Kapitulo Desisiete
Agamilen so Maridios a Debosyon Diad Loob na Pamilya
1. Panon a say panangiyaplika ed panangiwanwan na Salita na Dios so angapekta ed saray panamaley?
SI JEHOVA so Angigapo ed panamaley, tan intarya na Salita to so sankaabigan a panangiwanwan parad saray pamilya. Bilang resulta na panangiyaplika ed satan a panangiwanwan, dakel a totoo so akapangipaalagey na maaligwas iran panamaley. Makapaseseg, arum a manaamong labat so apakiwas a mangirehistro ed impanasawa ra diad legal a paraan. Arum so tinmunda lan mirelasyon ed sekso diad agda asawa. Saray maruksan lalakin a maabuso ed kaasawaan tan ananak da so akaaral a mangipanengneng na inkauyamo tan inkatamoy.
2. Anto so nalalanor ed bilay na Kristianon pamilya?
2 Lalanoren na Kristianon pamilya so dakel a bengatla, a singa say no panon so panmoria tayo ed inkapermanente na panangasawa, no anto so gawaen tayo pian nasumpal iray responsabilidad tayo ed pamilya, tan no panon so pantrato tayo ed saray kapamilyaan. (Efeso 5:33–6:4) Anggaman nayarin amta tayo so ibabaga na Biblia nipaakar ed bilay na pamilya, say panangiyaplika ed simbawa na Biblia so duman pamaakaran. Anggapo ed sikatayo so malabay a mipara ed saramay kinondena nen Jesus diad insumlang da ed saray ganggan na Dios. Sikara so lingon angikatunongan a magenap la so basta inkadebosyon ed relihyon. (Mateo 15:4-9) Agtayo labay so nawalaan na sakey a nengneng na maridios a debosyon ya ag-agamilen ed sankaabungan tayon dili. Imbes, labay tayon ipanengneng so tuan maridios a debosyon, a satan so ‘baleg a pakagunggonaan.’—1 Timoteo 5:4; 6:6; 2 Timoteo 3:5.
Kaunongan Kabayag so Panamaley?
3. (a) Anto so nagagawa ed dakel a panangasawa, balet anto so nepeg a determinasyon tayo? (b) Usaren so Biblia yo ya ebatan iray tepet ed leksab na sayan parapo.
3 Ondarakel iray panamaley a magmainomay a nabuyak. Arum a sanasawan kasal la ed dakel a taon so mandidiborsyo pian mangasawa na sananey. Mabetbet lay pakadngel a nansian iray walad kalangweran a sanasawa kayari lambengat na antikey a panaon ed impankasal da. Anggaman anto so gawaen na arum, kaukolan a paliketen tayo si Jehova. Sirin imanoen tayo iray onggendan a tepet tan teksto pian amtaen no anto so ibabaga na Salita na Dios nipaakar ed inkapermanente na panangasawa.
Sano manasawa so laki tan bii, kaunongan kabayag so nepeg ya ilaloan a panamong da? (Marcos 10:6-9; Roma 7:2, 3)
Anto labat so basiyan para ed diborsyo a posible so pangasawa lamet ed imaton na Dios? (Mateo 5:31, 32; 19:3-9)
Anto so liknaan nen Jehova nipaakar ed saray diborsyon ag-inabuloyan na Salita to? (Malaquias 2:13-16)
Kasin isisimbawa na Biblia so pansian bilang paraan na panolbar ed saray problema na impanasawa? (1 Corinto 7:10-13)
Diad leksab na antoran sirkumstansya a nayarin nipalugar so pansian? (Salmo 11:5; Lucas 4:8; 1 Timoteo 5:8)
4. Akin ya ombabayag so arum a panamaley?
4 Arum a panangasawa so maaligwas tan magnayon. Akin? Say pangiguntang ed panangasawa ya anggad sikaran dua so susto la ed edad so importantin letnegan, balet importante met so pakalmo na kaparehan walaay miparan paninteresan tan prangkan makapangisingbat ed saray pamaakaran. Anggaman ontan, lalon importante so pakalmo ed sakey a kaparehan mangaaro ed si Jehova tan manrerespeto ed Salita to bilang basiyan na pangarap ed saray problema. (Salmo 119:97, 104; 2 Timoteo 3:16, 17) Say ontan a too so andian na awawey a no saray bengatla so aliwan epektibo, sikato lan tampol so misian odino midiborsyo. Agto usaren iray kakabosan na asawa to bilang baraan na agto la panumpal ed saray responsabilidad to. Noag ingen, arapen toray problema tan anapen toray epektibon solusyon.
5. (a) Panon a nalalanor so katooran ed si Jehova diad panangasawa? (b) Anggan sano naabet so isusumpa, antoran gunggona so onsabi diad pananumbok ed saray estandarte nen Jehova?
5 Isusuppiat nen Satanas a sano sikatayo so manirap et ikaindan tayo laray dalan nen Jehova. (Job 2:4, 5; Uliran 27:11) Balet dakerakel a Tastasi nen Jehova a manasagmak na problema lapud walaan na masumpan asawa so ag-angikaindan ed saray sipan da ed panangasawa. Mantutultuloy iran matoor ed si Jehova tan ed saray ganggan to. (Mateo 5:37) Arum a nansungdo so nanggayaga diad impiulop la na asawa ra diad panaglingkor ed si Jehova—anggan diad kayari na dakel a taon na isusumpa! (1 Pedro 3:1, 2) No nipaakar ed saray Kristiano a saray kaasawaan da so agmangipapanengneng na pananguman odino sikara lay inkaindan na asawa ra lapud manlilingkor ira ed si Jehova, amta met na saraya a sikaray nabendisyonan ta ipapatnag da so maridios a debosyon ed pamilya.—Salmo 55:22; 145:16.
Gawaen na Balang Sakey so Nabebetangan To
6. Pian nawalaan na maaligwas a panamaley, anton uksoyan so nepeg a respetoen?
6 Siempre, kakaukolanen na maaligwas a panamaley so mas nen say basta pansiansian panamong. Manunan kaukolan ed biang na balang asawa so panrespeto ed uksoyan nen Jehova ed inkaulo. Saya so mangitonton ed maabig ya uksoy tan liknaan na kaligenan ed pamilya. Diad 1 Corinto 11:3, nabasa tayo: “Say ulo na balang laki si Kristo; tan say ulo na balang bii say laki; tan say ulo nen Kristo say Dios.”
7. Panon so nepeg a pangagamil na inkaulo ed pamilya?
7 Kasin naimano yo no anto so sinalambit ya unona na satan a bersikulo? On, balang laki so walaan na Ulo, si Kristo, a sikato so nepeg a pampasakopan to. Kabaliksan na saya a nepeg ya agamilen na asawan laki so inkaulo diad paraan a mangipatnag na saray kalidad nen Jesus. Si Kristo so nampasakop ed si Jehova, inadaro to so kongregasyon, tan intaryaan to itan. (1 Timoteo 3:15) Sikato ni ingen et ‘insaklang toy inkasikato parad satan.’ Si Jesus so, aliwan mapaatagey tan mapasang, noagta ‘mauyamo tan mapaabeba ed puso.’ Saramay onsilong ed inkaulo to so ‘makaromog na pakainawaan ed kamarerwa [ra].’ Sano tratoen na sakey ya asawan laki so pamilya to ed onian paraan, ipapanengneng to a sikato so papauleyan met ed si Kristo. Sirin nepeg a nalikna na Kristianon asawan bii a makagunggona tan makarepresko so pikoopera ed masiken to tan manpasakop ed inkaulo to.—Efeso 5:25-33; Mateo 11:28, 29; Uliran 31:10, 28.
8. (a) Akin a saray Kristianon paraan so nayarin ompatnag ya agmakapawala na kaliktan iran resulta ed arum a pamilya? (b) Anto so nepeg tayon gawaen no nipaarap itayo ed ontan a kipapasen?
8 Anggaman ontan, onlesa iray problema. Nayarin nipalmi lan maong so barong na arum sakbay ya iyaplika na sakey ed pamilya iray prinsipyo na Biblia. Saray mauyamon kerew tan maaron paraan so nayarin ompatnag ya andian na resulta. Amta tayo ya ibabaga na Biblia ya ipulisay tayo so “sanok tan ingongot, tan ingal, tan mauges a panagsalita.” (Efeso 4:31) Balet no arum a membro na pamilya et singa agto natalosan iraya, anto so nepeg a gawaen? Bueno, ag-inalig nen Jesus iramay amagyaw tan angayew, noagta sikato so nanmatalek ed si Ama to. (1 Pedro 2:22, 23) Sirin sano onlesa ed pamilya iray kipapasen a pansengegan na kagonigon, ipatnag so maridios a debosyon diad pangipikasi ed tulong nen Jehova imbes ya aligen iray dalan na mundo.—Uliran 3:5-7.
9. Imbes ya anapen so lingo, anto so naaralan a gawaen na dakel a Kristianon asawan lalaki?
9 Agtampol nagawa iray pananguman, balet peteg ya epektibo so simbawa na Biblia no maanos tan magunaet ya iyaplika. Aromog na dakel ya asawan lalaki a ginmapon inmaligwas so panamaley da sanen atalosan da no panon so impantrato nen Kristo ed kongregasyon. Satan a kongregasyon so agtinugyop na ayadyarin totoo. Balet, inaro nen Jesus itan, impanengneng to so maabig ya ehemplo ed satan, tan inusar toray Kasulatan diad pamaaligwas ed satan. Inter toy bilay to nisengeg ed kongregasyon. (1 Pedro 2:21) Say ehemplo to so amaseseg ed dakel a Kristianon asawan lalaki ya onkiwas bilang maabig iran ulo na pamilya tan mangiter na maaron tulong parad iyaligwas na panamaley da. Saya so mamawala na lalon maabig iran resulta nen say pananap na lingo odino agla pitongtong.
10. (a) Antoran dalan a nayarin say asawan laki odino asawan bii—anggano say sakey a mankuan a Kristiano—et sengegay kagotgot na bilay para ed arum diad pamilya? (b) Anto so nayarin gawaen pian resolbien so kipapasen?
10 Anto no say sakey ya asawan laki so agmalikas ed emosyonal iran pankaukolan na pamilya to odino ag-onkiwas a mangiyuksoy na diskusyon na pamilya ed Biblia tan diad arum ya aktibidades? Odino anto no say asawan bii so agmikoopera tan agto ipanengneng so maridios a panagpasakop? Arum so akagamor na maabig iran resulta diad impakawalaan na magalang iran diskusyon na pamilya nipaakar ed saray problema. (Genesis 21:10-12; Uliran 15:22) Balet anggaman ag-agamoran so amin a resultan inilaloan, balang sakey ed sikatayo so makatulong ed iyaligwas na ulopan ed pamilya diad pangipatnag ed saray bunga na espiritu na Dios ed amin a pamaakaran na bilay tayo, ya ipanengneng so maaron konsiderasyon ed arum a membro na pamilya. (Galacia 5:22, 23) Onsabi so aligwas, aliwan diad panalagar ed gawaen na sananey a too, noagta diad panggawa tayo ed dilin biang tayo, sirin ipapanengneng ya aagamilen tayo so maridios a debosyon.—Colosas 3:18-21.
Pangalaan na Saray Ebat
11, 12. Anto so intarya nen Jehova ya ontulong ed sikatayon mamaliket ed bilay na pamilya?
11 Walaray dakel a tutuplegan na totoo para ed simbawa diad saray kurang na pamilya ra. Balet amta tayo a say Salita na Dios so nankarga na sankaabigan a simbawa, tan misalsalamat itayo a diad panamegley na organisasyon to, tutulongan itayo na Dios a mangiyaplika ed satan. Kasin sigpot kan nagugunggonaan ed satan a tulong?—Salmo 119:129, 130; Miqueas 4:2.
12 Niarum ed iyaatendi ed saray pantitipon ed kongregasyon, kasin angigana ka na maparanay a panaon parad panagaral na pamilya ed Biblia? Saray pamilyan manggagawa na ontan so makapankikimey diad pankakasakey da ed panagdayew. Apaaligwas so bilay na pamilya ra legan dan iyaaplika so Salita na Dios ed saray dilin sirkumstansya ra.—Deuteronomio 11:18-21.
13. (a) No walaray tepet ed saray pamaakaran na pamilya, iner so maralaton pakaromogan ed kaukolan a tulong? (b) Anto so nepeg ya ompatnag ed amin a desisyon tayo?
13 Nayarin walaray tepet yo ed saray pamaakaran na pamilya. Alimbawa, anto so nipaakar ed panagkontrol ed panag-anak? Kasin makatunongan la so panagpaekal? No samsamet ya interes so ipapanengneng na ugaw ed saray espiritual a bengatla, diad anton kalaknab a sikato so kaukolan a mibiang diad panagdayew na pamilya? Dakel ed ontan iran tepet so asingbat ed saray literaturan impalapag na Tastasi nen Jehova. Aralen ya usaren iray katulongan diad panagaral na Biblia, pati saray indese, diad pananap ed saray ebat. No anggapo iray palapagan yo ya atukoy ed sakey ya indese, anapen diad librarya na Kingdom Hall. Odino nayarin nabasa yo irayan palapagan ed kompyuter yo. Nayarian mo met ya isingbat iray tepet mo ed saray matakken a Kristianon lalaki tan bibii. Balet agmo iilaloan a naynay a say ebat so malinew a mangibaga ed sika no antoy nepeg tan agnepeg mon gawaen. Mabetbet a sikayo so nepeg a mandeside, bilang indibidual odino bilang sanasawa. Mandesisyon kayo sirin ya ipatnag so pangaagamil yo ed maridios a debosyon ya aliwa lambengat diad publiko noagta diad loob met na pamilya.—Roma 14:19; Efeso 5:10.
Repason Pantongtongan
• Panon a nalalanor so katooran ed si Jehova diad inkamatoor ed asawa?
• Sano nadedesdes lapud saray problema ed pamilya, anto so ontulong ed sikatayon gawaen so makapaliket ed Dios?
• Anggano wala so pankulangan na arum ed pamilya, anto so nayarin gawaen tayo diad pamaaligwas ed kipapasen?
[Tepetepet Parad Panagaral]
[Litrato ed pahina 155]
Nepeg a napatnagan ed inkaulo na asawan laki iray kalidad nen Jesus
[Litrato ed pahina 157]
Say maparanay a panagaral na Biblia ed pamilya so ontulong pian mankasakey itan
