Onlad karga

TEPET NA SARAY KABATAAN

Antoy Gawaen Ko no Walay Agawan Makapaermen Diad Pamilya Mi?

Antoy Gawaen Ko no Walay Agawan Makapaermen Diad Pamilya Mi?

Amin tayo et posiblin makaeksperiensyay ermen. “Samay maples ya ombatik et agnaynay a manatalo ed lumba, samay mabiskeg et agnaynay a manatalo ed guerra,” so kuan na Biblia. “Saray ag-iilaloan a nagawa et onsasabid sikaran amin.” (Eclesiastes 9:11) Kaibad satan iray kabataan ya walay agawan makapaermen diad pamilya da. Panon dan asarag itan? Nengnengen so duaran alimbawa.

 REBEKAH

Nan-divorce iray atateng ko nen 14 ko.

Imbagak ed sarilik ya aga natuloy so pan-divorce na atateng ko, tan ompan kaukolan labat nen daddy’k so man-isip. Inar-aro toy mommy’k, kanian imposiblin taynanan to. Imposiblin taynanan to ak met.

Agko sarag ya ibagad arum so nagagawa. Agko ingen labay ya isipen. Ansakisakit man ed siak, pero diad saman singa agni halata. Balet aburido ak ya maong, tan agak makakaugip.

Nen 19 ko, inatey si mommy’k lapud cancer. Sikato so best friend ko.

Anta makapaermen la may impan-divorce na atateng ko, mas grabe ermen ko nen inatey si mommy’k. Agak ni aka-move on anggad natan. Mas nairapan ak ya onugip, tan aburido ak ya lanang.

Balet, wala ray akatulong ed siak. Singa bilang, ibabaga na Proverbio 18:1 ya agtayo isisian so sarili tayo, kanian inyaplikak itan.

Sakey ni, lapud Tasi nen Jehova ak, babasaen ko ray makapabiskeg ya publikasyon ya base ed Biblia. Say sakey ya akatulong ed siak nen nan-divorce so atateng ko et say libron Questions Young People Ask​—Answers That Work. Lalo la nen abasak ed Volume 2 so chapter ya “Can I Be Happy in a Single-Parent Family?”

Say sakey ed saray paboritok ya teksto no naaaburido ak et amay walad Mateo 6:​25-34. Diad bersikulo 27, intepet nen Jesus: “Siopad sikayo so makapangarum na sankasiko * ed dukey na bilay to lapud pampapaga to?”

Walan-walay nagawan makapaermen ed pamilya tayo, pero naaralan kod si mommy’k ya importante no panon tayon arapen iratan ya subok. Dakdakel so adalan ton problema—amay impan-divorce da nen daddy’k insan nansakit na grabe—pero nansiansian positibo si mommy’k, tan mabiskeg so pananisia tod Dios anggad impatey to. Agkon balot nalingwanan iray imbangat tod siak tungkol ed si Jehova.

Isip mo: Panon kan natulongan na pambasay Biblia tan publikasyon ya base ed Biblia no walay nagawan makapaermen ed pamilya yo?​—Salmo 94:19.

 CORDELL

Nen 17 ko, anengneng koy impatey nen tatay ko. Aman so sankaermenan ya agawad bilay ko. Agak makapanisia.

Agko natanggap ya inatey lay tatay ko, tan agko panisiaan ya sikato may sinakoban day abel so bangkay to. Imbagak ed sarilik, ‘Ombangon si tatay nabuas.’ Singa anggapoy kana na bilay ko tan agko amtay gawaen ko.

Tasi nen Jehova so pamilya mi, tan baleg so nitulong na kongregasyon mi nen inatey si tatay ko. Inlutoan da kami, inibaan da kamid abung, tan agda kami tinaynan—aliwan diad pigaran agew labat, noagta abayag. Parad siak, patunay itan ya tuan Kristiano iray Tasi nen Jehova.​—Juan 13:35.

Say sakey ed saray teksto ya akapaseseg ed siak et say 2 Corinto 4:​17, 18. Say kuan tod man: “Anggano say irap et magano tan anlemew, mamapawala itan ed sikatayo na gloria a manbaleg lan manbaleg tan agmangangga; legan tayon iteteen so kamataan tayo ed saray bengatlan agnanengneng, aliwan diad saray bengatlan nanengneng. Ta saray bengatlan nanengneng et temporaryo, balet saray bengatlan agnanengneng et andi-anggaan.”

Baleg so epekto tod siak may bersikulo 18. Temporaryo labat so inkaandi nen tatay ko, balet say promisa na Dios ya gawaen tod arapen et andi-anggaan. Lapud impatey nen tatay ko, mas naisip ko no panon kon uusarey bilay ko tan anguman iray goal ko.

Isip mo: Panon ya makatulong iray makapaermen ya agawad pamilyam pian nonoten lamet iray goal mod bilay?​—1 Juan 2:17.

^ par. 14 Say sankasiko et panagsukat ya manga 45 centimeter odino 1.5 feet so katumbas to natan.