Onlad karga

Kasin Ibabangat na Biblia so Reinkarnasyon?

Kasin Ibabangat na Biblia so Reinkarnasyon?

Say ebat na Biblia

Andi. Anggapo met ed Biblia so salitan “reinkarnasyon” odino ideya nipaakar ed satan. Say panisia ed reinkarnasyon et base ed bangat ya imortal so kamarerwa. * Balet, ibabangat na Biblia ya say kamarerwa et say mismon too tan ompatey itan. (Genesis 2:7, footnote; Ezequiel 18:4) No ompatey so too, sikatoy ontunda lan manbilay.—Genesis 3:19; Eclesiastes 9:5, 6.

Antoy pandumaan na reinkarnasyon tan kioli?

Say bangat na Biblia ya kioli et aliwan base ed bangat ya imortal so kamarerwa. Diad kioli, saray totoon inaatey et bilayen lamet panamegley na pakayari na Dios. (Mateo 22:23, 29; Gawa 24:15) Say kioli et mangiiter na balibalin ilalo ed totoo ya manbilay ira diad balon dalin tan agla ran balot ompatey.—2 Pedro 3:13; Apocalipsis 21:3, 4.

Lingon pakatalos ed reinkarnasyon tan ed Biblia

Lingon pakatalos: Ibabaga na Biblia ya si propeta Elias et inyanak lamet bilang si Juan Bautista.

Katuaan: Imbaga na Dios: “Ibakik ed sikayo si propetan Elias,” tan impanengneng nen Jesus ya agawa iyan propesiya ed si Juan Bautista. (Malaquias 4:5, 6; Mateo 11:13, 14) Balet agto labay ya ibagan si Elias et inyanak lamet bilang si Juan Bautista. Imbagan mismo nen Juan ya aliwan sikato si Elias. (Juan 1:21) Imbes, saray ginawa nen Juan et kapareho na saray ginawa nen Elias, say pangipulong na mensahe na Dios ya magbabawi iray totoo. (1 Arari 18:36, 37; Mateo 3:1) Si Juan et walaan met na “biskeg tan pakayari a singa si Elias.”—Lucas 1:13-17.

Lingon pakatalos: Say reinkarnasyon et sikato met lanlamang may tutukoyen na Biblia ya ‘niyanak lamet.’

Katuaan: Ipapanengneng na Biblia ya saray niyanak lamet et niyanak lamet ed espiritual tan nagagawa itan legan iran mabilay. (Juan 1:12, 13) Saya et aliwan resulta na saray agawaan ed apalabas, noagta bendisyon manlapud Dios, ya mangiiter ed saramay niyanak lamet na nikaduman ilalo ed arapen.—Juan 3:3; 1 Pedro 1:3, 4.

^ par. 3 Say panisia ed imortal ya kamarerwa tan reinkarnasyon et nanlapud Babilonia nensaman. Sinmabi panaon, saray philosopher ed India et ginawa ra so doktrina ya Karma. Imbaga na Britannica Encyclopedia of World Religions ya say Karma et “ganggan na sengegan tan epekto, ya ibabaga ton no antoy gagawaen na sakey ed bilay to natan et walay epekto to ed ontumbok a bilay to.”​—Pahina 913.