Onlad karga

TEPET NA SARAY KABATAAN

Panon To No Walay Sakit Ko? (Part 3)

Panon To No Walay Sakit Ko? (Part 3)

Lanang tayon iisipen ya saray tinedyer et maksil so laman da tan agnakekesawan. Balet, wala ray kabataan ya limitadoy nagagawaan da lapud graben sakit. Kasin ontan so situasyon mo? No on, napabiskeg ka ed saray eksperiensya nen V’loria, Justin, tan Nisa​—sikaran talo et Tasi nen Jehova. Nengnengen no panon dan aarapen so epekto na graben sakit da.

 V’loria

Walay sakit kon fibromyalgia manlapu nen 14 años ko. Nen 20 ak la, wala met lay arthritis, lupus, tan Lyme disease ko. Mair-irap ya gawaen so amin ya labay mo no makapkapuy ka. Wala ray panaon ya paralisado ak manlapud balangbang anggad sali tan kaukolan koy wheelchair.

Say graben mamapairap ed siak et aliwa labat a say sakit na laman noagta say pannononot ya agko la nagawaan iray simplin kimey a singa say pansulat odino panlukas na garapon. No nanenengneng kon manaakar iray ugugaw, iisipen ko no akin ya mair-irap kon gawaen itan. Pakaliknak et anggapoy kanak.

Misasalamat ak ta wala ray ontutulong ed siak—aliwa labat ya saray kapamilyak noagta pati saray Tasi nen Jehova ed kongregasyon ya kawalaan ko. Lanang da ak ya bibisitaen, kanian abawasan so pakaliknak ya bukbukor ko. Iimbitaan ak na arum ed saray get together, anggano nairapan iran alsaen ak manlapud wheelchair tan ilugan tan iyepas ak ed kotse.

Makakatulong met ed siak iray maedad la ed kongregasyon ta amta ra no antoy dadalanen na walay sakit. Tinulongan da ak pian awaten ko ray limitasyon ko tan agak nakonsiensia no agko nagawaan iray nagagawaan na arum. Talagan malikeliket ak no mimiaral tan manpupulong ak. (Hebreos 10:25) Lapud saraya et anengneng ko ya anggan mansasakit ak, aliwa ak ya duma ed arum.

Naynay kon nononoten ya tutulongan itayo nen Jehova pian makapan-anos. Singa bilang, ibabaga na Biblia ya anggano onkakapuy so laman tayo, say walad dalem ya inkatoo tayo et “napapasimbalo ya inagew-agew.” (2 Corinto 4:16) Ontan so talagan naliliknak!

Pannonotan: No walay graben sakit mo, akin et importante so pilimog ed arum? No anggapoy sakit mo, panon mon natulongan so sakey ya mansasakit?—Uliran 17:17.

 Justin

Atumba ak tan agak makabangon. Agak makaingas tan makagalaw. Imbatik da ak ed emergency room. Nen unaan et ag-amta na saray doktor no antoy sakit ko. Balet lapud aminpigan agawa man, naamtaan dan walay Lyme disease ko.

Naapektoay nervous system ko lapud Lyme disease. Anggan pigay taon lay linmabas manlapud naamtaan so sakit ko, wala ni ray panaon ya manggiwgiw ak, a no maminsan et agko nakontrol. Wala ray agew ya manotot so interon laman ko odino saray gamet ko kanian agko iratan nigalaw. Singa alatian so amin ya joints ko.

Dati et ibabagak ed sarilik, ‘Uga-ugaw ak ni pian mansakit,’ tan nasyosyodotan ak. Kada agew et iyaakis kod Dios, tan tetepetan ko, “Akin et nagagawad siak ’ya?” Pakaliknak ingen et pinaulyan ak la na Dios. Balet ninonot koy Job ya abitlad Biblia. Ag-amta nen Job no akin ya kaukolan ton arapen so dakel a subok, balet nansiansian matoor ed Dios. No asarag nen Job anggano grabe iray subok ed sikato, nasarag ko met.

Baleg so nitulong ed siak na saray elder ed kongregasyon mi. Naynay da ak ya kukumustaen tan tetepetan no antoy naliliknak. Imbagad siak na sakey ya elder ya anggan anton oras et tawagan ko labat no labay koy katongtong. Inagew-agew kon pisasalamatan si Jehova lapud sarayan kakaaro!—Isaias 32:1, 2.

No grabe sakit tayo, nalingwanan tayo no maminsan ya amta nen Jehova so dadalanen tayo. Ibabaga na Biblia: “Paawit mo ed Jehova so awit mo, et sikato bembenan to ka.” (Salmo 55:22) Ontan so gagawaen kod inagew-agew.

Pannonotan: Panon kan natulongan na saray mangaarod sika pian naanosan moy sakit mo?—Uliran 24:10; 1 Tesalonica 5:11.

 Nisa

Nen manga 15 años ko, naamtaan ya walay Marfan syndrome ko—sakit ya apektoen toy joints, ya pakapuyen to iratan. Apektoen to met so puso, mata, tan arum nin organ. Agak met inagew-agew ya makakaliknay sakit, balet no onataki itan, talagan ansaki-sakit.

Nen unaan kon naamtaay sakit ko, masyadoy impanakis ko. Aburido ak ya ompan agko la nagawaan iray labalabay kon gawaen. Singa bilang, labalabay koy onsayaw, tan no isipen ko ya onsabi agew ya nairapan ak lan gawaen itan—anggan pati say panakar—natatakot ak.

Baleg so nitulong ed siak nen atsik. Tinulongan to ak ya naekal so liknaan ya kaskasian koy sarilik. Imbaga tod siak ya agak nepeg ya ontakot, ta naapektoan a maong so bilay ko. Imbaga to met ed siak ya naynay ak ya manpikasi, ta no walay siopaman ya makaamta tan makatalos ed no anton talagay dadalanen ko, si Jehova man.—1 Pedro 5:7.

Akatulong ed siak so ibabaga na Salmo 18:6: “Dia ed kairapan ko tinawag ko si Jehova, tan inmakis ak ed Dios ko. Sikato nadngel to so bosis ko ed paway na templo to, tan say akis ko sinmabi ed saray layag to.” Lapud satan et anengneng ko ya no manpikasi ak ed si Jehova tan patulongan ak ed sikato ya nasarag itan, dengelen tan tulongan to ak. Naynay a wadtan parad siak.

Naaralan ko ya OK labat ya manermen tan onsyodot ni ingen no walay aliwliwan nagawad sikatayo ta normal labat iratan ya liknaan—basta agtayo papaulyanan ya naapektoan so bilay tayo tan say pikakaaro tayod Dios. Aliwan sikatoy panlalapuan na saray problema tayo, tan agto itayon balot taynanan basta sikatoy iyuna tayod bilay tayo.​—Santiago 4:8.

Pannonotan: Kasin say Dios so natetel ed paniirap tayo?​—Santiago 1:​13.