Onlad karga

TEPET NA SARAY KABATAAN

Kasin Kaukolan Mi Lay Man-break? (Part 2)

Kasin Kaukolan Mi Lay Man-break? (Part 2)

Unona, manpili kay dugan panaon na pantongtong yo. Panon to kasi ey?

Nonot mo no panon so labay mon pantrato na arum ed sika. (Mateo 7:12) Labay mo kasi ya i-break da kad arap na arum ya totoo? Siempre andi.

Anggad posible, agmo pupultoten so relasyon yo panamegley na telephone answering machine, text message, odino e-mail. Manpili kay oras tan lugar ya makapantongtong kayo tungkol ed sayan seryoson desisyon.

Antoy ibagam no sika lay mansalita? Imbaga nen apostol Pablo ya saray Kristiano et nepeg ya “mansalita na katuaan.”—Efeso 4:25.

Kanian mansalita ka diad marespeton paraan pero ipanengneng mon agla nauman so desisyon mo. Ipalinew mod sikato no akin ya aliwa lan maong so epekto na sayan relasyon ed sika.

Agmo la kaukolan ya sansakeyen so lingo to odino saray agmo labay ed sikato. Imbes ya ibagam ya, “Kasalanan mo . . .,” odino “Agmo kasi . . .,” mas maong no say ibagam et say naliliknam nen say tetelen mo. Singa bilang, ibagam ya, “Say kaukolan ko et amay toon . . .” odino “Parad siak, dapat lan pultoten iyan relasyon lapud . . .”

Agmo aabuloyan ya nakombinse kan umanen so desisyon mo. Tandaan, nandesisyon kan mi-break lapud seryoso iran rason. Kanian manalwar ka no salien ton umanen so nonot mo diad paraan ya agmo naliklikas. “Nen aki-break ak,” so kuan na marikit ya si Lori, “singa naynay ya depressed imay datin boyfriend ko. Amtak ya gagawaen to man pian nakasian ko. Anggan panon et nakokonsiensia ak met. Balet agak nampaapekto, agko inuman so desisyon ko.” Singa si Lori, dapat antam so labay mo. Panindigan moy desisyon mo. No imbagam ya andi, talagan andi.​Santiago 5:12.

Kayari Yon Nan-break.

Normal labat ya naermenan kad impan-break yo. Ompan naliknam met may imbaga na salmista: “Agonigon tan nipaabeba ak a maong; sanagew ak a manaakar-akar a maer-ermen.”—Salmo 38:6.

Nayarin wala ray kakaarom ya maong met so motibo ra tan kombinsien da kan ikdan mo lamet na chance. Manalwar ka! Sika, aliwan saray kakaarom so makalikna ed resulta na desisyon mo. Kanian agka natatakot ya panindigan so desisyon mo​—anggano nayarin maermen kad agawa.

Paulyan mo ta onlabas lanlamang tay sakit ya naliliknam. Balet natan, balibali no manggawa kay paraan pian nasarag moy situasyon mo, singa saraya:

  • Ibagam so naliliknam ed pantitiwalaan mon kaaro.​—Proverbio 15:22.

  • Ipikasim so situasyon mo ed si Jehova.​—Salmo 55:22.

  • Dapat busy kan lanang.​—1 Corinto 15:58.

  • Agmo isisian so sarilim ed arum.​—Proverbio 18:1.

  • Miulop kan tampol ed saramay antam ya napaseseg da ka. Dapat puro positibo so nonoten mo.​—Filipos 4:8.