Onlad karga

TEPET NA SARAY KABATAAN

Kasin Kaukolan Mi Lay Man-break?—Part 1

Kasin Kaukolan Mi Lay Man-break?—Part 1

No maminsan et mas maabig so man-break. Nengneng moy eksperiensya nen Jill. Imbaga to, “Nen unaan, labalabay ko no naynay ya aamtaen na boyfriend ko no iner so kulaan ko, antoy gagawaen ko, tan siopay kaibak. Balet sinmabi punto ya anggapo lay arum ya nakakaibak noag sikato labat. Panseselosan to ni ingen so pamilyak—lalo lay Daddyk. Nen aki-break ak ed boyfriend ko, akainawa ak ya maong!”

Ontan met so eksperiensya nen Sarah. Apansin to ya say boyfriend ton si John et makapainsulton mansalita, demanding, tan aliwliway ugali to. Imbaga nen Sarah, “Aminsan et sinmabid abung mi ya atrasado na taloy oras! Nen nilukasan nen Mommyk so puerta, agto labat imbano, basta imbaga to: ‘Gala la. Late ta la.’ Agto imbagan ‘Late ak la,’ noagta ‘Late ta la.’ Dapat komon nan-sorry o imbaga to no akin ya a-late. Tan komon ta nirespeto toy Mommyk!”

Siempre, agto labay ya ibagan no aminsan ya alingo odino agmo agustoan so sakey ya ugali na inarom et i-break mo la. (Salmo 130:3) Balet diad situasyon nen Sarah, apansin to ya talagan aliwliway ugali nen John kanian nandesisyon ya i-break to la.

Panon to no, singa si Jill tan Sarah, amoriam ya say inarom et agmagmaliw ya maong ya asawa? No ontan, agmo ibabaliwa so naliliknam! Anggano mairap ya awaten, ompan mas maabig no pultoten mo lay relasyon yo. Ibabaga na Uliran 22:3, New World Translation: “Say marunong et ompapaliis no nanenengneng toy peligro.”

Tua, nayarin aliwan mainomay so mi-break. Balet say panangasawa et permanente. Mas maong nin nasakitan ka natan nen say magbabawi ka legay bilay mo!