayo, agtayo manggawa na antokaman ya mamaermen ed  sikato anggan sano bukbukor tayo. (Heb. 4:13) Saray elder ed kongregasyon et lalon nepeg ya mangipanengneng na maong ya alimbawa diad panumbok ed saray prinsipyo na Biblia. (1 Ped. 5:2, 3) Iilaloan na saray membro na kongregasyon ya say sakey ya elder ya manbabangat tan mangidadaulo ed panagdayew diad saray aral et manbibilay base ed saray prinsipyo na Biblia anggan “diad kabilungetan,” labay ton ibaga et no anggapoy makakanengneng ed sikato.​—Sal. 101:2, 3.

Komatlon Nagagawa: “Saray Bibiin . . . Aakisan Day Dios a Tamuz”

13. Antoy anengneng nen Ezequiel ya gagawaen na saray apostatan bibii diad sakey a puerta na templo?

13 Basaen so Ezequiel 8:13, 14. Kayari na samay unonan duaran makapadimla ya nagagawa, imbaga lamet nen Jehova ed si Ezequiel: “Wala ni ray mas mauges tan makapadimlan gagawaen da a nanengneng mo.” Antoy sinmublay ya anengneng na propeta? Diad “bandad amianen a puerta na abung nen Jehova,” anengneng to ray “bibiin akayurong ya aakisan day dios a Tamuz.” Si Tamuz et sakey a dios ed Mesopotamia ya tinawag met a Dumuzi diad saray sulat a Sumeria tan ipapasen ya asawa odino manangaro na diosa na panag-anak a si Ishtar. * Mapatnag ya say panakis na saray Israelitan bibii et kabiangan na relihyoson ritual parad impatey nen Tamuz. Lapud aakisan na sarayan bibii si Tamuz diad templo nen Jehova, manggagawa ray paganon ritual diad mismon sentro na dugan panagdayew. Balet ag-aawaten na Dios iray ritual ya nanlapud palson relihyon anggano ginawa itan ed templo to. Diad pakanengneng nen Jehova, ‘makapadimla’ so gagawaen na saraman ya apostatan bibii!

14. Antoy naaralan tayod panmoria nen Jehova ed gagawaen na saray apostatan bibii?

14 Antoy naaralan tayod panmoria nen Jehova ed gagawaen na saraman ya bibii? Pian napansiansian duga so panagdayew tayo, agtayon balot itan lalaokan na saray marutak ya paganon kagagawa. Kanian, kaukolan ya agtayo mibibiang ed saray selebrasyon ya nanlapud saray paganon relihyon. Kasin importantin ikonsidera so nanlapuan na saray selebrasyon? On! Natan, nayarin singa anggapoy uges na saray kagagawan mikonektaan ed pigaran selebrasyon, ya singa say Krismas, Easter, tan birthday. Balet tandaan ya amta nen Jehova iray selebrasyon natan ya nanlapud paganon relihyoson kagagawa nensaman ta anengneng ton mismo itan. Parad si Jehova, saray paganon kagagawa et siansia nin makapadimla anggano linmabas lay panaon tan anggano ilaok ni iratan ed dugan panagdayew.​—2 Cor. 6:17; Apo. 18:2, 4.

Komapat ya Nagagawa: 25 Lalaki ya ‘Ondadakmomo ed Agew’

15, 16. Antoy gagawaen na 25 lalaki diad loob a sular na templo, tan akin et naopendi dan maong si Jehova?

15 Basaen so Ezequiel 8:15-18. Impaimano nen Jehova so komapat tan unor ya nagagawa diad sarayan pamilyar lan salita: “Wala ni ray mas mauges tan makapadimlan bengatla a mas grabe nen  saraya.” Ompan inisip na propeta, ‘Anto ni kasi mas mauges nen saramay anengneng ko la?’ Wala la natan si Ezequiel ed loob a sular. Diman ed lolooban na templo, anengneng toy 25 lalaki ya ondadakmomo pian mandayew ed “agew diad bukig.” Sankaugesan lan panag-insulto ed si Jehova so gagawaen na sarayan lalaki. Akin ey?

16 Imadyin moy nagagawa: Say lolooban na templo na Dios et akaarap ed bukig. Saray onloob ed templo pian mandayew et onarap ed sagur tan ibeneg day ombubutay ya agew diad bukig. Balet saray 25 lalaki diad pasingawey et “akabeneg ed templo” tan akaarap irad bukig pian mandayew ed agew. Kanian singa da imbeneg si Jehova, ta satan ya templo et “abung nen Jehova.” (1 Ara. 8:10-13) Apostata irayan 25 lalaki. Imbaliwala day Jehova, tan agda inunor so ganggan to ya akasulat ed Deuteronomio 4:15-19. Talagan naopendi day Dios ta sikato labat so nepeg ya dayewen!

Si Jehova labat so nepeg ya dayewen na saray lingkor to

17, 18. (a) Antoy naaralan tayod ginawa na saramay mandadayew ed agew diad templo? (b) Anto ran relasyon so dineral na saray apostatan Israelita, tan panon?

17 Antoy naaralan tayod ginawa na saramay mandadayew ed agew? Pian mansiansian malinis so panagdayew tayo, kaukolan ya si Jehova so panmatalekan tayon mangiter na espiritual ya pakatalos tan karunongan. Tandaan, “si Jehova a Dios et agew,” tan say Salita to et “liwawa” ed dalan tayo. (Sal. 84:11; 119:105) Panamegley na Salita to tan saray based Biblian publikasyon ya manlalapud organisasyon to, naliwawaan so puso tan isip tayo, pian nanengneng tayo no panon tayon nawalaan na maliket ya bilay natan tan bilay ya anggapoy anggaan diad arapen. No say mundo so panmatalekan tayon mangiter na pakatalos tan karunongan ed bilay, singa tayo ibebeneg si Jehova. No ontan, naopendi tan nasakitan ya maong si Jehova. Agtayon balot labay ya sakitan so Dios tayo! Say pasingawey ya anengneng nen Ezequiel et pasakbay met ed sikatayo pian agtayo piulopan iramay imbeneg day katuaan, saray apostata.​—Pro. 11:9.

18 Singa naaralan tayo la, anengneng nen Ezequiel so apatiran makapabiglan nagagawa ya idolatriya tan palson panagdayew ya pakapatnagan ya talagan makapadimla so panagdayew na apostatan Juda. Lapud adutakan ed espiritual iray Israelita, aderal so relasyon dad Dios. Tan no nadutakan so espiritualidad na sakey, seguradon nadutakan met so moralidad to. Kanian agla pankelawan no akin ya agawaan na saray apostatan Israelita so amin a klase na imoral a kagagawa ya aneral ed relasyon dad Dios tan ed kapara dan too. Nengnengen tayo natan so pinuyanan ya deskripsion nen Ezequiel nipaakar ed inyabeba na moralidad na apostatan Juda.

Karutakan ed Moral​—“Manggagawa ray Mabanday ed Pegley Mo”

19. Panon ya indeskribe nen Ezequiel so inyabeba na moralidad na saray totoon akisipanan ed si Jehova?

19 Basaen so Ezequiel 22:3-12. Marutak so moralidad na nasyon, manlapud saray manuley ya anggad saray totoo. Uusaren na  saray “pangulo” odino lider so autoridad da pian mamaagus na dala na saray anggapoy kasalanan. Inalig na kaslakan ya totoo iray lider da ya angibaliwala ed Ganggan na Dios. Diad saray pamilya, agrerespetoen na saray ananak iray atateng da, tan dakel so miaakdol ed kapamilya da. Diman ed mismon dalin da, sasaolen na saray rebelyoson Israelita iray dayon miaayam, ugugaw ya ulilad ama, tan saray abalo. Aakdolan na saray Israelitan lalaki so asawa na arum. Nagmaliw ya alablabas ya maagum iray totoo ta manpapasuksok ira, mankakatkat ira, tan manpapatubo iray sobsobra. Seguradon asakitan si Jehova nen anengneng ton saray totoon akisipanan ed sikato et imbaliwala da so Ganggan to tan agda inapresya ya say rason na impangiter tod satan et lapud panangaro to! Talagan naermenan si Jehova ed inyabeba na moralidad da. Ingganggan toy Ezequiel ya ibagad satan ya imoral a nasyon: “Sigpot mo ak lan nilingwanan.”

Lapud impluensya na Kakristianoan, lalon onloloor so pateyan tan imoralidad ed mundo (Nengnengen so parapo 20)

20. Akin et importantin pannonotan tayo natan imay imbaga nen Ezequiel nipaakar ed karutakan ed moral na Juda?

20 Akin et importantin pannonotan tayo natan imay imbaga nen Ezequiel nipaakar ed karutakan ed moral na Juda? Nikompara tayo iyan kaugsan na apostatan Juda ed abebbeban moral na mundon pambibilayan tayo natan. Inabuso na saray lider ed politika so pakapanyari da tan pinairap da ray ordinaryon totoo. Saray lider na relihyon—singa bilang, saray klero na Kakristianoan​—et binasbasan da ray guerra na saray bansa ya nanresultad impatey na  minilyon ya totoo. Pinaabeba na saray klero so malinis tan malinew iran estandarte na Biblia nipaakar ed seksual ya moralidad. Lapud satan, lalo nin onaabeba so estandarte ed moral na sayan mundo. Seguradon ibaga nen Jehova ed Kakristianoan imay imbaga tod apostatan Juda: “Sigpot mo ak lan nilingwanan.”

21. Antoy naaralan tayo ed ginawa na Juda ya karutakan ed moral?

21 Antoy naaralan tayo ran totoo nen Jehova ed ginawa na Juda ya karutakan ed moral? Pian awaten nen Jehova so panagdayew tayo, kaukolan ya malinis so kondukta tayo ed amin ya bengatla. Aliwa ’tan ya mainomay ta manbibilay tayo ed sayan mundo ya abebbebay moralidad to. (2 Tim. 3:1-5) Balet, amta tayo no antoy nalilikna nen Jehova ed amin ya klase na moral ya karutakan. (1 Cor. 6:9, 10) Uunoren tayo ray estandarte nen Jehova ed moral lapud sikatoy inaro tayo tan saray ganggan to. (Sal. 119:97; 1 Juan 5:3) No aliwa tayon malinis ed moral, agtayo inaro so masanto tan malinis ya Dios tayo. Agtayon balot labay ya ibaga nen Jehova ed sikatayo: “Sigpot mo ak lan nilingwanan.”

22. (a) Diad impanrepaso tayo ed impanengneng nen Jehova ya ginawa na Juda nensaman, antoy determinadom ya gawaen? (b) Antoy aralen tayod onsublay ya kapitulo?

22 Wala ray naaralan tayon importantin leksion ed impanrepaso tayo ed impanengneng nen Jehova ya inyabeba na moralidad tan espiritualidad na Juda nensaman. Seguradon lalo tayon determinado ya iter ed si Jehova so dayew ya sikato labat so makanepegan. Kanian, kaukolan tayon arawian so amin ya klase na idolatriya tan mansiansian malinis ed moral. Anto balet so ginawa nen Jehova ed saray agmatoor ya totoo to? Nen nipanengneng lan amin nen Jehova ed si Ezequiel so nagagawad templo, imbaga tod propeta to: “Onkiwas ak lapud sanok ko.” (Eze. 8:17, 18) Labay tayon naamtaan no antoy ginawa nen Jehova ed agmatoor a Juda, ta ontan met ya panangukom so gawaen to ed sayan mauges ya mundo. Aralen tayod onsublay ya kapitulo no panon ya asumpal so panangukom nen Jehova ed Juda.

^ par. 4 Diad libro na Ezequiel, say terminon “Israel” et mabetbet ya ontutukoy ed saray manaayam ed Juda tan Jerusalem.​—Eze. 12:19, 22; 18:2; 21:2, 3.

^ par. 7 Ipapanengneng na salitan “imon” ya ipapasen nen Jehova ya talagan importante so panmatoor ed sikato. Nayarin nanonotan tayod saya so pangimon tan pampasnok na asawan laki no agmanmatoor so asawa to. (Pro. 6:34) Singa satan ya asawan laki, duga labat ya nampasnok si Jehova lapud agnanmatoor iray totoon akisipanan ed sikato nen nandayew irad idolo. Ibabaga na sakey a reperensya: “Say pangimon na Dios . . . et lapud inkasanto To. Sikato labat so Masanton Dios kanian . . . , agto abuloyan ya walay karibal To.”​—Exo. 34:14.

^ par. 11 Say Hebreon termino ya impatalos ya “makapadimlan idolo” et nayarin mikonektaan ed Hebreon salita parad “tai na ayep” tan uusaren a panmudmora.

^ par. 13 Iisipen na arum ya say Tamuz et sananey a ngaran nen Nimrod. Balet anggapoy seguradon basiyan ed satan.